Thuso kimu dungjuiyin amollem ho thilong 3 akimutan mi 2 akihol nalaiye ati.Athiho chu hetthei dingin, Col. PK Pal, Electrical and Mechanical Engineering (EME) Commandant, Army chopper pilot teni Major Rakesh Sharma leh Captain Nikhil ahiuve.
Thuso kimu chanhin hiche lenna neo pohkeh najeh achen-achai akihe hih laiyin ahi. Ahin ginchat thei khat thuhil in aseina achun huikong chu Vishwema Helipad a kipat Imphal Airport jonna che ahin angaiya aboljing aveldung khol lhahna anei ahin, hinlah van athen loujeh a toset atolo ahi akiti.
Assam CM vetsuina noiya sum chedih lou hatah a demna um
Guwahati, Lhajing.18(NNN): Assam a weeklymagazine khat in Chief Minister Tarun Gogoi minphatna akholdoh dung juiya kaltou jinga aum laihin ama vetkol na noiya mopoh nanei 10 holah a Finance Department hi atamjo het in pachatna achangpon ahi. Thulhut kimuchun asei na ah, Gogoi hi tuletu a Mumbai khopi a kon tahsa damlou kijen, damding ngah a hung potdoh pan ahi, ati.
Langkhat ah Lhamul nisim 28 nikhoa memo (FM 27/2010/117-A) Finance Commissioner-Secretary (Audit
and Fund) RS Prasad thuso kimu dungjui chun Chief Minister's Secretariat, Planning and Development Department chuleh Taxation Department hochu govt sum mang khel in aphongdoh e. Hiche department 3 hochu Gogoi vetkol mopohna ahi, ati.
Chugoh hilouvin akituplou department 7 het a um nalai hochu Assembly Secretariat, Cooperation, Excise, Judicial, Panchayat & Rural Development, Public Health Engineering le Sericulture ahinalaiye. Hetthei a akituplou nao chu lhalui a Finance Commissioner-Secretary in toukhom a adihlou ho suhtoh pihdia kouna aboljong chuche department 7 a kon thalheng ache aumpon ahi. Ahinlah department 40 a kon bill 6240 abangkhai ho Accountant General a kon phondoh ahiphat chun sum le pai chung a adihlou ho seikhomna aumpan bep e, tin thulhut kimuchun aseiye. Hiche hi department atamjon muthei tohdoh umlouva aval a sum aloidoh jing jeh u ahipen e.
Prasad in asei na ah, 'lhakhat sung ngei a bill umsa ho tohdoh ding hi dan a umsa ahi', ati. Hitobang a dan juilou department hon angahlou uleh sum athum tah lou diuvin hetsahna akipetai, tin Prasad a kon kimu
lekha chun aseiye.
Natong hoilou department 10 simlouva lungdei bang a natongdoh lou department phosalna kipeho chu Election, Home, Border Areas, Social Welfare, Industry & Commerce chuleh Welfare of Plains & Backward Classes Department ho cheng ahiuve.
Mizoram CM hin loubolna lang lungimpi
Aizawl, Lhajing 18 (NNN): Mizoram Chief Minister, Lalthanhawla hin loubol athupi danhi akihen lougasoh apunna dingleh loubol mihon lougasoh man atam munathei dingin technology akisemhoi go e, atin ahi. Loubol mihon muchi pha, manchah, twilam amunadiu chuleh a lougasoh u mantamtah a akijohna thei diuhi kivet tupeh jingding ahi, tin aseije.
2009 kum'a Bangalore muna 5th International Flora Expo a Miziram Horticulture Department in first prize amuchu kiletsahpi theitah ahi tin Lalthanhawla in aseije. Sericulture kisem hoijeh a loubolmi tampihin thinglhang leivat angahdiu ahi. Ganchavah leh Veterinary hi khantouna dinga thilphatah ahin state sorkar hin gancha natnahi phatah a venbit ding kigoding ahi tin aseiben ahi.
Arunachal’a boina ahin kajao
Dimapur, Lhajing 18 (NNN): Vahchanni chun NSCN-IM hon Arunachal Pradesh a Assam police holeh Wangcho Naga ho kikah a kiboina a hin Assam local newspaper themkhat in themmo eichan vangun
kanatpha pouve tin hilchetna ahinpeuve.
NSCN-IM seidung juiyin 'themo eikichanphat uhin akholtoh dingin committee akiphutdoh in amahon amudoh uchu Assam police ho migam sunga alutjeh ahibouve. Gam lahbe ding atinalam uva Assam police hohin Arunachal Pradesh, Tirap District sunga Rangloah kho a outpost asah uchu khosung miten adeiloujeh uva atingot uva achaina a police outpost chu ahal lhah u ahi ati. Alethuhna in Assam police hon akomlah vel'a Assam kho hochu atildohpouve: NSCN-IM uleh hungchomlut uva thu hungsang kha ah ahi. Thil phalou ahung sodohleh Assam police ho mo kichanding ahi' ati.
NSCN-IM in hichi thilsoh chunga hin Arunachal sorkar in state sunga Naga te anahsah loudan avetsah e. 'Kumsom lang pihi Naga tehi gamdangmi dannin akibolin, Arunachal sorkar hin Tirap leh Changlang district a
Naga tehi ahuhpon ahi. Naga ten apu-apa khanga anatouphao gammang holeh gamgi chinna chalei hokhu
Assam sorkar hin lungthim neitah in alahbe ben ahi. Arunachal sorkar hin Naga teleh agam'u huhna dinga ipi
abollem? Gamsunga midang ahunglut tengleh akidin tepi chu mipi hobou ahiuve. Hijehchun, hichi thilsoh chunga hin NSCN-IM ajaopoi' atin ahi
