New Delhi, Lhajing 5 : Kal kit apat Delhi airport Terminal 3 a passenger self check-in facilities umdoh ding ahitai. Hiche manchah chu Indira Gandhi International Airport mun'a umding ahi. Chuleh phat sot louva Web Check-in facilities jong um ding ahitai. Delhi International Airport Ltd (DIAL) a Vicepresident Ashwani Khanna in aseina a "hitobang facility hi Indian airport laha amasa pen ahi nalaiye" ati.

Aman aseina a common User Self Service counters 4 jong umding hiche a chu passengers ho ama-le-ama kikholna umding ahi. Hiche touch screen a chu flight leh PIN number jong umding ahi. Passengers hon adina seat jong akilhen thei ding ahitai. Web Check-in aum teng leh in mun apat hiche facilities ho hi manchah thei hiding ahi tin Khanna in aseiye. Tupet ahi sakhao ho koi nading leh kholchilna ding mun ho chu airlines ho akonna phat sahna aum lou lai jeh a kipodoh thei lou ahi tin aseiye. Dum chep ho leh kijen na ngaicha ho dinga jong atumbeh a pindan (room) um ding ahi. Adeh a diabetes veiho insulin kikapna jong umding ahi akiti. 

Ima jouse Pakistan toh kihou ding akinom'e : Krishna
New Delhi, Lhajing 5 : External Affairs Minister SM Krishna in aseina a Pakistan toh imajouse seikhom ding akinom'e, hinla hichu aban banna seiding ahi tin aseiye. Hiche aum thei na dinga chu
Pakistan pansa galguh bol hon India gam'a boina asem jing u angah diu angaiye ati. Kichat ding imacha aumpoi. India in Pakistan toh kihou ding anom jinge ti hi mipi ten jong ahet ding kanom'e tin Krishna in Rajya Sabha a thudoh anei nauva asei ahi.

India leh Pakistan Foreign Minister-level a kihouna aum ding kon'a Union Home Secretary GK
Pillai in thu asei doh jong chu Lashkar operation David Coleman Headley in Federal Bureau of Investigation (FBI) kom'a asei thucheng ahibouve tin Krishna in aseiye. Pillai in aseina a Pakistan ISI in Mumbai kibulu chu akipat a pat achai geiya vetsuina anei ahi ati. Chuleh Headley in aseina a Pakistan galguh bol lamkai Hafeez Saeed chu Mumbai kibuluna a lamkai ahi tin aseiye.

Mumbai kino khum na a mi 166 athi in chuleh mi 200 val ana kitongkha in ahi. Hiche masanga pat a chu Headley hin Mumbai mun vel tampi ahung vet lhah ahi.

Advani in PM kimupi, Kashmir thu seikhom lhon
New Delhi, Lhajing 5 : Senior BJP lamkai LK Advani leh Jammu and Kashmir a party MLA phabep in tuni chun Prime Minister Manmohan Singh ana kimupi un, Kashmir boina thu seikhomna anei ban uvah chamna um kit loi nadin centre in pan la hen tin ngehna anei un ahi. BJP lamkai hon vang centre leh Jammu and Kashmir Chief Minister Omar Abdullah kihouna a political package um dinga kisei chu aphatsah pouve. Political package um hen lang hileh agam'a chamlhat del galguh bol ho thaneina um ding ahi atiuve.

Prime Minister toh kimuto lah-a chun State a BJP MLAho, Lok Sabha a opposition leader Sushma Swaraj chuleh Rajya Sabha a opposition lamkai Arun Jaitley jong apangin ahi. Hiche palai ho hin boina mun'a um security forces ho lungthim suh thou ding angaiye atiuve. Chuleh Kashmir Valley a army lah doh lou ding chuleh state a sepai 20,000 koibe ding centre in agaito chu lemna anei un ahi. Prime Minister in jong amaho thil ngeh chu avetsui din aseiye. BJP party in Jammu and Kashmir thua Inpi a seikhomna aum ding jong adeisah un hiche tolhon chun senior party leader MM Joshi chu BJP thalhenga pang din alheng doh un ahi.

Maoist ho dou dal na dingin Orissa in Unified command semdoh ta
Bhubaneswar, Lhajing 5 : Maoist ho gal bolna dinga phatah a imajouse ahi ding banga aumthei nadinga Orissa sorkar in state-level Unified Command atum beh in asem doh tai. Hiche semdoh na dinga masang jep a chu Delhi a kihouna a kiphat sahna ana um ahi. Unified Command ahi member 8 um ahin Chief Secretary makaina a security organizations leh civil service ho pang ahi. Unified Command (UC) semdoh hi janhi a chu state home department in ana phondoh ahi. Hiche Unified Command ahin Development Commissioner (DC) chu member khat in apangin chuleh state home secretary chu member convenor in apangin ahi.

Director General of Police (DGP), Inspector General of Police (Operation), CRPF IG (Operation), Representatives of Intelligence Bureau chuleh state intelligence ho jong member in apangun ahi. Security leh intelligence officials hon security operation a kithopina anei diu chuleh civil service officers thulhut kimu chun aseiye. Tua UC kisem doh ahitan Left Wing extremism ho nasatah-a vet chilna umding ahitai tin state home department a senior official khat in aseiye.


Sohrab case thua CBI in ex-DGP kouna nei
Ahmedabad, Lhajing 5 : Sohrabuddin Sheikh chu bol thu kikapto na a thi ahi tia kiseina a athu kholchil a pang CBI in masanga Gujarat DGP PC Pandey chu thudoh nei dingin akou un ahi. CBI in Pandey chu Lhajing 11 teng hung dinga thupeh anei ahi. Hiche case hi CID in akhol laiya chu Pandey
hi DGP anahi pet ahi. Hiche case hi adih na bang tah-a khol doh louna dingin Gujarat police officials phabep in lungthim phalou amang uve tia ana kisei jing ahi.

Pandey kikou nahi tu chung hi amasapen ahi nalaiye. Ama maangin IPS officiers GC Raigar leh OP Mathur jong thudoh ana nei un ahi. Masanga chu CID in athu hi ana khol ahin, hinla deibanga anachal thei lou phat a Supreme Court in CBI khut a apeh doh ahi. Tuchan in CBI in masanga minister of state for Home Ami Shah, IPS officer Abhay Chudasanna chuleh Arham farm neipa Rajendra Jirawala chu aman tai. Shah chu aumna Sabarmati songkul a janhi chun thudoh anei un ahi.