Amaho lungel hi achung langa hung kipatna anoi langa hungchal suhding atiu ahin, ahithei dinga kilomtah chu ahinai. Ahin, veleu hen Manipur in state amu a patna mi ijat MLA/Minister ineiju hitam, saplentah tah ijat ineikhah u hitam chuleh, thingnoi mijong inei naohi kum tampi ahitan, inam boinao asemphatdom uva kilang nasah em? Angaibep ahi itilou jongleh akhohcheh cheh bouve tithei ahi.
MLA, saplen chuleh thingnoi lamkai ho jonghi oimothei ahinai, hijongleh nangle kei kikaidoh jongleh gamle nam ngailu mong-mong ihilouleh angaibep kihibou vinte. Ajehchu "power" kitihi atuh khapen penhi kaotomto bangji a nampi dinga tupna sangtah neilouho dinga ama sakhao asuhdimding tilou adang umtheilou ahi. Ahileh, nampi boina hi itiba semphat ding hitam?
Nampi semphtana dinghin Mahatma Gandhi in "National Cleanliness Dayí toh kisaija anasei - mijousen aleitol cheh kitheh ngimleh vannoi leiset hi ngimtante, atihi kimang theileh phalheh dingin katah sanne. Ilah uva lekhathem, sorkar natohna nei, sumkol veina langa lolhingho chuleh lampi dang danga amithei hohin insungmi thumle libeh hi semdoh ding goleuhen ichan geija nam sunga innchen khangtou ding hitam. Insungmi katihi phungle chang ikibahpi hilouva sungkhatna ipen bompi ulenao katinajoh ahi. Amithei khatchun ipenpi mithumbeh semdoh sohkei leuhen inam piu economy hi go ajuh jouva hampa hungnou dohkhu bangjeng inte. Abolthei jin abolmo kitosotje hi ikijil masang seuvin nampi economy semhoi dinghi gamla jinginte. Pathen thudih a ihoulou uhi achom in kikoi tadileh, nampi boina ajeh penhi ivaichat jeh u ahi. Vaichatjeh in school hoija kaijou atampon, sorkar school jenga kaijoulou jong atamíe. Thingnoija lut ing kating phat chomkhat ding hijongleh mihaoho bangin hinkho mang ing kate tia lungjatna neijong kitam inte. Inchen akisuhlou teng lehin eisempa Pathen jong kihou joulou ahi. Ikinepna bang uva achung langa konna semphat ihitahlou uleh, mijouse hin pan lau hitin anoilanga kon in inam piuhi machal tousah gouhite. Hichi tailouhi lampidang umlouvin akilange.
Tulaihin khangthah lekhathem loikhat hin nampi boinahi akhol uleh amudoh uchu lamkai luihojeh ahin, alungel u "outdated" ahitan, kitona ding hilouva kilhekhen nadingjoh lungel akeng uve atiuve. Nampi isemphat nomleh amasa penna lamkai luihohi khangthah hon ikheldiu angaije tin lungput anei uve.
Lamkai luihochu lekha athem pouve itiuleh ichangei ham khat in dihnante ahinlah, lamkai hina dinga akhoh penchu lekhathep ahipoi, lamkai luiho banga nampi dinga kipedoh a natong iumnah uvem? 1992 kum vel'a Naga ten nojamding tia eigotlai uva thiding ginglou khopma kho kihal naho del lutna a-in kihal lhaho nehding geija ngaito pehchu lamkai luiho ahiuvin, khopi munthupi a um khangdong lekhathem hon ipi inaboldoh uvem? Gah tahlang thei ana umkhah jongleh tamponte. Lamkai luiho nung mipin akijui nahi atohgimnao leh akipehdoh dan uhi ivet teng nampi ngailutna nei ahiuvin, athusei uhi mitsingin kijui jongleh kokhuh in eipuilut ponte tia akitahsan jeh ahi.
Lamkai lui hohi kheldoh dingin phuhih jong leuhen ichan geipi eilamkai jou nahlai diuham? Hiteng lechun, inop ida kibanga lamkai dinmun chu tunia khangthah hohin ihinlah diuma ahitai. Hijeh chun, lamkai luiho kheltaote tisangin tunia khangthah hohi nampi lamkai dinga ikigotnu hinam tijoh hi ihasei diuvin dei aumme. Ajehchu, vaicha-genthei Kuki te chunga lamkai dingchun mipi hahsatna leh gentheina a ihahsat hu uva igenthei hudiu angaije.
Hitengle bouchun japihin amahi nampi ngailu ahin anung juithei ahinai tia eihingel bepdiu ahibouve. Chuti louva lekha ithep manía lamkaija pang ihi a nomtah a itouna munía konía Kuki techu hitiding khatiding tia isei mai-maichu kon eingaipeh dingham? Changvailah a jun kitha bangbep hinte.
