Martyr Bhagat Singh :
Pen nikho : Lhalam 27, 1907. Punjab.
Athi nikho: Lhakao 23, 1931.
Bhagat Singh hi India zalen galsat ahitoh kilhoníin Bharatiya Independence movement ana umlai chun amahin pan nasatah in anala in ahi.
Hiche jeh hin amahi Martyr Bhagat Singh tin min akou uvin ahi. Khangdong cha ahi in, mi thina changei khailih a aum ding teng koi nuikha ngei em? mi hangsan Martyr Bhagat Singh in vang akikhailih ding kon changeiyin jat le nam'a ding'a thi ding kahi ti akihet in mai lheisel'in athi nading mun ajon jangkei in ahi. Agang (uncle), Sardar Ajit Singh leh apa jong chu India zalen galsat mi ahi lhoníin hijeh chun Bhagat Singh jong nam ngailutah mi ahunghi in ahi.
Bhagat Singh in kho ahung het akipat in British lengvaipoh nahi (British Empire) suhmang ding alung'a ana umpan tan ahi. Achapan lai in jong British toh kisat ding kichatna aneipon, meithal kisem'a British te douding alung ah acheng jingin ahi. Ghadar Movement um chun Bhagat Singh lung sung atongkha lheh in ahi. Kartar Singh Sarabha (19 yrs), British hon akhailih pa chu ama ading in vetjui thei tah ahung hi in ahi. Achesa Lhatun 13, 1919 kum'a Jallianwala Bagh, Amritsar mun'a mi tamtah kitha namun achun ache in amaho hi gam huhdohna a thi ahiuve tin thisan bena leiset chu achop (kiss) in chuleh leiset beh khat ainlang'a ahung kichoi in ahi. Kum 16 ahung hichun Bhagat Singh in ibol'a India lengte (Bharatiyas) ho in agam uva hunglut gampam miho ana deldoh lou ham tin ana datmo lheh jengin ahi.
Bhagat Singh in British India ho agam uva kon deldoh nading'a lunggel nei holeh kiloikhom ho aholna ah Sukhdev leh Rajguru toh ahung kimuto tauvin ahi. Bhagat Singh in Chandrashekhar Azad panpi najal'in Hindustan Socialist Republican Army (HSRA) ahin phutdoh tan ahi. HSRA in abidoi pen chu ahileh British akon'a India hi chamlhat sah ding ati ahin chuleh socialist India jong hisah ding agot u ahi.
British vaipoh deilou jeh a kijot na achun police hon mi tamtah anavoh jeh un achesa Phallha 17, 1928 kum'in India zalen galsat, Lala Lajpat Rai jong ana pangin akivohna gu thoh jou louvin, Lahore mun ah ana thitan ahi. Ama (Rai) thi lethuh nading'in Bhagat Singh in hiche chung'a ana mopo/lamkai British official, Deputy Inspector General Scott chu kaplih ding in anatup-e. Hinlah Bhagat Singh hetkhel jeh in Assistant Superintendent Saunders joh chu Scott ahisah in ana kaplih tauvin ahi. Hijeh chun Lahore akon in Calcutta lam ah ahung jamdoh in chu apat chun Agra mun ah bomb ahinsem pan tan ahi.
British Government ho in Trades Disputes Bill act ahinpodoh un Bhagat Singh in hiche Bill chu deilou jeh in Central Assembly Hall (tu tua Loksabha) mun'a Assembly toukhom laitah in bomb ana seplut in ahi.
Hiche bomb kiseplut chun mi akitongkha aumlou vangin anam mite (nation) soh ahinauva kon ahung khangdoh uvin ahi. Bomb kiselut jou chun Bhagat Singh leh aloiho amun akon'in jamdoh luovin akimat sah tauvin ahi. Amaho chung thu kikhol sung chun Bhagat Singh in ama lang'a ukil (lawyer) goi ding anom pon ahi.
A nam miho in British government kom'a ngaidam thumna anei vang uvin Bhagat Singh, Sukhdev leh Rajguru ho chu thina changei gotna apetauvin hijeh chun Lhakao 23, 1931 nikhoín khailih in aum tauvin ahi. Amaho thilong chu Sutlej, Ferozepur tuipang ah amaho sakho dung juiyin ana hal uvin ahi. Hiche pet chun Bhagat Singh hi kum 23 bou ahi nalaiye. Tehse hon aseina ah hiche nikho chun mun tamtah ah tapkong (hearth) sung'a mei khatcha akitih poi atiuve.
Shivram Rajguru :
Pen nikho : 1908, Pune.Athi nikho : Lhakao 23, 1931.
Shivram Hari Rajguru hi middle-class Hindu Brahmin akonía Khed, Pune District mun'a 1908 kum chun ana peng in ahi.
Chapang cha ahichun Rajguru in Varanasi mun ah Sanskrit leh Hindu sakho ho thusim ana simpan tan
ahi. Shivaji thusim holeh agalsat dan ho asimna ah Rajguru in kitilkhou na phatah in aneiyin ahi. Varanasi mun achun Rajguru in India zalen galsat hotoh akimuto in niseh in akihoumat jing un ahi.
Hijeh chun ama jong Hindustan Socialist Republican Army (HSRA) ah active member khat ahung hi tan ahi. Rajguru hi mihangsan tah ahi in chuleh kichatna ima anei pon ahi. Ama in alungía agel jing chu anam mite hi zalen sah ding agel jing in ahi. Amahin Chandrashekhar Azad leh Bhagat Singh toh phatah in akivop jing uvin chuleh UP leh Punjab ah natoh naho anei jing in ama in Kanpur, Agra leh Lahore ho hi headquarter in aneiyin ahi.
Rajguru hi meithal kap themtah ahi in hijeh chun amaho kiloikhomna achun ama in thal achal jing in ahi. Rajguru in British government ho douna in pan nasatah in ala jing in ahi, het thei khat chu Assistant Superintendent Saunders kitha nachung ah ama in pan ana la in ahi. Ollha 17, 1928 kum chun Saunders a
office akon ahungpot doh a agari (motor-cycle) tolding'a akigot laitah chun Lahore police headquarter mun achun Rajguru in anakaplih in ahi. Chandrashekhar Azad, Shivram Rajguru, Bhagat Singh leh Jai Gopal ho in
hiche natoh nading'a hi kipedoh ahiuve. Rajguru khailih a aum chun kum 23 tobang ahinalai in ahi.
Sukhdev Thapar :
Pen nikho : Lhaphul 15, 1907. PunjabAthi nikho : Lhakao 23, 1931.
Sukhdev Thapar kiti pa hi India zalen galsat mihangsan Punjab state akon ahi. Ama jong hi HSRA ah active member khat ahi in chuleh amaho lah a alamkai lenpen ahikit in ahi.
Sukhdev Thapar in National College (Lahore) mun'a India te khang chesa leh vannoiya zalen galsat ho thusim ho hetna ding in lekha anasim in ahi. Ama in Bhagat Singh leh adangdang ho jaona in Lahore mun ah "Nau jawan Bharat Sabha' kiti ahinbol doh uvin ahi. Hiche kiloikhom in adoi thupi pen chu ahileh khangthah ho zalen galsat ding'a tildoh ding, gam sung'a untouchability (nam neo jatkhat) kiti ho suhmang ding agel thupi
peníu anahi in ahi.
