Hiche kin a houlim aneina achun Pu John in hitin aseiye, "achesa Lhaphul nisim 17 nikhoa thilsoh chu imacha kahe pha pouvin ahi. Hinla thilso le umdan hohi akivet leh khonunga kihet themto louna thei dinmun asokhah ding jeh a hung kalsong akhiuve. Hiche masangchun Kuki te chondan ipi ham i-tileh thilsoh chunga alunghan naule nopmo asahnau akisulham dem tihi kana hakhol laitah un 'tolthehna' kiti thucheng kahung hetdoh uva konna tunia hung kahiuve' tin houlimna aneiyin ahi. Aman aseibe na ah, "Bomb thang hung kampa chu Chandel ho ahi tia Police hon aseival ima hetphahna kaneilou u ahin hinla ajo khat toule Kuki le Naga kikah a boina hungso khahding deilou najal a gangtah a athip theina ding tia Kangpokpi toh kinaipen keiho lamkaina a hung kahiuve tin phondohna aneiben ahi.
Hiche toh kilhon chun Pu Ngulkholam Haokip, Kangpokpi Towm Committee Advisor in houlim aneina ah, "mihem in chondan le khankho akinei cheh in, khatle khat kijatona akinei ahileh chamna lhungjing jengthei ahi" atin ahi. Aman aseibe na ah, Tua nahung kalson nauhi Kuki te chondan a khosunga thise/thiphalou aumteng khosung damtheina dinga khosung suhthengna khat tolthehna kiti nahin bol uhi kakipapi lheh uvin ahi. Nungteng jongle hitia icustom le culture hohi akoiya hitaleh kijapito chehding ahi tinjong aseiyin ahi.
Hiche nikhoa kihoutona aumtoh kilhon'a khonung teng koiman hiche thuso chungchanga thuseina ginsah tah louding in Kangpokpi Town Committee hon hetsah naleh temna anei uvin ahi. Chukitleh achesa nikhoa mipi kikah a sagu senathei khop'a bomb kikam chung thu chun kilungtoh tah in Kangpokpi Town Committee leh Karong/Senapati Town Committee in demna nasatah in anei lhonin ahi.
Hiche tolthehna kin'a hung kalsong kiloi khomna phabep hochu ahile Naga Peoples Organisation (NPO), Senapati District Students' Association (SDSA), Senapati Town Committee chule Naga kiloi khomna adang dangho jong ahung lhauvin ahi. Alangkhat achun Kuki Students Organisation (KSO) Kuki Inpi Sadar Hills, Kangpokpi Town Committee, Kangpokipi women organisation, Youth Club le lamkai dangho jong ajau uvin ahi. Kihouto naleh kihou lhahna anei jouvin ankong sokhomna anei khom uvin ahi.
KNO in Salem Camp thensona nei
CCPur, Lhajing. 18: Sangaikot Block gamkaiya um Mongbung gamsung a Kuki National Organisation (KNO) in Salem Camp 2nd Battalion tia aminvo Kuki Army ho um nading Designated Camp kisa chu hondoh nakin nidan 11:00 chun anei taovin ahi. Hiche kin-gon chun Jingun in Pu Henneihao Khongsai Kuki Innpi Churachandpur apangin ahi. Kuki National Organisation ponlap dopsang najong aumin chuleh Rev Dousuanthang MELC in Salem Camp thenso nakin aneiyin ahi.
Camp hondoh ahitoh kilhon in Pu T.S Haokip Defence Secy (KNO) in houlim aneina ah, "KNO noiyin Designated Camp 5 ana kiseiyin Camp 5 lah ahin 4 suhchen na akineiyin Lhakao 2009 lha kichai lam a patchun Chandel District, Sadal hill District, Churachandpur District hoa Designated Camp sah akipan in ahi. Hicheho lah ahin Salem Camp hi aki joutheng tobang hita jongle akithenso lah ahin ani channa ahi tan 1st Battalion Kuki Army Camp chu Hermon Camp akiti in Chandel District Chehlep gamsung'a ana kisa in Lhalui chun thenso nakin ana kinei tai atin ahi. Salem kiti hi Gen,14:18 ah Salem kiti min chu kiladoh ahin, Jerusalem min masa chu Salem ana hin, Salem hin Chamna ati na ahitoh lhonna hiche Camp hi Chamna Camp (PEACE) jong kiti ding ahi ati.
Hiche Camp kisah na dinga Mongbung pan agamsung itlou hel'a nam ngailut najal a aphal jeh in ama chungía
KNO thakhel in kipathu aseiyin ahi. Kuki Army mi 200 chan umdi ahitoh kilhona gamsunga mipin thule la aki
thopi cheh dingjong temna neiyin ahi.
Pu Henneihao Khongsai Kuki innpi Churachandpur in houlim aneinah achun, "Salem Camp mun'a Kuki Army
ho kikhop khom nadiu, Pathen avah choi nadiu Hou inn akinthei lam a Lamkai hon asah doh diu vin lamkaiho henga temna aneiye. Chuleh hiche Salem Camp hi chamna Camp ahintoh lhonna Chamna aum ding jehin agamkai mipi ho adin Vangphat na um hen tin aphongdoh in ahi.
Lamkai kitihi Pathen hin gon ahin Lamkai hi ija bol uva le Pathen jabol ihidiu Chuteng le Kuki Namsung dam intin ilungtup u lolhing ding ahi, chukitleh Kuki Army honjong Lamkai ho jabol'a Chamna lampi ajotdiu vinjong temna aneiye.
SP CCPur lhakhat suti hita
Lamka, Lhajing. 18: Achesa Lhamul nisim 18 nikhoa patsa Superintendent of Police, Churachandpur a pang GB Sharma in earned leave analah chu tunichan geiyin atouna munah melmu in aum naipoi ti thulhut akimun ahi. Hiche thutoh kilhonchun SP office a natongho a konna thujah kinei dungjuiyin SP suti hi Lhajing nisim 24 chan hidin aseiyin hinlah hiche nikho khel-a alah beding thujong asei nalaiyin ahi. CCPur a SP umlou sunga hi N. Manimohan Singh, ASP, CCpur in athakhel jing ahi.
Don Bosco simlai in khatna la
Lamka, Lhajing. 18: ZEO/CCpur noiya Science Unit ho panlah nachun nidan 11:00 vei in YPA Hall, Hiangtam Lamka mun ah District Level Students Science Seminar, 2010 kiti thugol noiyin hetgilna nei kitetna aumin ahi. Hiche kin ahin school chom chom a patsan simlaihon kitetna anei uvin ahi. Hiche kitetna a pang dinga school 7 holah a hungkalsong mi 14 sungchun Don Bosco High School a simlai Mr. Ishore Chandra in akhatna alan chule aban in St. Mary a kai Mr. P Shrada Sharma chun anina alan ahi. amateni chungah cash award, certificate chule memento jong agonpeh uvin ahi.
Amateni ban ah mi 4 chu consolation prize jong pehdohna anei uvin ahi. Hiche hetgilna kitetna a pachanna neiho hi ahung lhungding Lhajing nisim 28, 2010 nikho tengle Imphal khopi muna State Level competition dinga kalson na aneidiu ahi.
CCPur CMO in hetsahna nei
Lamka, Lhajing. 18: Phat tampi chejou nung hitama jongleh tuni chan a Henglep sub-division, Churachandpur district sung a Chief Medical OFficer, Churachandpur noiya natong hon aduty lhah namun hoa alhunlou jeh un thulhut akimun ahi. hiche thutoh kilhon in Dr. Singkhozam Hauzel, CMO, Churachandpur in Henglep Sub-division sung a CMO/ CCpur noiya natoh namun kipehon tulha kichai masang ngeiya atohmun cheh akijot diuvin hetsahna aneiyin ahi.
