District Council tilou chanvou inei tapouve, tua idistrict council hi kum 20 masanga ideilou uchu ipi dinga tua ihiti boipi uham? Fund themkhat kipehbe jeh ahi khahle ibolkhel diu ahi. Politics ibolíu jonghi kheljep angaiye, Manipur sunga hi sethum lah a sekhat hi thinglhang miho akihi bepin ipi punkhom louleh ihahsat diu ahi. Politics ahin koichu tonsot a galmi in akikoi pon chule koijong chu aitih a gol le paiyin akikoi jingpoi, athupi penchu koi hitaleh panlah khomna phat umji ahi tin aseiyin ahi.
Pu Aneh Chongloi in houlim aneina ah, "SAHILCA hi masang pu le pa ten koima vaihop nanoiya ana umkhah lou tobanga eihojong eima le eimaho kivaihop ding deisah najal'a kiphutdoh ahi tin aseiye. Haosa kitihi Lengpa tobang ahi hinla Lengpa sangin mipi dingin natoh ihabol joh uve ajehchu mipite henga kai akilabeh poi. Tuchung MDC kaidoh mi 24 holah achun mi 12 jenhi Haosa kahiuve hichetoh lhon'a chu nasatah a kahin kithopi diu nahi atin ahi. Pu Thangkam Misao in aseinaah, "Haosaho idinkhom lou uleh ichenna Sadar Hills hi gam kisuhmo natah khat ahin District pilhing imolso joulou diu ahi. Politics ibol nauva jong kichih thei angaiyin ahi, sahlang gamkaihon achombeh in eibol un phaicham a honjong akhoh cheh in achatloh tauvin ahi. ana mangthai dehchet Sadar Hills hi abolphat diu chule gamgi thua kiboina hohi Haosa holeh District Council member hon isemtoh diu ahi tin houlimna aneiye.
Pu Haopu Hangshing,Vice-Chairman in aseina ah, "Iboinauhi eiho jehbouva kingam ahi, midanghon atumbeh ahilouleh sovereignty thumta eihon District ithum bep nalai uve. Thanei le neilou thu ahipon tua hi iti pankhom dingham tijoh ahitai' atin ahi.
SAHILCA lamkai thah kilhengdoh hochu ahileh President dingin Pu Tongkhothang Kipgen, General Secretary dingchun Pu Kaikhomang Khongsai, Joint Secy dingin Pu Sonthang Haokip chule Vice-President 3 hochu ahile Kangpokpi lhang a dinga Pu Paolal Haokip, Saitu lhanga dinga Pu Henkholun le Saikul lhanga dinga pu Jan- gkholun Touthang ahiuve.
Khengjoi Block a ‘Solar Light’ kihom
Chandel, Lhajing. 19: Chandel district a um Khengjoi Block hi aning gamla tah a um ahin, kolphe meivah jong lhun lou na gam ahi. A khomi holeh agam mi ho phatchom nadingin, 41 Chandel A/C MLA Milun Thangkholun Haokip, Chandel D.C. Milun H. Deleep Singh, IAS, chuleh adang sorkar milun ho panna in, jaan leh lampi salvah thei ding "solar light" (Nisa hu meivah) phabep ana hom doh uvin ahi. Moltuh a pansa AR sepia 26 Sector hon IGAR(S) kiti kiminvo na noiyah hiche kin-gon panpina ana nei uvin ahi.
DAPCU hon lhenchilna neita
Lamka, Lhajing. 19: Achesa Lhajing nisim 16 nikho a District AIDS Prevention & Control Unit (DAPCU) noiya ICTC Mobile Van support staff lahna dingtoh kisai a screening/interview CMO Campus muna ana umchu lhenchilna akineiyin amaho sechu Imphal khopi muna interview dingin aki gongtai tin Dr. VC Pau, DACO a konin hetsahna akimun ahi.
Hiche nikhoa tohmun kilah nadinga hung kalsong mijat hochu ahile Councelor 1kilah nading a candidate mi 27, Lab. Technician 1 lahna dinga candidate mi 11pha, Driver post 1 kilah nading a candidate 12 alhingin chule Attendant/Cleaner 1 lahna ding in candidate mi 25 aphajou uvin ahi. hiche dung juiya lhenchilna aum jouchun Councelor lahlut nading in candidate mi 12 akilhengin Lab Technician a ding in mi 5, Driver leh attendant/cleaner a ding in mi 5 cheh akilhengdoh un amahohi imphal a interview anei diu ahi.
CCPur sunga thilman kisemtoh vah tading
Lamka, Lhajing. 19: Miss Jacintha Lazarus IAS D.C CCpur akon'a thulhut kimun asei nah achun Churachandpur D.S.O Ginzasuon hin Price Monitoring Committee asemdoh ding chuleh ahunglhung ding nisim 21 nikho le Commissioner Food & Civil Suply toh joint meeting anei khom diu tichu ahi. Hiche nikhoa meeting a chu Churachandpur gamsung'a thilman akalchungchangthu asei khom diu, chujou teng le thilman ho aman jatchet asem tohdiu hiche dungjuiya chu Churachandpur sung'a kijui ding ahi ati. Alangkhat a PDS Anchang chungchang thu'a ahoulimna achun, Tipaimukh gamkaiya ding PDS Annchang hochu Barak vadung a kon'a tuikong mangcha a ahin pohdiu adang ho chengse chu NH 53 lamlen akon a ahin poh lut diu ahi ati.
UNC blockade jeh a CCPur school ho boilou
Lamka, Lhajing. 19: Member Secretary, National Commission for Protection of Child Right, New Delhi in achesa Lhadou nisim 2 nikhoa Additional Director of Education (S/Hills), Government of Manipur kom'a United Naga Council (UNC) leh All Naga Students Association Manipur (ANSAM) hon economic blockade abol jeh uva school in boina anei le aneilou thudoh aneinachung uva donbut nachu Pu Kaikhanlian Guite, DI/ CCPur in CCPur sunga dingin hetsahna aki neiyin ahi. Aman aseina ah, hiche thutoh kisai chun Additional Director of Education (S/Hills) in Lhajing nisim 10 nikhon ZEO jouse thudoh ana neiyin hiva konchun ZEO hon amun amun'a School DI ho anadong son uvin, report alhung gamtan vangphat umtah in CCPur sungin koima school aboi sampoi atin ahi.
7 men Soccer golseh umding
CCPur, Lhajing. 19: Yaiphakol Meitei Youth Club toh-gon nanoiyin ahung lhungding Lhajing nisim 25, 2010 nikhoa patsa Yaiphakol Public Ground muna 1st (L) Kham Jessy Memorial District Level Seven Men Soccer Knock Out Football tournament umding ahi. Hiche thilgon toh kilhon'a koitobang lunglutna nei aumkhah ahileh Lhajing nisim 20 masanga minkhumna abolthei ahi.
Hiche golseh jaona dinga hi dangka 300 pehlut masat hiding ahin chule hiche golseh a akhatna jouchun dangka 3000 ban'a Trophy asanding anina lahochun dangka 2000 le Trophy asanding in agong uvin ahi. Hichetoh kilhon'a Best Player, Top Scorer, best discipline team hojong avetlhah diuvin hetsana akimuben ahi.
3rd State Level Pineaple Festival umding
CCPur, Lhajing. 19: Ahung lhungding Lhajing nisim 27 le 28 nikho tengle Bunglon High school Campus Dr. Kalam ground muna 3rd State Level Pineaple Festival um ding ahi. Hiche toh kilhon'a Moirang Lamkhai, Moirang Multi-purpose Hr. school Auditorium munía nisim 22 jinglam nidan 11:00 le Pineaple Queen Contest
2010 adia Screening cumRehearsal umding ahi. Hiche Pineaple Queen Contest a pangthei ding nungah ho chu ahile kum 15 apat 25 kikah miho hidiu ahi. Contest a pangnom hon hiche Screening Masang'a dangka 150 peh a Application form amun a lahthei ding chule limlah (photo) 4X6 size jong peh ngaiding ahi tin Pineaple Festival Committee a konin thulhut kimuchun aseiye.
