Kukite dinga idea share bol thei nading inei sun'u 'THE GOSEM' news ineijeh uvin Pathen kathang vah in, abanin Editor leh Editorial team ho chungah kipathu kahin phong in ahi.Dt. 31st July 2010 nikhoa Lhingboi Haokip article chu kana simdoh in hitobang eimi numei hangsan chuleh inam dinga lunggel giltah nei aumkhah hi kakipa pi lheh'e. Ajeh chu Kuki numei hohi panna beija moh kamtam thumanlou seija thanom atam jeh in kana poh nat jing ahi.
Tulai hi numei pasal thepna chihna hetna kibang ahitan, numei honjong Kuki society ding lunggel leh natohna kipat phat u ahitai. Pasal ho namoh ngense loudiu phat chu hung lhung ahitai. Eimi pasal hohi atam lang itap kong phunga meivam polet lut na inop nop sei thei bep akihin, sapte thu chih khat in 'Lion hearted in the street but chicken hearted in the jungle' (Kholai dunga humpi banga lunglentah a kitum let lut gamlah ahitengleh ahnou banga kichat na dimset) atiu tobang bep tampi um ahitai. Nampi chunga mopohna jouse hitobang miho moh ngense jeng chu dih theilou ding ahi.
Hi jongleh sopi Lhingboi Haokip, Kuki pasal jouse hi meidoi (meidep) akihi deh poi, 'Lion hearted every-where' jong tampi ki um thou ahi. Ahinlah eimite chu abul akisuh lou jeh a aban seibeding umthei lou ahi. Tulaija achom lam pen'a seidinga MLA, MP hi thil jouse kipatna abul ahitai. Khantou machal hihen nam thu gamle go polictics thu hijong leh amaho hi abul ahitaove.
Tunia MLA, MP, MDC hohi koi lhendoh ham? Ahung kaidoh masang uva pat itobang mi hiuham? Election chu koitoh kitho a ahintet u ham? Itobang means ahin manchah uva hungkai doh jiu ham? Tiho ihet soh keiju ahijeh in aban seibeding aum theipon, kinepna thei jong hilou hel ahi.
Mipi ki ching jep henlang thutah thudih kichepi theileh tunia Kuki leaders (MLA, MP, MDC) hohi kho sung khat na Chowkidar post tuh dinga jong dei um lou ahiuve. Hitobang bep ho lamkai pipu a kilhengdoh ahijeh chun aban seibeding umthei lou ahi. Kukiten tunia ipi iseibe nahlai diuham? Mihem in atu tu a-at ding mong ahi. Thilse hijat mucheí tua kitu ahin, hoilaija thilpha ilo diu ham? Thilsen thilpha a sodoh ngaijem? Thildang dang selouva election a thil dihlou ihol seh seh u jong itu-icha khang geija aga neh joulou ding thilse ikibol doh u ahitai. Thilse bol'a thanomte, thudih thutah gelkhoh loute, miching mithem nam ngailu ho nahsah louten, ipi kinep nading inei nah lai u ham?
Society sunga paisa neipa leh athaneipa (achoipa) kitho khomía nampi kivahna a neija thilha kaose (vampire) tobanga nampi thisan chopthei bep lamkai kilhen dohna society chu ipi iti da dingham? Eima ho leh eima ho thisan iki chopto dingu koima tha louva eiho leh eiho ikitha to jing diu, ahaosapa leh athuneipan kilung toh tah a Humpi pan Sakhi nou khat abo tel tel tobanga nampi hi abotel jing ding ahimaitai. Hi jong leh kichang ngailutna dimset Kuki mipiten itih hijong leh lamkaipha ikilhendoh loudiu ahin, Pakai hung kitkah a ahiti ding ihitaove.
GOSEM news kasim jileh society ngailu tah beh mihoa konin lainat umtah tah thu kasim doh jin, hinlah amaho hi kei tobanga society sunga thanei thunei panmun na dinglou ho ahiuvin, ilainat ipoh nat jeh a iseikal val aban bolbeding umthei beh seh lou ahi. Society sunga thilse hihen thilpha hijongleh lamkai ho (MLA, MP, MDC) a konía bou umdoh thei ahin, milham ho a konía ima umdoh thei ahipoi.
Vannoi history ivetleh Leng (King) ho thusim bou ahin, Leng le Lal ho thusei leh thil bol ho bou akiseijin, milham ho thu akiseipoi. Hibanga chu tunia jong Kuki thusim akisei tengleh lamkai ho thu bou kisei ding ahin, milham ho thu jao louding ahi.
Chuti ahileh tunia nampi thisan chop a vot (leech) tobang lamkai tampi ineiju hi itiding hitam? Hiche hi
phatah a gelphat hitalou ham? Election tengleh paisa neiho tilou election tet dinga igeltheilou u ahin, paisa nei hon mipi hi aki chohdoh u tina ahitan, ipi bolía koi ki oimo ding ham? Achodoh pa thu thua akichodohpa chu umding mong hilou ham?
Tunia Kuki mipi thalhenga kisol doh hohi mipi lhendoh ahilou jeh uva mipi lunggel ahet phah lou diu mong ahi. Amaho hin asempao thu thu a chondiu bou ahin, apu nei (master nei) ahijeh uva apupa alunglhai pou leh adang chu boipi ding anei lou u ahi. Gamsung ngailut jal a MLA hung kaidoh ahilou u ka het jeh in ken vang amaho chunga kinepna kanei pon oimo jong kape nompoi.
Tunia hopeless condition in umjong leo hen, lamkai pha khat le ni ihin kilhendoh thei tenguleh kikhelna het man louva hung umtou ding ahi. Gingchalel lou hel in Pathen heng-ah tao jingu hite. Eimite dinga kinepna bouva hinding tilou thildang aumthei tapoi. Kakipah e
Keima,
Jangmang Haokip
Freelance Journalist (Former Gen. Secy. KIM)
