ADC noiya saplen hohin ningkum Ollha a patchun ADC jouse a Primary jilkung kilheng dingjat chu newspaper ho a anaseipan ahitai. Hichu ñ Chandel district a 411, Churachandpur district a 668, Sadar Hills Kangpokpi a 663, Senapati district a 517, Ukhrul district a 574 chuleh Tamenglong district a 448 ahi. Chuleh, ADC chom chomhon advertisement alhaovin physically handicapped ho dinga seat reserve kibol jatchu aphongun ahi. Hichu - Chandel district a 6, Sadar Hills Kangpokpi a 21, Senapati district a 16, Churachandpur district a 20, Ukhrul district a 12 chuleh Tamenglong district a 6 ahi.
Thinglhang gam ADC noiya Primary jilkung kilahna a thildihlou umhohi Senapati district a physically handicapped khat in lunglhai louna lekha ahinse lutna kon'a hung kihedoh ahi. Senapati Taphou Phyamai kho a (late) Ng. Danii chapa Danii Abishua Paomai (26) hi khomu theilou leh lhendoh dinga kilomtah pahi amitcho amaseh seh ahivangin amin ajao tapoi. Senapati district a physically handicapped jilkung 11 kilhenglah a hin mi 5 hi khoja theilou chuleh mi 6 hi Ortho handicapped ahiuve.
D A Paomei hin Lhadou nisim 15 nia chu Section 6(1) Right to Information Act, 2005 dungjuiya State Public Information Officer kom'a ibolla eikilheng louham ajeh hi ADC Senapati noiya executive officer hin eipehen tia lunglhai louna lekha anaselut ahi. Amahin dan dungjuiya thudih muding tilouhi kinepna dang aneilou ahitai.
Galguhbol holeh sepai kikapto, 2 thi
Imphal, Lhajing 21(NNN): Senapati district Sapermeina police station hopsung a um New Boljang khomun a galguhbol hidia ginmo le Assam Rifles ho kikaptona aum in, galguhbol 2 in thina atoh in ahi.
Thulhut kimuchun asei na ah janlhah nidan 7:30 don a galguhbol aum e tithu ajah utoh kilhon a Assam Rifles hon New Boljang kho adellut phat a kikaptona hi um ahi, ati. Hiche kikaptona hinidan keh sung tobang chelha ahin, kikapto kichai a chu Assam Rifles hon avel lah akhol le naova sepai von a kivon thilong 2 amudoh u ahi. Hiche thina toh galguhbol te 2 hi hoilai khomi ahilhon vang hetchen ahipon ahi.
Assam Rifles hochun kikaptona mun a chun thilong 2 ban in AK-56 rifles khat le achang 20, lethod meipum le achang 11 ban a .32 pistol khat a achang khatseh thunsa jong amudoh uvin ahi.
Langkhat a thulhut kimuchun asei be na ah janlhah chun Imphal Chanam Pukhri Mapal mun a S Iboyaima chenna inmun ah apohjah thei khat selut in aum in, vangphat umtah in akisukha koima aumpon ahi. Hetding chu S Iboyaima jinu hi government officer khat ahin, akiphong aumlou vang in, anatohna (ajinu) toh kimat a hitobang hi kibol hitei dia ginmo ahi akiti.
Myanmar anchang 30,000 metric tons Manipur’n choding
Imphal, Lhajing 21: Ministry of Consumer Affairs, Food and Public Distribution, Government of India hin Manipur Industrial Development Corporation Limited (MANIDCO) in Myanmar a konna anchang
30,000 metric tons hi Foreign Trade Policy 2009-14 dungjuiya achoh theina dingin 'No Objection Certificate' apetai.
MANIDCO managing director a kon'a thuso kibolchun Foreign Trade a Director General pahi Commerce and Industrial Department, Manipur in Custom NotificationNo. 118/2009-Customs dated 14/10/2009 noiya anchang 30,000 metric tons chohna dinga phalna eipeh diuva ana kingeh ahi ati.
Anchang kipolut dinghi atam behseh jeh hin MANIDCO director pahin anchang pohna dinga thanom Manipur a firms aumleh MANIDCO minna apohtheina dingin application akouve. Achen achai henomhon MANIDCO trading section a office kai phat sunga Lhajing nisim 25 chan'a amutheiyu ahi.
UTLA in hilchetna leh hetsahna nei
Imphal, Lhajing 21 : Achesa Lhajing 18, 2010 nia thinachan gotna ana kipe (L) Mr. Tonglal Singson @ P.T
Kuki s/o Paokhodou Singson, T. Motbung a cheng chu gamle nam a dinga kitahna neilou Orgn. a lut le pot
le mi ahijeh in achunga thina chan gotna kipe anahi tin Pu Jeffer Vaiphei, Secretary Information and Publicity (UTLA) akon'in hetsahna akimun ahi. Aman mipi hetheina dinga bolkhel anei ho tahlang na ahin nei dungjuiyin amapa hi KNF(MC) a kona UTLA join abol'in kumkhat jong lhing joulouva hung potdoh kit ahin, apotdoh jouva UTLA suhmang nading lunggel army hotoh ahin neijin ahi. Chule Jiribam/Twilangkuol area mipi khohe phalou tampi anasu gentheiyin, Sum le pai a kitahna neilou mi chujongle March lha a Nungba Sub-Division sunga Longpi kho a cadre mili thina chungchang a jong amathilbol le ahi ati.
Aman aseibe na achunkoitobang Mr. Tonglal thina chungchang ahinkhol aum leh amacheh in mo akipoh ding ahi. Tu nung tuban a Organisation douna a thusei hihen natong hijong leh ngaidamna umlou ding ahi tin jong aseije.
Alangkhat ah, tua patsa UTLA Finance Department akon hung kisol ahilou leh koiman UTLA min a sum le
pai don abolthei louding ahi tin Pu Kevin, Department of Finance (UTLA) akonin hetsahna ahin neiyin ahi. Tumasanga muntin gamtina Letter Head anakipe ho jousen agangthei pen'a Lhajing 30, 2010 nikho masangei'a akisei namun'a submit ahin boldiuvin hetsah najong aneije. Koi tobang anahsah lou leh donlou a koi aum leh UTLA Organisation dou a kila ding ahi atina ban'a Department of Finance tilou midang kom'a sumle pai submit bol aum khah leh Organisation in kihetpeh louding ahi tin mipiho kom'a hetsahna aneibe in ahi.
MPSC a promotion muthah
Imphl, Lhajing 21 : Manipur Public Service Commission, Imphal order no. 1/2/2010 - MPSC (Estt.) akon'a thuphon kimu dungjuiyin Shri Lamkholen Singsit, Section Officer MPSC chu Registrar tohmun loding in Departmental Promotion Committee in phatsahna aneitan ahi.
Hichetoh kilhon chun Shri T. Ngulkhopao MPSC a Registrar anahi chu Deputy Secretary tohmun lodingin Departmental Promotion Committee hon anaphat sah toh kilhon'in ama Scale of Pay hi dangka 8000-275-13500/- p.m gonpeh ahi.
Hiche tohmun hi government order No. 2/9/75 (SO)/DP dated 22/10/1985 dungjuiya kibol ahi tin Y. Jugindro Singh, Secretary MPSC in phondohna aneiyin ahi.
