Lamka, Lhajing 6: Kuki Innpi Manipur (KIM) hon tuni nilhah lang nidan 3:30 chun Kuki Innpi Churachandpur Office Tuibuong mun ah tuchung'a Churachandpur District sung'a mipi ho boina Overlapping Census,istrict Boundary,and Revenue chungchang thuía nasatah a gam huhdoh nadia panhinla ho adeh a CDSU le COPTAM hochu KIM in an-kong sokhom pina anei uvin ahi. Hivachun maban a District boina chung thu'a panlah khom dingdan seikhom najong anei piuvin ahi. Chukitleh CDSU lamkai thah kilhengdoh hojong kipapina anei naban uvin tilkhou najong anei piuvin ahi.

Census enumerator mi 3 chunga thuso kibol
Lamka, Lhajing 6: Census 2011 chelai ahitoh kilhon na overlapping aum jeh in mun phabep hochun aki khongai photin akah in munphabep hochun aki lachai tan ahi. Alangkhat ah hitobang dinmun laitah ahin munkhat hochun atoh nading kipeh namun hochun aga kithah khalou jong aumda pon ahi. Hichu thutoh kilhon chun ADC in thuso abolna ah Vangai hopsunga census enumerator dinga kilhengdoh mi 3 in na atoh loujeh un DC office muna ahung kiseilhap diuvin thupeh khat aphonge ti thulhut akimun ahi.

Vangai muna census enumerator dinga lhendoh mi 3 hochu ahile Robinson Pakuangte; Ngamapabung JB School, Thangkholun; Sibapurikhali Jr. H/S leh Md. Jamir Admed; Sibap- urikhali High School ahiuve. Hiche thulhut hi SP incharge kom injong hetsahna akineiye tin akiseiye.

Inter school golseh umding
Sadar Hills, Lhajing 6: Simlai khangdong ho chunga kichep golseh (Games & Sports) themjil namun hoa achal lhah thei nading toh-gon khat Ministry of Youth Affairs & Sports noiya SAI, NS, NIS hon Panchayat Yuva Krida Aur Khel Abhiyan (PYKKA) toh kithoa tohgon anei uchu kum 2010-2011 a patsan Nehru Yuva Kendra Sangathan vetsuna noiya aumtoh kilhon in ahung lhungding Lhajing nisim 26 a patsa 28 chan Thomas Ground, Kangpokpi, Sadar Hills Manipur muna umding ahi.

Hiche golseh kitetna a lhathei dingho chu ahile 31st December 2010 nikhoa patsa akum 16 noilam simlai chapang hiding chule Govt School ahiloule Govt hetpina noiya school khatna kai hiding ahi. Hiche nikhoa akitet nadingho chu ahile Athletics, Badminton, Basketball, Football, Table Tennis, Volley Ball chule Wrestling hiding ahi.

Hiche golseh a lhathei dingho chu ahile Sadar Hills hopsunga um themjil namun jouse hiding ahi. Koitobang lunglutna neihon District Youth Coordinator, Nehru Yuva Kendra ahiloule Superintendent, Youth Affairs & Sports chule Zonal Education Officer, Kangpokpi henga dohchen thei ahi.

Hiche golseh vesui dinghi Youth Affairs & Sports hetpi na noiya Physical Education Teachers (PET)
ho ngen hidiu ahi. Chuleh golseh sunga ahung lhaho che le vale nah organizing committee in kivetpih
louding ahi tin committee hoa konin hetsah na akimun ahi.

KNF(Z) in mipi le lamkai ho henga hetsahna nei
Lamka, Lhajing 6: Pu Joshua Haokip C-in-C Kuki National Front (Zogam) a kon a thuphon kimu chun aseina ah, Mr Paogin Haokip S/o Letkhai Haokip of Bongjang Village, Chandel District ama hi KUKI te lungtup molso ding lunggel neina jalin KNF (Zogam) ah Nam natong ding in ahung pang in ahi hinla vangset um tah in gari accident ahin tokhah jeh in ama hi Nam natoh nah a kon kichol ding in phatsah nah akineitan ahi. Hiche dungjui chun toh khompi KNO/UPF lamkai holeh Nam sepai ho, Govt. Agency hon nei nahet peh diuvin temna kaneiye tin Pu Joshua chun aseiyin ahi.


Integrated Agriculture Practices Training lolhing tah a kichaita
Sadar Hills, Lhajing. 6: Achesa Lhajing nisim 3 nikhoa patsa nisim 6 changei Integrated Agriculture Practices Training kiti toh-gon khat RATARC-ICD Hmarkhawlien Cachar District Assam le Society for Promotion of Tribal Welfare & Development (SPTWD) Manipur Branch panlah khomna noiya kichuhna chu lolhing tah in Kangchup Songlung, Sadar Hills Manipur mun ah ana chelhan ahi.

Hiche toh-gon um sunga chu RATARC-ICD Training Coordinator Ms.Dorothy Varte le Community Development Organizer Ms.Vanlalchhuanpuii Zathang in avetsui lhon ahi. Hichi training a hi Kangchup sunga loulhou mi 20 in kichuhna anei uvin ahi. Amahon ajil uchu ahile: SALT (Sustainable Agriculture Land farming Technology) 1,2,3 and 4, Preparation of Organic FertilizerBokashi and weed composting, Cash and fruit crop plantation chule Faith Gardening and Crop rotation ho ahi.