Sating pehdoh nakin chun Pu Henkholun Doungel in alamkaiyin ahi. Hiche kinpi a chelhah dung juiya chu Sating hi Pu Haokip Chassad pa, Pu Sitlhou Jampipa, Pu Chongloi Jangnoipa leh Pu Hang-shing Vongjangpa in Pu Kipgen Leikot pa apeh cheh diu; Pu Kipgen Leikot pa in Pu Doungel Aisanpa apeh ding chule Pu Doungel Aisan pa in Pu Guite Lamjangpa apehding. Hiche hi Pu Songthu guilhah sunga sating chedan in suhtohna anei uvin chujouvin Saba nehna kin amang uvin ahi.
Pu Thangchinlian Guite Lamjang pa in houlim aneina ah, "Inko khat ihiuvin ahin iki inkot nau hi kum 400/500 valjen sungchun ina kimansah uvin ahi hinla tua hi kihetdoh nakhat chu ahung lhung tan ahi" ati. Hiche thuhi 1985 kum chun ana kiseipoh in Doungel in Guite hohi U-pa hina anapom uvin ahi tinjong aeseiye. Hiche kin a Pu P.S. Haokip, President KNO in thusei aneina ah, "Pu Songthu guilhah a patsa Sating kipehdan kichehlou hohi suhtoh ding kanagelna asot tai.
1985 kum'a patsa chun Lamjang pa henga Sating ana kipenai ahin tua Pu Songthu guilhah kiseitoh dung juiya Lamjang pa in mi U-pa hinah a Sating aneh hin Kuki nampi hi ichan geiham khat in avahtai kati nom'e' ati. Tumasang AIR link language thuchun ngaidan eihin dong uve, hivachun kenjong 'kei neidoh diu ahile vang ka U-pa Guite pa paoman chu hileh kadeiye' tin kana donbut e atin ahi.
Zomi kiti hi kadem najong ahipoi hinla vannoiyin eihet nauchu Kuki ahi jehin hiche minpu a chu panlahding kadeisah e tinjong aseiyin ahi. Iham tia India sorkar in ithum u nahsah louva akoi uleh gamdang ho kom'a phutding lunggel kinei ahi ahin amasan India komin pan masaute atin ahi. Mi U-pa aboilou laisea keiho naopa te hi kaboi loudiu ahi tinjong aseiye.
Kuki chanu 1 Imphal cemetry a kivui
Imphal, Lhajing 2 : Tuni nisim 2/08/2010 nikhon sopi Ms. Kimneilhing @ Ruthneo, kum 24, North AOC Imphal muna SASO ho koma aumna ah ahinkho ana beijin, a sopi umlou chuleh aboipi ding mi
akimutah loujeh in KSO Imphal Block in KBC in a longdamsa hinboipi tauvin atiu toh kilhon in KBC Centre Church New Lambulane, Imphal BYF nungah gollhang holeh Adimjati Boys Hostel chuleh DM College Boys Hostel a gollhang hon Rev. S. L Helkholam Lhouvum, Youth Secretary KBC, lamkai nan Imphal Christian cemetry muna a thilong chu kilomtah in koidohna anei uvin ahi.
Disable pension Scheme hopdohna um
Lamka, Lhajing 2: District Social Welfare te makaina noiyin Indira Gandhi National Disable pension Scheme, 2009-2010, blue card neiho a din Lamka Police station mun ah alodingu hopdohna anei uvin ahi. Hivachun Tolbol, 2009 apatsa Ollha 2009 kikah sunga din lhakhat in dangka 200 agonpeh uvin ahi.
Thinglhang gamsunga designated camp kisa KSO le NSUC in demna nei
Imphal, Lhajing 2 : Chandel district hop sung'a um Kuki Studens' Organisation (KSO) leh Naga Studentsí Union, Chandel (NSUC) kiloikhom teni in Manipur chief minister O. Ibobi Singh kom ah Leikun, Chandel district a KCP designated camp kisah nachung ah agan natheipen a phaicham'a chon diu ahilou leh alahdoh din temna anei uvin ahi. Hitobang tohgon hin thinglhang gam'a cheng ho hatah in atongkha in acheng mipi ho hetlouva kibol hin jat le nam kikah a kihet them louna asoh sah thei ahin, bol dia lom ahi jong leh mipi hetsah masat ngai ahi tin simlai kiloikhom teni chun CM memorandum apeh nau achun aseiye.
Ihamtia State government in akingeh nabang'a alolhin lou uleh kiphinna jatchom chom kibol ding ahi tin jong aseibe in ahi. Hiche chung changía deilou thilsoh ima aum leh keihon mo kapoh lou diu ahi tin akiseiye.
CDSU in thuphon hinnei
Lamka, Lhajing 2: Public Work Department, PWD hon Kangvai kholai sunga Churacandpur District leh Bishnupur district boundary ahi tia signboard a tahdoh nautoh kilhon in Churachandpur District Studets Union, CDSU in kholchilna anei nung un PWD in district boundary amoh khel thei pouve ti ahedoh uvin chule gamgi seitoh ahi masangsen abolkit tahlou diuvin jong aphong uvin ahi.
Chuban in CDSU/COPTAM hon Phouchakkhai mipi ho hengah ipi jeh a band supporter ho akin'u akibol chu sosalna nanei uham tinjong thudoh anei uvin ahi. CDSU/COPTAM in Phouchakkhai khomi te henga band kibol ahi loudan atahlang uvin ahi. ChukitlehPhouchakkhai le avel dunga kho umho jong Bishnupur district a lut theilou ding ahih danjong aphong uvin ahi. Achesa nikho nisim 29, 2010 nia band umsunga CDSU lamkai le volunteer ho Imphal a lhai Bus Driver, Conductor, Handyman hon sosalna anei nachunga hethem louna anei naban a suhmil theilou hel a umdin thuphonjong anei uvin ahi.
Hiche nikhoa migilou adeh a mi 2 Sanathoi S/o Bina leh Tomba S/o Kulachandra of Kangvai tenichu Lhajing nisim 4 nikho nidan 2:00 masang ngeiya matdoh ahina dinjong thuphon abol uvin ahi. Achuti louva ahile ama teni chunga FIR file kibol khumding ahi naban a amateni chunga thilsoh aumle CDSU in mo kipolou ding ahi tinjong asei uvin ahi.
