TV ivetnaova imukhahdiu ginchat aum'in, tuhin Supreme Court injong nehding hitia kimon lhahsah hi chonset ahi atitai. TV a nehding monlhahdan akimunahi asotjap jengtan ahinlah sorkar hin natoh panding agohih laije. Agriculture Minister, Sharad Pawar chun TV a akisosa avel vel'in naso uvin, abelapmin ahiloubeh thil tampi naseidoh uve atibepseu vin ahi. Grain Storage Research and Training Centre umna Hapur jenga jong gotwi jin adeljeh a ton 30 amonlhah jeng vanghi amelse lheh jenge. Sorkar hin changle mim kikoitupdan vetup dinga anganse Food Corporation of India (FCI) hi changle mim monlhahna chunga themo chansah theipenloi ahi. 11th Five Year Plan hin nehding kholtupna dinga in sahding ahi ati vangin akisahbe dehpoi.
Ministry of Consumer Affairs hin India gamsunga nehding kikoi tupdan U.P. state seh seh a kholchilna
aneileh dangka lakh 50 man changle mimhi amoh monlhah danchu amudoh in ahi. Hitahchun, FCI saplen phabep khatchu natoh ahaisah un adangse chu warning apeuve. Ahinlah hichi abol uhi phat sottah a dinga "solution" ahipoi. 1997 a pat 2007 changei chun changle mim 1.3 million tones (thilpo gari 1,30,000 in apohkhamset) akikoina in amonlhan ahi. Amonlhaho paimangna dinga hin sorkar hin dangka 2.59 crores
asumang kitne. Aboinahi India in tukuma nehding akoikholhi 45 million tones ahin ningkuma sanga tunni
a tamjo ahi, chuleh FCI in nehding koikholna thei godown anei hohin 17 million tones bou aketne. Datmo umtah khatchu India hi agrarian economy ahivangin sorkar hin nehding koikholna thei ninglhing setnasahdinghi agelkhohpoi. Haryana in mim (wheat) bag lakh thum jenhi twijin achupme. Met department hohin gojuh kipat masanga chu Haryana sorkar koma twi hunglen ding ahi tia aseipeh masat ahitan, nahsah a akoilouvu ahi. Hichiva mipileh newspaper hon adohpenu chu khosung miho twiletjeh a akilhohdoh theileh ibolla nehding mimhi kilhohdoh louham?
Sorkar hin nehding amonlha hohi Public Distribution System (PDS) mangchan mivaicha ho apepoi.
Sorkar jonghin nehding amoh monlhah sanghin dukanho in anahomdohleh nehmanhi hitisan louding ahi.
Tuhin nehding nengchetna aumloujeh hin mahajon hon achokhol un aselchah kheh un akimujou tapoi tin adeidantah un aman akalsah un ahi. Supreme Court in PDS kimanchah dan kholchil dinga committee asem hochun PDS hi alolhing joupon nehguh lahguh adimsetnin, sorkar in kumkhatna PDS subsidy dangka 28,000 crore apeh hi mi phabepmin asakhaovin akihet chaiji taove atiuve. PDS hi gamsunga neilou genthei honjong manbaitah a nehding akichoh jouna dinga kiphutdoh ahin, PDS alolhin loujeh hin gamsunga nehle chah akivattai.
Insunga manchah dinga thil ichohteng uleh akoina ding umnantem tin ivetoh masajiuve. Eijading ahiteng lehin chengkhatman jengjong amoh monlhah dinghi iponaove. Ahin, sorkar thil vanghi koima amopo akiumlou jeh in sapte thuchih in ëmijouse mopohna chu koima mopohna ahipoií atibangin, amahthah dijong koiman aponapoi. Nehding monlha hohi sorkar hin umsah louding atileh bailam thetna abolthei ahi.
Amonlhah masanga akoina ding in asahmo ham? Phat chomcha sunga Common Wealth games kichepna
ding dangka 35,000 crores lutna asahdoh theileh mijousen kihinsona a anei neh koina ding inhi gangtah a asah theilou ahidem? Asathei nai. Ahin hichina dinghin Food Minister leh Prime Minister hin file saotah a cheding chu asuhchom honding, mopo dinga akoihon saplen hochu tha leh sum nengchetna apeh honía kumkhat sunga nachai diu ahi atidiu, nehguh bol alepche aumleh na-in uva kalesoldiu ahi tia agihdiu angaije.
Ahileh, neh koina ding inn kisah masanga hi i itidiu hitam? Sorkar dinga bolthei khatchu poverty line noija umhokeo hilouva aneijoulou adangho jonghi akoina ding umlou nehding hohi manbaitah a akichohsah angaije. Nelou, chalou tamna gam'a amoh monlhah sanga hitihin kibolleh phajonte. Akoina ding umlou changle mimhi kihomleh India mi jousehi 45 kg. changpha dingin akiseije.
