Naga simlai kiloi khomhon NH-39 a ni 68 jen economic blockade aboljou uva Manipur transporters hon NH-39 boycott abolkitjeh un nitin ngaichat ho akimujou tapon mipin hahsatna sangtah atohtai. Thil akimuho jong aman asang val in milhamho chohjou dingdol ahitapoi. Thao hahsat hi boina lenpen ahi.
Ni 2 umdinga hung Central team hohin boina sulham dinga hung kahiuve tin aseijun ahi. Ahunglhun jouvun Central team hohin chief minister, O. Ibobi Singh nidan 4 tobang state boinaho akihoulim piuve. Hichi kimutona a hin chief secretary, cabinet minister ho, state force leh Army langa saplen hojong ajao uve. Central team hin Manipur Governor jong akimupi uve.
Central team hin adihtah hetdoh theina dinga michom chom akimupidiu ahi. State sunga bandh kikou jingleh National Hinghway a blockade umjing thuhi Central team hohin state sorkar toh Pathen nileh asei khomdiu ahi tin tahsan theitah thulhut akimu e. NH-53 a natoh gangtah a akichaithei nadinga Central team hin mopohna nei vaihomho komía atoh dingu aseipehdiu ahi.
AMWJU in demna nasatah nei
Imphal, Lhamul 31 : Achesa nikho a COPTAM ten kiphinna anei nauva konna Phougakchao a cheng mipi phapeb in boina asem nabanía CDSU lamkai ho chan gei chunga khutlhana aneilai pet tah a Gosem correspondent Mr. Lalboi Gangte in Video Camera alah lung han pi jeh ah asosalna chungthu achun AMWJU hon nasatah in demna thu aphong uvin ahi. Thuphon anei nauva chun hiche thilsoh chung'a hin demna sangtah apeuvin chuleh hitobang'a khut lhana neiho chu akin theipen'a gotna chansah ding aphong uvin ahi. Chukit leh hiche thu a kiphinna aumding ahileh AMWJU in tosotna kinei ding ahi tin thuphon ahin nei uvin ahi.
Manipur dalha taovin tin RPF hon kolho thupeh neikit
Imphal, Lhamul 31(NNN): Manipur sunga um gampammi kol-ho kom achun phaitolmi galguh bolho Revolutionary People's Front (RPF) hon chedoh taovin atiuchu avel in hetsahna nakhat Misemni chun ahung gingdoh kit-e. RPF hohin Manipur sunga kol-ho chunga thil phalou ahung soleh keiho eithep mosah theilou diu ahi atiuve.
Kol-ho kom a Manipur adalhah na diuva phat kitep pih hi Lhaphul nisim 31 a chu kichaija ahitan hijongleh RPF hohin kolho Ellha nisim 15, 1949 masanga Manipur hunglut ho chun RPF "Bureau 1 leh Bureau 2" noija Ellha nisim 14, 2010 masang ngeija register akibol diuvin hetsahna apeuve.
RPF hohin kol-ho hi India sorkar in Manipur colonise boldinga ahinsol ahi atiuve. Keiho mopohna chu India agent ho suhbei dinghi ahi. RPF hin kol-ho huhna dinga pan lahochu agih un ahi. Hetding khatchu Manipur a konna kol nodoh ding kitihi thilthah ahipoi. Kum phabep sunghin Manipur sungah kolho adeh a natohneo tongho tampi athatnun ahi. Kol tampihin tu masang chun Manipur adalha taove.
KSCWFM kholjin ho vailhun nakin lolhing tah a kimang
Imphal, Lhamul 31 :Kuki Senior Citizens Welfare Forum, Manipur (KSCWFM) member ho in achesa Lhatun nisim 19 apat 22, 2010 chun ipu ipa gal hang ho KUKI Independence (1917- 1919) delna a British hon ana mat uva Sadiya (Assam) tuikul a anahen nau mun chu ana vil uvin ahi. Amaho vailhun nachu tunin Kuki In ah Pu Thangkholun Haokip, Chandel A/C, Jin-gun hina in thupitah leh kilomtah in akimang in ahi. Jin-gun, Pu Thangkholun Haokip in ahung kikhom mipi ho koma'a tilkhou nathu aseiyin chuleh kithopina jong apeh jeh in KSCWFM in ama chung'a kipathu aphong uvin ahi. Kin kichai chun mipi hon cha donkhom najong anei uvin ahi.
KSCWFM member tunia hung lhathei lou ho koma hetsah khat chu aban meeting kit teng leh thon louva hung pang cheh ding in General Secretary, KSCWFM, Pu Pahend Hangshing in temna ahin neiyin ahi.
VDF screening test um ding
Imphal, Lhamul 31 : Bishnupur District hopsung'a Village Defense Force (VDF) final Screening/ Physical Verification/ Viva Voce chu District Police Headquarters, Bishnupur mun'a Lhajing nisim 2 apat 7 changei nidan 8:00 seh leh um ding ahi.
Bishnupur District Police akon thulhut kimu dung juiyin Ellha 22-29, 2009 Mini Stadium, Bishnupur mun'a Physical Efficiency test (PET) anachai sa ho jouse chun interview/test le adang dang dingin anoiya kipe nikho hoa thon louva pang dingin hetsahna ahin neiye. Lhajing (Aug) 2, Chest No.1-800, Lhajing 3, Chest No.801-1600, Lhajing 4, Chest No.1601-2400, Lhajing 5, Chest No.2401-3200, Lhajing 6, Chest No.3201-4000 chuleh Lhajing 7, Chest No.4001-4670 dungjuiya hungcheh diuva hetsahna jong aneiyun ahi.
