Jiribam khohi Assam toh gamgi Manipur sunga um ahi. Gari 60 vel CRPF ho venna noiya Manipur ahung lhung in gari 127 tobang chu NH-39 lang mama jonin anchang po-din akitolkit e. Gamsungin angaichatval tah jeh in NH-39 boina jeh'a che ngamlou truck driver hochu gamsung security venbit nanoiya soldoh ahi tauve.
Transporters and Drivers Council (TDC) hon ana seisa banguvin Imphal-Dimapur lampi jah tah loudi atiuchu avelin phondohna aneikit uve. Amahon mipi holeh lamkai ho koma angeh uchu NH-39 a engbolna leh sum demand ajoh sah jengjeh uvahi NH-53 joh gamsunga dia hinna lampi tichu nehding holeh mandingho pohnan kisem dohle tihi akithulhuh nau pipen chu ahie.
India Zalen nikho suhboina dinga Manchah kisel kimudoh
Imphal, Lhajing 05: India zalenna 64th channa (Independence Day) nikho anaito kilhon in Security Force hojong chingthei tah a agamcha nauva konin nisim 4 nichun Bishnupur district sunga pansa Red Shield Division hon bomb semnadia manchah (explosive material) phasahbep amandoh uve ti thulhut akimun ahi.
39 Assam Rifles leh 33 Assam Rifles hon joint combing operation Wangthalambi khoa abol nauva hiche thil manchah hohi amadoh uh ahi tin thuso akimun ahi. Hiche manchah hohi, leinoi apat alaidoh uh ahi. Phaicham thingnoimi hon aphum uh hidia ginchat ahi.
Hiche manchah hohi leinoi feet 2 tobang thuh'a akivuina akona Security Force hon alaidoh uh ahi. Plastic bawm 8 tobang jong Bunglushi kho muna ana mudoh uvin ahi. Security Force hon bomb semna dia athil mat hojouseu Police te khutna pehlutna jong ana nei pai pai uvin ahi.
Manipur palaiho kilemlouding ahi; UNC
Imphal, Lhajing, 5 (NNN): Manipur sorkar in kiphin nanei United Naga Council (UNC) lamkai hotoh kimuto dinga Minister ho phabep nisim 6 nilehSenapati mun asolding tia akihagon laitah in, UNC hon
Manipur sorkartoh kijopmat lou ahitah jeh uvin kihoumatna ding thu aumpoi tin tunichun phondohna anei taovin ahi. Achesa Lhajing nisim 4 nikhoa chu Manipur sorkar in Naga lamkai hotoh akiphin nao thuho seikhom dinga Mantri phabep sorkar thalhenga Senapati a solding tia Cabinet in thulhuhna ananei ahi. Hinlah alangkhat a UNC in akiphinnao thua hi Central sorkar joh in kihoutohna ding pan
ahinlah johding in angeh uvin ahi.
'Autonomous District Council (ADC) thua UNC ho toh Senapati headquarters a Dy. Commissioner pa office munna kimuto dinga Manipur Govt. in Mantri phabep ho solding tohgon aneiyuve ti thuhi thupo mi ho a konin kajauvin ahi. Hijehchun UNC in adinmun kichentah a aphondoh kit angaijin hichu ahileh, tumasanga ADC Election kibolchu 'null and void' (lahlou) ahi tia ana phondohsa ahitan, Manipur sorkar toh ADC thu him him a hi kihoulim khomna kanei loudiu ahi', tin UNC hon tunichun aseiyun ahi.
UNC in aseibe nah achun, tutu a Manipur state a cheng Naga hon adinmun uhi khel theilou hel thutah a Pansatna khat anei uchu ahileh, hitobang hunam leh jat le nam khentumna neiya vaihom Manipur sorkar noiyahin ahinkhou, agam aleiyu, khangluiya pat akivaipohnao chonchan khanchan ho jouse hi
avenbit joulou diu ahitai tihi kichentah in aheuvin ahi. Chuleh masanga pat tuni chan geiya aitih a Manipur sorkar in Naga te amihi naoleh ja um ahinaho khatcha cha hetpeh nale jana aneipon ahi. Hijeh a chu, Manipur sunga dinga Naga te kiloi khomna sangpen le thunei pen the Naga Peoplesí Convention (NPC) in achesa Lhamul nisim 1, 2010 nikhoa chu Manipur sorkartoh kihou matna lampi jouse asuhbeiya Govt. of India in akikah uva kikumnaleh thutan na aneiya lampi dang agonpeh diuvin deisahna ananei tan ahi.
'Naga ten Manipur sorkar toh, gamvai pohna thudol a, kihou matna jouse asuhbei tahjeh uvin, Govt. of India in akikah uva kikumna aneiya lampi dang agonpeh diuva ngehna aneitah jeh in, Manipur sorkar athalheng a hung dinga kigong ho kilemlou ding ahi' tin UNC in aphongdoh tan ahi.
