Eimi tamchenna Sadar hills leh chandel district sung aboncha tobanga education ahoipoi tihi mijouse het ahi. Mijousen quality education isei sei vangun quality education umsah tah beh ding ideilou u ahibouve. Lhangphong tah a themvetna ho a guhchat kibol, open tah a copy kibol a koima aphohding umlou, aphoh ding beihel'a mijousen thanom tah le kithutoh tah a ibol jingu chu mijousen ihet lou u ahipon ahoilou aphatlou ihetsoh keiju ahin ahivanga thanom tah a pan ilah soh keiju ahijeh in ipi iseibediu hitam? Themvet naho thenlou seh hi quality education thua ngohding chu ahipon thildang tampi jong umintin, hijongleh hiche themvetna akhoh pen tah a dandih lou holding iki chutho jengu hin avetsah chu eiho dinga quality education stage iphah naisai loulai u ahi.
Tunin keiman ipi kibol leh quality education umthei ding ham ti kasei nomtapoi ajehchu keibou ahe kahipon mijousen ihet u ahijeh in avel vel'a seichim jong aumtan, lekhasim lamtoh kisaija ihinkho mandan u kasei nom joh ahi. School education themvetna ho a examination code of conduct open tah a isuh keh uva thanom tah le kithutoh tah a aselamía ikilhaitet uhi vangset umtah ahi. Hiche kal'a vangset umding thildang aumpoi kitile seival hiponte. Chonset kiti jongleh oljep a aga loding loi aumin, abangloi chu thinunga aga loding ahin, abangloi chonset hi apet pet a aga loding loi aumin, abangloi chonset chu eima abolpa bouvin aga kilou ahin midang atoh khah lou ahin, tua themvetna hoa chonset ibol pauhi akhohdan chu apet petna aga loding loi ahin hiche keochu hilouvin eima seh hilouva midang
jong puisethei chonset ahijeh in akhoh lheh jenge.
Eihon vang kachanu kachapa exam a pachan na aneipouleh adang chu aso so sohtante kei boina akichai pouleh apha ahijenge itiu ahi. Leiset chunga thunei vaibol ten mipi dinga thilpha umdoh na dinga juicheh dinga dan asem hohi Pathen thu mong ahilouvanga Pathen thutoh aki kal na umlou ahi jeh a juicheh ding dol ahi. Koihile hiche juilou chu chonse ahitai ti ihet lou u ahi. Eihon judon ho pou michonse chungnunga isei sanguva society susethei chonchan dihlou chepiho joh hi oimo na pehdinga lomtah ahi.
Keiman examination thenloujeh a chapang lekhasim lai hinkho ijat segam hitam tihi kapona lheh jengin hijehchun asuhtang nadingin nasatah in lhang kanasam e. Ahin koimachan atahbeh in eina support poi. Mijousen examination then loudan pona soh kei danin thu iseijun ahin aphat ahung lhun tengleh ichondan u achom ahijitai. Keiman kanapoh nat behseh jeh in eimi paper umjouse mangcha in kholhang kana sam in hinlah koima nakol sunga alutpon, kalung adong lheh jengin, nikhat hi Board of Secondary Education office a Examination Controller pa kaga kimupi in thil umdanho chu laina tah in kasei jin, ipi ham khat ibol lou uleh kakichaideh diu ahitai katin ahi. Ahin aman eidonbutna chu 'office langa koima boltheija lom jouse kabol chaiju ahitan aban chu keiho boina ding aumbehseh tapoi, education system semhoi ding semtup dingchu local miho khut a um ahi, thilpha thil hoi nadeijuleh nangho thu nadeilou uleh nangho thu ahitai, keihon nangho exam centre a ding monga army iti kahinsol thei diu ham ? Hill district mun phabep a exam tengleh unfairmeans open tah in akibol e tichu kahet lou u ahipoi, ahin koima complaint boljong aumpon, koimacha imacha sei aumpon, agam sung mi student organization chule adang dang koimacha ima seipoh aumpon, examination tengleh avesuiding office langa kon na hung kisolji ahin hijongchu aphatna dehset ding tia agamsung miho hung kingenseji ahin, amahon la imacha aseipouvin, achutileh imajouse chu apha ahi tia kilajeng ahiî eiti peh tan ahi. Aseichu achih behsehjeh in aban seibeding aumpon ahi.
Active Journalist kahi laichun khatvei beh chu examination hall sung a copy kiboldan ho chuleh pamlanga konía supply bol a lhaile ho chu camera a kapdoh ding news a phondoh ding kati leh khonunga eikibol nading chu vet ngam hilou dingin aumin, koi pachat sanga gamsungmi pumpi douva eikila jeng ding, chonset lentah boldoh ho banga jepna le suhgimna jong kachan thei, Leona (fine with penalty) le gimbolna jong eikipohsah ding, ngaidam thumna jong eiki neisah kit nalaiding, michonse chungnung khat bol a eikibol dingchu kakihet thim in hijehchun kanabol tapoi. Keiman kabol ngamlou pen chu khonung in golhang hangsan tah khat in ahinbol in ahileh amapa chu nasatah in suhgimna anachange. Hichu kagichat jeh a kanabol ngamlou ahi.
banjom nalai ding....
