State Home Department hin Central sorkar a mopoh nanei minister ho, Manipur Chief Minister, Chairman, Hill Area Committee, President, MPCC, chuleh UNC, NPO, ANSAM, TNL, ANSUM, SDSA, ZIB, CNPO, Kuki Inpi Manipur, CDSA, Zomi Council a Secretary/President akouvin ahi. Ahinlah, UNC hi kihouna ah ajaonompon SP Senapati in kouna lekha apehjeng jongchu asang nompoi. Sorkar hin tulai phat boilai tah a hi lunglutna neijouse kihoucham dingleh mipiding gelna a ahung khom diuvin temna aneije.
Home Department hi alolhingpoi: Y. Irabot
Imphal, Lhajing 2: Minister of Consumer Affairs and Public Distribution, Y. Irabot in Home department hi vaihomna lang ahin alosamtai ajehchu police department a natong hohin Law and Order vettup sangin black marketing ahin nasatah in pan alauve atin ahi. Petrol tampi 2nd Manipur Rifles battalion family line quarters leh akimvel hoa akimudoh jouva Minister pahin themmo channa thu asei ahi.
Minister Irabot lamkaina a FCS official hohin koimakiginlou kah a family line quarter hi kholchilna aganeiju ahi. Inson cheh a akhol naovah sepoy mili quarter a konhin petrol thei ijat hamkhat adongdoh un ahi.
Amaho hin petrol leh diesel a-hi black market kichem uva ahi. Phalna umlouva thil kikoi akilongdoh jousehi Minister pan alan ahi. Thuso miho kom'a ahoulimna ah Minister pahin tulai thilhah laitah chuleh tumasang jepcha Manipur Inpi a ilodiham tia kiseichai pan bep'a security miho black market a akichep uhi thil neocha khatna kilalou ding ahi. Hichi hin Home department hi vaihomna langah alosam taove ti avetsah ahi ati.
Minister pa hin thil umdan kikholdoh hohi mopoh nanei Ministry leh state sorkar kom'a thulhut kineiding ahi, chuleh lampi panga petrol black market a joh hokhu nikhotha kiloho ahiuvin thao akimu joulou tengleh mipin aphatchom piuve. Ahin, security miho state sunga Law and Order vetup dihon black market abolíu vanghi kimohvet ponte tin aseije.
Manipur sorkar toh ADC thua kihouding UNC nomlou
Imphal, Lhajing 2: Lhajing nisim 3 nia Imphal khopi a kihou dinga Manipur sorkar in eikounao kanop pehlou jehchu state sorkar hin Naga lamkai hohi matna jail a hetding eigotnu ahi tin United Naga Council (UNC) hon asei uve. UNC president leh ANSAM lamkai tenihi suhkhelna nei ahin matding ahi, chuleh economic blockade aboljeh hon'a aluchang hon ah dangka lakh khatcheh apohon-e tia sorkar hin phondohna anei ahi.
UNC ho sei dannin 'Ka rights u kahuhgotjeh un Naga lamkai hohi mithat tobangin matna dingin state
sorkar hin thuphon aneijin hichu tunichan geijin achel- hapeh in ahi, hijeh chun state sorkar in Naga civil kiloi khomna holeh tribal kiloi khomna hotoh Lhajing nisim 3 nia kihoupi dinga eikou uhi Naga lamkaihomatna hentup ding agot dan un kamu uvin, hijehchun Naga mitehi kihou dinghi kinop lou ahi' ati.
UNC hin Senapati a Lhamul nisim 1, 2010 nikho a 3rd Naga Peoples' Convention'a chu Naga tehin Manipur sorkar toh political langa kimatna jouse akipailhatai tia aphondoh a Manipur sorkar chungahi political non-co-operation movement kichelhah khumding ahi, tin aseije. 'Kijopmatna akipailhah jeh a aongkom huhbit dingahi India sorkar hin thildang khat Naga te nopna a aganathei channa eigonpeh diu ahiî tin UNC in aseije. Alang khatnah Joint Secretary, state Home department, Devesh Deval hin Manipur sorkar thalhengin UNC hin District Council thua kihoulimpi dinga akikouna chu einoppeh pouve tin nopmo asahna aphongdoh e.
Chandel K.S.O. leh NSU lunglhai lou
Imphal, Lhajing 2: Chandel a Kuki Students' Organization leh Naga Students' Union hin Deputy General Manager, BSNL, Imphal hengah O. Jogeshwor, SDO, Telephone Exchange Chandel District hi office kai athasen mundang ah chondoh in tin lung nommo tah in thuphon ahinnei uvin ahi. Simlai kiloi khomna teni hin O. Jogeshwor hi kumthum masanga SDO panmun akipehtha a kipat hin atohding dolho atong tapoi atiuve. Hijeh hin District telecommunication hi alangthi abang jengtan mipi atongkha valtai. Anatoh danhi thet umtah ahijeh hin gangtah a munchom'a asoldoh nadiuvin angeh un ahi.
Kathil ngeh uhi kheltheipou vinge atiban uvah kangeh uhi eibolpehlou uleh thilphalou ahungso jongleh keiho mona hilou ding ahi atiuve.
MLA khat in Engineer khat sosal
Imphal, Lhajing 2 : Wangkhem A/C MLA, K. Meghachandra in alet naleh alalna vetsah na in Superintending Engineer (SE) khat amin Shijagurumayum Joykumar chu transformer chung changa ana bulu in ahi. Thulhut kimu chun aseina ah hiche thilsoh um masang chun MLA noiya natong mi 1 in transformer set jeh chun SE koma anache in ahi. Hinlah Chief Engineer (munchom'a potdoh) vailhah dung juiyin SE pa hin chunga ho thupeh nalouvin transformer kaphal doh ngaipouve anati.
Chu in solle pa hin apu pa (MLA) chu phone in akihou sah in hinlah SE pa in anatongpa koma aseipeh bang'in aseikit in ahi. Chomkhat jouvin MLA pa Directorate of Electricity Department ah ahung lut in SE Joykumar chu abehtoh apeh akop in ahi.
Thilsoh chung'a deilou vetsah na in department a natong ho akikhom uvin Power Minister pa chu a In ah athu hi aga lhut uvin ahi. Minister in thilsoh chung chang'a Minister ahilou leh MLA hon Government natong ho chung ah hitobang akibol khapoi tin demna aneiyin ahi. Minister in hiche thu ahin electric department a natong holeh Chief Minister chuleh MLA, Meghachandra hochu joint meeting akou khom pih in ahi.
Akiphin natong hochun chief minister pa kom ah MLA pa chunga action lah din angeh uvin ahi hinlah meeting chu alolhing pon ahi. Tuni meeting alolhin lou jeh hin akiphin natong hochun kiphinna jatchom chom kipodoh ding ahi atiuve.
