H. Mahadevan hin natong mihon angehpen uhi thilmankal suhlhom ding, Labour laws khoutah a en-force bolding, natoh mun sembe ding chuleh natohnaho venbit ding, public sector undertakings (PSUs) disinvestment kibolgot nahi velvet ding, chuleh Unorganized Sector Workersí Social Security Act, 2008 semphat ding hohi ahi ati e. H Mahadevan jonghin nitin ngaichat hohi manbaitah a mipiho pehna dinga kiphutdoh public distribution system (PDS) jonghi nehguh leh thildihlou tampi aumtan migenthei adeh a unorganized sector a umhohin PDS hi aphatchompi pouve. Central sorkar hin mihaosa hobou agelkhoh jeh in Industrialists hobou bailout abol in natong mihovang abolpoi, tin phamo asahdan aseiben ahi.
Chukitleh tua India sunga akichepi contract labour hin 'natoh kibangchu alojong kibang ding' kiti fundamental rights hi atongkhai, ajehchu hichi hin permanent leh contract a natongho kikah ah kigit khenna lentah asemdoh e. Manipur a natongmi jousen Lhalam nisim 7 a kiphina a ahungjao sohkei diuvin tepna aneije. Mahadevan hin Kuki Inn, Imphal mun'a natong miho kikhopna khatna jong thu aseiding ahi.
Guwahati High Court Chief Justice thah Manipur hung kholjin
Imphal Lhajing 27:Delhi High Court Judge ho lah a senior pen Justice Madan Bhimarao Lokur chu Guwahati High Court Chief Justice akai toh kilhonin achesa Lhajing nisim 22 ni chun Imphal ahung vil lhan ahi. Guwahati High Court (Imphal Bench) Registrar pan thuso apehna achun, Chief Justice pu hin Imphal Bench a thutanna phunga atouna ban'a jong mun chom chom a um Court neo neo hojong vil lhahna ananeiye ati. Hiche ban'a Sorkar officer hojong akimu pin court leh asunga thil manchah ngaichat ho kimkei leh hoitah a akisuh tup thei nadingin atemin ahi, ati.
Akholjin na tohgon toh kijuiyin, Chief Justice pan nisin 23 nikho a court a thutanna anei jouvin, Lamphel toh Cheirap Court Complex ana vil lhan chujou vin Mantripukhri High Court Complex kisa thah jong vetlhah na ana neiyin ahi.
Lhajing nisim 26 chan geichun Chief Justice pu chun Bishnupur, Churachandpur, Thoubal chuleh Ukhrul a um court neo neo ho vilna ana mangin ahi. Chuban'a jong INA complex, Sendra Lhang, Khuga Dam chuleh Khongjom War Memorial ho jong agave in ahi. Aman akholjin sunga chun Bar member holeh court a lhacha ho hahsatna/boina ho jong anasu lham in ahi.
1965 kuma simlai chapang 4 thi nikho geldoh u
Imphal, Lhajing. 27(NNN): Achesa 1965 kum a anchang hahsat jeh a kiphin simlai ho, numei khat jaona pasal 4 hon sepai khut a thina anatoh u geldoh na in Imphal khopi ah tunichun mi tamtah in kijotna anei uvin ahi. All Manipur Students Union (AMSU) lamkainan hiche nikho geldohna kin a apanthei na diuvin Imphal
khopi sung a jil-in (school) ho jouse janhi chun akikhah soh in ahi.
Thulhut chun asei na ah achesa 1965 kum a kel um chu mihem semthu tobang ahijeh a simlai 30000 tobang kipunkhom hon alunglhai lou nao hetsah ding leh anchang thum dinga Lhajing nisim 27, 1965 nia chu Chief Commissioner Baleshwor Prasad kom jon'a che ahiuve. Ahinla ahahsat naongaipeh tahsang in Chief Commissioner pa inngah sepai hochun meithal akap khum phat uchun simlai mi 4 hon thina ana to u ahi. Chuche nikho a thina toh simlai ho chu Keisampat Thouda Bhabok Leikai mun a kon Oinam Nabakumar (20) S/o Oinam Krishnamohan, Chingamakha Ningthoujam Leikai Waikhom mun a kon Nillamani Singh (28) S/o W. Angou Singh, Singjamei Thongam Leikai a kon Nongmeikapam Peamodini Devi (19) D/o N. Yaimabi Singh chuleh Khurai Ningthoubung Leikai a kon Laishram Chaobhan Singh (28) S/o Laishram Hera Singh ahiuve.
Chuchi nia pat thilsoh chu tunigei a "kel lhah kipumkhat nikho" tia AMSU in anitjing ahitai. Hiche thilsoh geldohna chu Imphal Pishum Ching, Singjamei mun a pahcha thena uma, aban a THAU lentol mun a mipi kikhopna um kit ahi.
Rotary Club makaina a Medical Camp umding
Imphal, Lhajing 27: "Free Consultation of Early Cancer Detection and Management Programí hi suhjomna dinga Rotary Club of Imphal hin Cancer Detection and Management camp hi Lhajing nisim 28 leh Imphal Hospital & Research Centre, RIMSRoad muna aneiding ahi. Rotary Club in thuso abolna achun hichi camp a hungjao ding doctor hochu Gynaecology, Surgery leh Uro-surgery, ENT, Head & Neck surgery, Orthopaedics, Medicine, Paediatrics, Radiotherapy leh Oncology langa thepna sangtah neingen ahiuve atin ahi. Athanom jousen Imphal Hospital a tunileh nidan 2.00 c.n. ngeija register akibollu angaije.
Ajehchu, camp hi tuni nidan 3.00 c.n. apat 5.00 c.n. chan umding ahi. Chuleh, club jonghin masanga damona neisahon adam monao gangtah a matdoh ahitheina dinga doctor lekha ahin kichoi diuvin tepna aneiben ahi.
