Commission hin chief minister Lal Thanhawla kom'a Gansemni a chu report apehlut ahi. Lal Thanhawla hin Commission chairman Prof. A K Sharma leh atoh khompi aloi mi somho komchun lha 11 sunga Mizoram sunga education semhoina ding report ahinpehlut theijeh uhin kipathu aseijin, hichi report hi Prime Minister leh UPA Chairperson kom'a kipeding ahi tin aseije.
Commission hin jilkung training neiho bou lahding sorkar jonghin jilkung training neilou hochu alahtah loudiuvin adeisahnao aseijui. Higher education semphatna ding hin education budget 20% hi infrastructure semhoina a man dingin pha asai. Sorkar in achelhahpi Special Voluntary Retirement Scheme (VRS) hi thepna neilou jilkung hon alah diuvin adeijin chuleh, jilkung athepnan tohlou hochun Open & Distance Learning (OLD) beh hi aboldiuvin aseije. Commission hin Fee kilahdan, jilkung kilahdan, state sunga private school hoa jilkung ho natohdan hi kholchen ding adeije.
Commission hin Industrial Training Institute (ITI), Polytechnics leh Mizo khangthah ho dinga Community College phudoh ding adeidan aseije. Vocational education school, Kendriya Vidyalayas, Jowahar Navodaya Vidyalayas, Sainik School , Sports school honbe dingin pha asan ahi. School leh college jilkung ho training/seminar pehna dinga state sorkar hin dangka 50 lakhs beh akoidoh din Commission hin adeije. Commission Chairman pahin thil tampi - education quality, school hai suhlhom ding, min achanga natoh amunathei dinga vocational education hi manchah a natoh thepje (skill) jilsah ding, pao khantou sahding tihohi report a hin akijaosah e tin aseije.
