.jpg)
Sadar Hills, Lhamul. 31: Achesa nisim 28 jan'a IT Road Bazar Kangpokpi mun'a meijin inn ana kah lhah peh hodin Kangpokpi Town Committee, Kangpokpi Women Welfare Organisation le Kangpokpi Youth Union in khojol sunga aveng avengíin kithopina din thil le lo, nih chen ponsil, neh le chah chule sum le pai hijongle ana dong'un adondoh kham khamíu chu nisim 31st nidan 3:00 donin Kangpokpi Women Welfare Organisation office mun'a hopdoh na kin ana neijun ahi.
Hiche kin ahin Additional Deputy Commisioner Kangpokpi, Major 36 Assam Rifles Kangpokpi Post a thalheng khat chule OC Kangpokpi Police Station ho jong apangun ahi.
Kangpokpi Town Committee Secretary Pu Chonkam Kipgen in kithopina thil adondoh hou kichentah'a aphondoh to lhonin hiche ni janía thilsoh chung'a pan laho adeh a 36 Assam Rifles, Kangpokpi Police ho chung'a kipathu aphonginahi. Aman aseibena'a toset toh hohi atamjo kol le vai ahiuvin hijongle jat le nam khenlouva khotona neitah'a khopi sung'a cheng jouse pumkhat thakhat'a akigel toh lhonin amaho din KWWO le KYU ho kitho in kithopina lamchom cheh in ana kidongin ahi. Amavang toset toh hon khopho lou vin media ho ang'a ei kikhohsah poi ana tiuvin phamo akisalheh jengin ahi ati. Hijongle hiche ho chun kho chaga kingailutna asu dai joudeh poi tin aseije. Pu Chonkam in lamchom chom'a kithopina hinpe business bolho, khosung mite chule adang dang ho jouse chungía kipana sei joulou aphongin ahi.
Aman aseibe na ah, kijahtona lhahsam jehíin thudih louvin eihung kisosal kha jongleu khosung khangthah, minu-te chule mipin lunglha louva ngailutna lampia kholhah jingíu hitin thase louvin pan lajingíute tin tilkhouna jong aneijin ahi.
Hiche thilsoh chunga toset toh ho lhamon nale vangthumpeh na kin Pu Ngulkholam Haokip, Advisor Kangpokpi Town Committee in Pathen heng'a aneijin ahi. Aman houlim aneina achun, "kithopina thilpeh hi meijin akah lhah ho jouse jat chu ahipoi hijongle tosetna toh hon hiche thilpeh hi ngailut chuleh jat le nam khentum umlouva khojol sunga cheng jouse ngailutna kibanga kingailu ahiti hetnah'a nakisan cheh diu ahií tin tosetna neiho hengah temna aneijin ahi.
Alangkhat ah nihchen ponsil, thil le lo neh le chah tilouvin asum'a kihomdoh chu dangka 71,400 ahi tin Pu Chonkam Kipgen in aseijin ahi. ADC Kangpokpi in jong tosetna toh ho sum'a kithopina aneijin angailutna thu jong aphongdoh in ahi.
Hitobang'a jat le nam khentum umlouva khojol sunga cheng kho chaga genthei hahsat nia khohsah thei le lungpi kengthei khopi ineiíuhi kithang atpi thei tah le kineppi umtah khat ahi naban'a tuchung'a Kangpokpi Town Committee lamkaina'a KWWO le KYU natoh ho Kuki chate khosahna mun tampia kihilna thei tah khat in umin ahi.
Town Commitee, Youth leh Women hon hilchenna nei u
Sadar Hills, Lhamul. 31: Nisim 30 nia Gosem News front page a hung kiso Kangpokpi Inka ho KUTC chunga lungkim lou kiti chu, Dukan dar ho phabep in Town Committee ho leh Youth ban a Women hon ichan geija amaho akithopiu ham ti hepha louva moh penpen ahiuve, tin Town Committee Secretary Pu Chonkam Kipgen in Gosem News koma thulhut anei jin ahi. Aman aseibe na achun, Meikah nilhah chun Towm Committe Women leh Youth in nasa tah in akiboi pin, chuleh jan injong agena/atouna diu jeh in ihmu thei louvin jansot geiyin aki gim'in, chuleh Relief Camp dingin Community Hall akigon peh in, hinlah khatcha kailut jouvin aumpouve ati.
Hiche thudih lou Gosem News a hung kiso thua 'ipijeh a thuso dinghon naso masang uva thunei vaihom ho toh kihe tolouva thu namoh sosou ham' tin Towm Committee Chairman Pu Lalsat Haokip in Town Committee lungnop mona thuphon aneijin ahi. Secretary pun aseibe na achun, Town Committee ho tohgon na noiya Kangpokpi Women ho makai nan Kpi Ward jouse a In kaho kithopi na dingin thil lelo donkhom na akinei jin, mipin jong ngailut nanei tah in thil lelo sumle pai jin kithopina apeovin, chuban in Dukan jouse a Anchang Chini havai ata, sil le chen janpon geijin akidongin, hiche ho thah le a pole dingin 36th AR Post Commander pa makai nan a Javan hotoh agariu ahin tohdoh un, Inka family 17 Ieh mei kah chalbe ding venna a In kisuse family 12 ho chu taona akimanpeh tohlhon in mi phabep kithopina ho pehdoh na ana kinei jin, aban jong 31st nikho ahi kihom kit ding ahi ati. Hiche na chunga 36th AR Post Commander leh a javan ho chunga Town Committee in nasatah in kipa thu aseijun, chuleh khosung mipin jong hongphal tah a anei agou ahin todoh nao chunga jong kipathu aphong uvin ahi.
KTC Secretary in Gosem News ahetsah na a chun, Inkah nilhah chun akah nasa behseh jengin amasa
pen in Electrict bullam aki thasah in. Youth ho akikou khomin bolthei chan akibolin, chubana Kangpokpi a um Fire Brigade in alel phat in Senapati Fire Brigade akikou kit in ahi.
Vangset umtah in Senapati langa chun firing a kon mei hung kadoh a ajah jeh un, ahung ngampouvin, hinlah Senapati Town Committee koma akisei jin akilunghan leo phat in ahinsol un, chuti lou hileh meikah chun hiche sanga asuhset joh ding ahi ati. Fire Brigade ni akitho bana khosung Youth hon meiphel mit natei ding angaito nao chungchon a 36th AR ho akon meiphel na Fire extinguisher ahin podoh kit un, mitin in hiche Inkah chungchanga thildang boipi theilou khopa genthei a thoh in ahi. Hiche goh chu hilou vin, Inphel a pang golhang phabep jong ana kisu khaovin ahi. Hiche ho he louvin inka hon ama motmot in akhong uve, ati.
Kangpokpi Town Committee in thuphon khao tahkhat anei naova chun; Kangpokpi Bazar hop sunga koiman thao (petrol, Diesel) ajoh thei louding, koitobang ajoh akimat leh nasatah a gotna kipe ding ahitin, KTC Secy chun Gosem thuso ahetsah e.
KSO-Henglep hon Sub-division hopsungaMDC kaidoh ho kipapiu
Lamka, Lhamul 31: Kuki Students' Organisation (KSO) Henglep Sub-Division hon Pu. Demmang Vice Chairman, Autonomous District Council inn mun achun Henglep Assembly Consituency noiya MDC kilhengdoh ho kipapi nakin anei piu vin ahi. Hiche kingon a hunglha MDC kaidoh hochu ahile Pu Thangmang Haokip MDC 1 Khousabung ADCC, Pu Demmang Haokip MDC 2-Leimata ADCC, Pu Paolal Haokip MDC 3-Henglep ADCC, Pu Genneikhup Vaiphei MDC 4- Chongkhojou ADCC ho ahiuve. KSO Henglep hon MDC ho komchun Education Policy Copy khat cheh apeuvin ahi.
