Akihou khomnauva I. Balakanta in aseina achun, autorickshaw holeh jeep bahara hi achesa kum 15 apat chun tuni chan geiyin dangka cheng 5 ahin, hinlah alangkhat ah petrol leh diesel man achesa kum 15 sunga chun nasatah in akaltou jingin ahi' ati. Aman aseibe na achun, "Gari neihon gari bahara hohi thilman tamtah hakal a akal jeh a ahilou thei louva kikal sah ahin, japi ding gelkhoh loujeh ahipoi ati.Hijeh a chu, sorkar in gari bahara rate khat asem tokah uva amaho association in gari baha-ra dangka cheng 8 hi kikemsah louding ahi tin Balakanta chun aseiyin ahi. Ahin, simlai ho dingin vang dangka cheng 5 masanga bangin akila jing nalaiye ati. Balakanta chun mipiho kom'a jong lunsetna anei diu vin ngehna aneiyin, ajeh chu garineiho leh gari tol hon hiche hoa kon'a niseh a aneh diu kilo thu a pang uva ahi, ati.
Auto driver khat jong ahoulim na achun, "bahara cheng thum mai mai kal jeh a muntin apat a gari nei ho leh driver hon gotna amu uhi vangset umtah ahi ati. Ajeh chu thao man hibang a akal laiya amahon bahara dangka cheng 5 amudiu ahileh, gari lhaisah louva angah thip beh diu himaiyinte tin alung hangna aphongin ahi. Aman
aseibe na achun, 'auto driver ho hin nikhat a anneh ding bou holna a kisa lel u ahin, auto driver khat in inn thupi
tah akisah e tia mu kha um am?' tin thudohna jong aneiyin ahi.
Manipur Sorkar natohna chunga MPP lunglhai lou
Imphal, Lhajing. 22: Manipur People's Party (MPP) seidung juiyin sorkar hin newspaper ho a ijatvei ham kaboldiu ahi tia atahlang vangun sorkar hin khantouna dinga natoh holeh welfare scheme hohi implement abolpoi tin themo achan-e. MPP thuso chun aseina ah, "sorkar hin newspaper in natohding leh lungel
tampihi atahlangin ahinlah atah a atohdoh khatcha aumpoií atin, SPF Minister, MLA hohin development natohna dinga sum ijat hamhi apei chavai uve atin ahi.
Tunaicha Sabhavna Day nikho a chief minister, O. Ibobi lamkaina a kihahselna anei uchu datmo umtah ahi ajehchu sorkar hin mipi phatchomna langhi donse in aneipoi. Hichi nikho a state sorkar in Rajiv Gandhi lungdeiho
kisubulhit ding ahi tia kitepna anei uchu mipi lhepna dinga kisei maimai ahibouve. Athisa Rajiv Gandhi lha jonghin Manipur sunga thil umchanhi deiponte atin ahi.
MPP thuso jonghin welfare scheme tampi - old age pension, Indira Awaz Yojna, SSA leh adang hohi mipite gelkhohna jal'a apei chatvai sang uva sorkar hin neilou genthei ho dinga aheijoh diu angaije, atin ahi.
United Naga Council in India sorkar demna nei
Imphal, Lhajing. 22(NNN): United Naga Council in P Chidambaram, Union Home Minister pan Lhajing nisim 19 nia Lok Sabha a ìManipur gamgi suhkehna dingthu aumpoi' tia aseina chungah nopmo asahnao aphongdoh un ahi. India sorkar hin adei deija vai ahopthei ahivangin avaihopna hi adih angaije. Sorkar hin adihlou abol
ngaipon, chuleh P Chidambaram hi India sorkar thalheng ahijeh hin athusei chunga hi mo akipoh dingahi tin UNC Publicity Wing in aseiye.
Cease fire toh India leh Naga ten chamna thu asei naohi kum 13 ahitan P Chidambaram in chamna thu kiseina a Manipur integrity thu ahinjejeh a hi mopohna akilah ding ahi.
Chidambaram thusei hin India sorkar kitah louna atahlangin ahi. Ahilouleh , India sorkar hin kum hijat pihi Naga tehi alhep ngap ham. India sorkar hin chamna dinga kihouna akipatna patnin athusei anitpoi tihi akilangtai atin ahi. Hijeh a hi India sorkar hin Naga tetoh akikah a chamna aumding adeimong hinam ahilouleh nam tamjo akhangtou hon asot nemmu tribal hohi joule nal'a abolgot uham tihi aseichet angaje. Nagate vangin P. Chidambaram hin Nagate leh akhonung diu thu a hin imacha aseithei aumpoi tia phondohna kaneiju ahi. Manipur Naga te khonung ding thuhi amahon akigeldiu ahin chuleh hichi hi Manipur sorkar toh kijopmatna kisutanna kibol ding ahi tin UNC Publicity Wing in aseiben ahi.
Manipur state Archives in workshop nei
Imphal, Lhajing. 22: Manipur state Archives leh National Miossion for Manuscripts, New Delhi kitho khom in ìManuscriptology and Paleography' ti thupi mangchan ni 21chelha ding national Workshop chu tunin Manipur State Archives Complex , Keishampat ,Imphal mun ah hondoh ahitai.
Hiche hondoh na kin achun Prof. Dipti S. Tripathi, director of National Mission for Manuscripts, chu Jingun in anapang in chuleh Padnashree RK Jhaljit chu Kinneipa in ana pang in ahi. Prof. Dipti S.Tripathi in houlim aneina ah, "Manuscripts kitihi khanglui thusim holeh thil luiho hung kondohna lentah khat ahi ati naban ah khangluilai khutsut (Manuscripts) ho a kon'a tukhang ahi hibang'a khangtou thei ihiuve atin ahi. Aman aseibe na ah hiche Workshop a konía hi Simlaiho adeh a Scholars ho leh Research bol hon Manuscriptology leh Paleography lam'a kholgilna ahin neibe diu ahi tinjong aseiyin ahi.
Suhboi a aum jingu kivei lomhon doudal pango
Imphal, Lhajing. 22: Imphal tolpi Singjamei Super Market vel a galguh kiloikhom achomcheh 2 in hunam sumthum abol u doudalna in kiveimi kiloikhom hon tunichun kiphinna anei uve. Hiche kiveina mun hopsung a kiveimi khat in asei na ah galguhbol khat chun dangka lakh 5 athum un khat kit chun lakh 4 athum u ahi, ati. Hiche hunamsumthum hi atam behseh in, pehjou ding ahipoi tin kiveimi hon thuphon abol un ahi.
Kiveimi hochun ji le cha insung kivah na dia hitobang kiveina neocha cha kibol ahibouvin, hethem lou a suhboina eipeh u hi keiho a dia lainat umtah ahin hitia hunam sumthum aboljing phat uva tu a hi kasuh bulhit peh joulou u ahitai, atiuve.
Thaohah hi akibolthu ahi: TDCM
Imphal, Lhajing. 22: Transporters' and Drivers' Council of Manipur (TDCM) hin IOC Imphal division'a depot manager pahin petrol man kalsah theina dinga thaopo garileh LPG bullet hi NH-53 a asol lou ahi atiuve. TDCM hin IOC Imphal Division, depot manager pahin thaopo gari leh LPG bullet hohi NH-39 langah thaopo dingin asol in ahinlah Kohima kom'a mun achimjeh in Dimapur ah atangden taove. IOC manager pahin thaopo gari leh bullet hohi NH-39 hilouva NH-53 langa anasol hileh thao hahsathi umlou ding ahi, atin ahi. Thilpo gari tamtah hi NH-53 a kon'in Imphal khopi janhi chun ahung lhungtan adang tampi jong nikho phabep sunga hunglhung ding ahi. IOC in adihlou langa lung gel lhahna ananeijeh a hi mipi gentheina chunga genthei becheh ahijeh uhin society pumpi hin themo chansah a lom ahi tin TDCM thuso chun aseije. TDCM jonghin galguhbol phabep in Tupul kom'a thilpo garini ahal lhah uchu demna anei jun chuleh thunei vaihomho komíah national highway a sepai asuh hatbe dingin temna aneiyin ahi.
