Aizawl, Lhajing 12: Lalthanhawla government hin thingnoimi ho nahsah louvin akoiye tin Mizoram state legislative assembly opposition party, Mizo National Front (MNF) in tuni chun Congress sorkar hatah in gotna aneiyuvin ahi.

Tu le tua MNF Vice President chuleh tumasanga minister anahikha R. Tlanghmingthanga in gotna apehna achun, Lalthanhawla lamkaina Congress government hi Hmar People's Convention-Democratic (HPC)
hotoh kikhutjop ahi ati. MNF lamkaipu in aseina achun, Mizoram police ho masang jeng injong HPC
thingnoimi ho aning anop in avahleu vin kai jong akidon uve ati.

'Hijeh chun, Congress government in gamsunga chamna leh lungmonna aumna ding imacha akhohsah lou jeh hin, MNF party in demna apei' tin MNF lamkaipu chun aseiyin ahi. 'Tumasang jep a La-lpiangliana Aizawl police station sunga athijeh a police ho phabep akimat vang in, tunichan geiyin hiche pa thina jeh kholdohna aumhih laiye' ati. Adih tah chun, "departmental enquiry" umding in anakiseiye ati. 'Chaltlang leh Sairang kikah a gamgi jeh a kinahna aso jong hi sorkar lhahsam jeh ahi' tin R Tlanghmingthanga chun aseiye. Chujongleh, Congress party in tunichan geiya Rev. Chanchinmawia thina thu akholdoh joulou jeh in themmo achan in ahi.

MNF in Congress ministry adembe na achun, Lalthanhawla government hin dantoh kitoh louvin "ministry size" asem'e ati. R.Tlanghmingthanga in banjom a aseina achun, Congress ministry ahung umdoh doh chun Indian Constitution (91 Amendment) toh kitohlou vin Parliamentary Secretary gup(6) alhengdoh'e tinjong aseiben ahi.


India sah-solam gamma dinga Dam lentah kisemgo
Shillong, Lhajing 12(NNN): Arunachal Pradesh a Dam lentah kisah ding akichatjeh in Assam Power Minister, Pradyut Bordoloi hin ling kiho hatnamun chuleh leidet louna mun ahijeh in dam lentah sahnathei hinam tihi hoitah a kholtoh masah angaije tin aseije. 9th annual North East Regional Power Corporation (NERPC) kikhopna achai nikho a ahoulimna in P. Bordoloi hin agamsunga Dam lentah kisah dinghi kham-un tin Arunachal Pradesh kom ah ngehna aneije. Ahinlah, P. Bordoloi jonghin Dam kisah dinghi Central Electricity Authority (CEA) in phalna apeh ahijeh in Arunachal Pradesh state in panmun ima aneipoi tin aseibe e. Aman aseibena ah 'tua akingaicha penhi imalam jouse a khantouna hi ahi'.

Arunachal Pradesh Power Minister Jarbon Gamlin hin Lower Subansiri leh Kameng project hi akichaigei
valjeh hin National Hydro-electric Power Corporation (NHPC) heng achun achailoina diuvin ngehna aneije. Dangka crore 6,400 lutna kisa Lower Subansiri Project hi India sunga Dam lenloi khat ahin, alhang sunga mei lhahsamna hi asuhbeidin tahsan aumme. 2000 MW Lower Subansiri hydroelectricity project hi Arunachal Pradesh sunga um NHPC Ltd, in asah ahijeh hin thunoh baotam aumíin, hetgilna neiho jaona a kisem committee ni hin project kholchilna aneijou uchun alungkim jou pouve.