Hiroshima a "Little Boy" kilhah :
Lhajing 6, 1945 Sempatni (mon) jingkah lam nidan 2:45 chun Bock's Car kiti B-29 bomber Enola Gay chu North Pacific a Marianas twikol gam Tinian apat ahung kipat doh in ahi. Hikom mun hi South Japan akon 1,500 miles a gamla ahi. Hiche galsat huikong chu Commander Frederick Bock min kila a Bock's Car tia kiminvo ahi. Hinla pilot Colonel Paul Tibbets in hiche B-29 bomber chu anu min "Enola Gay" asah in alendoh ding kon chun huikong achun anu min ana jih uvin ahi. Hiche bomber a tou mi 12 ho chun hiche secret mission hi phatah leh lolhing sel'a aum ding angaito uvin ahi.
Enola Gay chu B-29 Superfortress (aircraft 4486292) ahin 509th Composite Group lah a pang
ahi. Atomic bomb gih tah apoh thei na dingin Enola Gay chu semphat in aum in - propellers thah, engine thanei tah chuleh bomb alhah nading kot jong akisem pha in ahi. Enola Gay akipat doh masangin kho aphat leh phat lou hechan dingin huikong 3 ana kisol doh masa in ahi.
Kho umdan (weather condition) aphat toh lhon in Enola Gay chu akipat doh in chuleh huikong 2 chun phatah in venbitna aneiyin ahi. Huikong teni chun camera leh thil tena (measuring devices) tampi jong
apo lhon in ahi.
Enola Gay huikong sunga chun "Little Boy" kiti 10 feet a sao atomic bomb chu apo in ahi. 'Manhattan project' a Ordnance Division a lamkai chuleh Navy captain Willaim S Parsons chu Enola Gay a gal manchah lam'a hetna nei in apang in ahi. Enola Gay chu 15 minutes tobang alen jouvin (3:00 am) Parsons chun atomic bomb chu gotsa in akopi pantai. Hiche agontup le na achun 15 minutes alut in ahi. Parsons in "Little Boy" ase lhah masang chun hitin aseiye, 'Japan miten hitobang gentheina ato ding kahen hinla keiman lainatna neocha jong kanei poi' ati.
"Little Boy" chu radioactive isotope tichu Uranium-235 akon'a kisem doh ahi. Hiche Uranium-235 atomic bomb chu dangka $ 2 billion lutna kholgilna (research) aum nunga kisemdoh anahiye. Hiche
atomic bomb hi masanga jong patepna ana um khalou chuban ah huikong apat ana kilha khalou ahi. Hiche jeh chun Japan mite kom'a gihna akibol masapoi tin scientist ho leh politician phabep in alungnop lounau aphong un ahi.
"Little Boy" lhahna ding chun khopi 4 jen ana kilheng doh in hiche khopi ho chu Hiroshima, Kokura,
Nagasaki leh Niigata ahiuve. Ahin deilhen masapen a ana um chu Kyoto khopi ahin hinlah Secretary of War Henry L Stimson in ana phatsah lou ahi. Hiche khopi ho akilhen dohna ajeh pen tah chu gal kibol chu hiche khopi ho hin ahet phah/atoh khah behset lou u ahi. Target Committee chun bomb masapen kilhah ding chu lolhing tah ahi nadin pan alauve ajeh chu vanooi pumpi in akiphon doh masanga hiche bomb thupi dan ahet thei na diuva alolhin tei ding chu akinep nau ahi.
Lhajing 6, 1945 nikho chun target masapen Hiroshima khopi chu kho umdan (weather condition) athengselíin jingkah lam 8:15 (local time) chun Enola Gay galsat huikong chun akot ahong in "Little Boy" chu alhah tan ahi. Hiroshima khopi chung lam 1,900 feet a bomb chu apohkeh in ahi. Hinla adoi pipen tah Aioi Bridge chu 800 feet lam in bomb chu achu khelíin ahi. "Little Boy" apokeh jouvin meilom akitung jengin khopi sunga thil um jouse akavam soh hel'in chuleh meilom chu "papah" (mushroom) bangin aum in 40,000 feet chunglam geiyin meilom chu aum'e akiti.
Feet 10 a sao "Little Boy" chun Hiroshima khopi hop thum ah hop ni tobang asuse in chuleh insong 90,000 lah a 60,000 val asuse in ahi. Bomb pokeh na mun apat mile 3 sunga thil um jouse jong asesoh hel'in ahi. Numei-chapang tilouvin jong sepai tampi athi in ahi. Hiche pet a Hiroshima a mihing (population) jat chu 350,000 vel ahin hiche lah achun mihem 70,000 tobang chu apet pet in athi in, kum 5 sungin atomic radiation (vah thahatna) jeh in mi 70,000 val athi kit nalaiye.
Nagasaki a "Fat Man" kilhah :
Hiroshima a bomb kilhah hesoh-genthei athoh u kichai lou laiyin United States in atomic bomb ani
channa lhah dingin kigotna anei pan kit tauve. Ajeh chu hichan geiya amiten genthei na leh thinba-manna ato vangin Japan chu gal a kipehlut (surrender) kibol ding nom lou lai ahi. Hiche jeh chun Lhajing 9, 1945 jingkah 3:49 chun B-29 Bock's Car chu Tinian base akoníin ana kipat doh kit tai.
Tuchungía deilhen na mun chu Kokura khopi ahin, hinla hiche nia Kokura a mei akai jeh in target
mun tah a bomb chuh sah ding ahahsat jeh in aban'a deilhen nachu Nagasaki khopia bomb lhah ding chun akiphat sah tauve. Vailang nidan 11:02 (local time) in atomic bomb "Fat Man" chu Nagasaki khopi ah ana lhakit tauve. Khopi chunglam 1,650 feet vel'in bomb chu apohkeh in Nagasaki khopi a thil ima 40'percent tobang asuse in ahi.
Nagasaki a mipi ho dinga vangphat umtah khat chu Hiroshima bomb sanga thahat jo ahi vangin Nagasaki khopi ah mol-le-lhang aum jeh in thil aha suhset jou poi. Hinla Nagasaki khopi a cheng
270,000 lah a mihem 70,000 tobang chu kum kichai lam in athi un ahi. Hiroshima a chu Uranium-235 atomic bomb ahin hinla Nagasaki a kilhah chu Plutonium-239 atomic bomb thahat jo cheh ahi.
