Hivachun Pu Khamliankhup Secy. Zomi Council in CoPTAM le CDSU in khonung a District khankho ding gelkhoh najal a nasatah a pan ahinlah naho chungahhin Zomi Council in kakipapi lheh uvin chule katosot diu ahi tin aseiphong in ahi. Aman aseibe na ah, "CCPur District sunga hin MLA Minister mi 6 inei un tu'a District boina chungthu asuh thipdiu tahsang a akimu mosah uva COPTAM le CDSU in District boina chungthu asei uhi MLA Minister inei hohin ipi abol u ham? District boina hi japi boina ahin, boinaho seitoh dingle suthip dinga Churachandpur gamsung'a MLA Minister a kitung doh u hilou ham? tin aseiyin ahi.
MLA le Minister hon tuchung boina kihetmo sah a atoh diu kimu mosah a aum uhi demna chung nung pen kapeu vin ahi. Chuleh District Incharge T. Phungzathang le MLA, MDC hon District Boundary boina le adang dang ho akin theilam a amopoh naho uva pan alah uva asuhthip loi diuvin hetsah na anei jin ahi.
COPTAM a Chairman Pu Letpu Haokip in houlim aneina ah, "Churachandpur District boina a MLA Minister hon Manipur Assembly muna kamkhat chajong boinathu sei ngam aum povin, asei diu abol diu jouse gamsung adia kibol ahin nisim 10 masang'a District boina chungthu hi CCPur MLA Minister le Hill Area Chairman hon seikhom louva nahsah moa akoi ule ama ho chungthu kisei khom ding chuleh seichetna um ding ahií tin hetsahna aneiye. Pu Paozagin in ahoulim nah achun, Churachandpur District Gamgi chungchang thu hi District MLA, Minister holeh MDC inei hohin asei khom diu amopoh naho atoh cheh uva kihetmo sah aumlou diu ahi atin chule CDSU le COPTAM hin maban toh-gon ho achepi jingdin aphatsah dan aphong doh in ahi. ZRO hoa kon na thalheng hon COPTAM le CDSU in igam'u huhdoh nadia pan alah nachung'a kakipa nao kaphon doh uve chukitleh hahsat najouse a kithopi a kitosot ding ahi tinjong aseibei. Chuma bangchun UKRA thalheng a hunghon jong 2011 Census Overlapping, District Boundary le Land Revenue chungthu ahin KOM nam mite chen na 90% asukha in Keiho KOM mihon jong CDSU le CoPTAM natoh hi kapom uvin kakipa piuvin kapen nao Thinglhang gam Kapu kapa chenna gam hi huh doh nadia thisan phal ngam a kapan diu CDSU le CoPTAM natoh jouse kithopi na kapih jing diu ahi tin aphong in ahi.
USRA a kon na thalheng in houlim aneina achun hiche thilsoh chung'a hin kithopina kipe jingding ahi tin aphongdoh kit in ahi. Kuki Inpi CCPur le Hmar Inpui injong CDSU le COPTAM te thilbol akipapiuvin maban panlah nahoa atosot toupeh diuvin jong aphong uvin ahi.
Alangkhatah hiche boina thua ipi jeh a SP incharge popa ASP chun CCPur District sunga thilsoh hi Moirang Police ho khutna apehlut ham? Akin thei pen na ASP pahi Dist. Munchom a soldoh dingin kihounah achun apodoh uvin ahi.
Bunglon khoa PHSC hondohna kin umding
CCPur, Lhajing. 5: Ahung lhung ding Lhajing 7, 2010 nikho tengle Bunglon khoa Primary Health Sub Centre, PHSC hondohna kingon umding ahi. Hiche kin-gon a chu Pu P.Parijat Singh, Minister Health & Family Welfare chu Chief Guest a pangding ahin Pu T.Manga Vaiphei, MLA leh Dr. Singkhozam Hauzel, Chief Medical Officer, Churachandpur chu guest of Honour a pang lhon ding ahi.
CCPur sunga kol-ho ventup a umjing
Lamka, Lhajing 5: Achesa 1949 kum jouva patsa Manipur gam sung'a hung cheng Non-Manipuri ho phaicham galguh bol RPF loihon Ellha 2010 nisim 15 masang a Manipur gamsung dalhah nadinga thupeh anei utoh kilhon in Churachanpur a cheng kol-ho ventup ahijing nadin Pu Lunkhomang Khongsai MPS SDPO/Churachandpu makainan Rengkai,Tipaimukh Road, Lanva, Khomoi, Kangvai mun hoa cheng kol-ho agavelha jing uvin ahi. Ahithei channna CCPur District sunga chengho venbit ahijing nadin panlahna anei uvin ahi.
