Phallha nisim 2, 2000 kumchun misom hi Imphal kom'a Malom munnah security forces hon anakaplih un ahi. Nungah chapangcha ahivang chun Irom Sharmila chun Manipur pumpi a konin AFSPA-1958 hi repeal bolun tin an anagol pantai. Nikho phabep jouvin Sharmila chu police hon amale ama kithatgo a ahi tin anaman un ahi. Thunei vaihomho pansatna chu ahileh thichan geija an ngol kitihi mikhatin ahinkho akisuh mang got ahi atiu ahi.
Hichi a pat chun JN Hospital security ward'a bu aneh nomlou jeh in anah hom'a patnin bu atwijin alonlutsah thouve. Sharmila in thichan geija dinga an angolna kumsom lopna dingin state sunga human rights lamkai holeh japi natonghon Pathenni chun Just Peace Foundation ho makaina noiyin Manipur Press Club mun ah countdown programme chu anapan taove. Hichi kin ahin Human Rights Alert a kon'a Babloo Loitangbam, Manipur Senior Citizen Society member N. Binoy leh Manipuri film semlah a minthang Aribam Syham Sharma ajaovun ahi.
Munchom chom akon thingnoi mi 5 kiman
Imphal, Lhamul 25 : Manipur munchom chom ah security forces hon operation abol nauva thingnoi, UKLA (MC) lamkai 2 jaona in mi 5 aman uvin ahi.
SP Imphal East district police in aseina ah Lhamul 23 jingkah nidan 9:00 vel chun Nungshum village ah 23 Assam Rifles leh Commandos Imphal East hon UKLA (MC) commander in chief (C-in-C) leh foreign secretary pa aman uve ati.
Akiman teni chu Lunpao Touthang alias Francis Kuki alias Luntinmang (36), s/o Lunkhongam Touthang of Aigijang Village, commander in chief chuleh Letkham Haokip, 39, s/o Lunkholet Haokip of Lamajang Village, foreign secretary ahi lhon-e.Akiman, Lunpao akon'in 9mm pistol 1 leh akikapdoh nailou achang 5 akimudoh in ahi, chuban ah Letkham akoníin suitcase adum (blue) 1 asung achun Ministry of Home Affair, GOI in issued abol pass port 1, State Bank of India, A/C No. 30884014015 in a-issued 50 pages cheque book 1, pan card 1, No. Bimpk 1738C income tax department in issued abol, note pad 1 leh SBI pass book 1, A/C No. 30244313777 ho akimudoh in ahi.
Alangkhatna meilhei thingnoi organization chom chom akon'in mi 3 commandos hon phaitol dung'a amandoh uvin ahi. Amaho akon'in Chinese hand grenade leh demand letter jong akimudoh in ahi.
ADC election kaidoh ho thaneina kipevah tading
Imphal, Lhamul 25: Sadar Hills Kangpokpi jaona a thinglhang district 5 ho a kum 20 jouva district council election akibol chaitah phathin local self governing bodies phudoh a thinglhang district hoa tha nei nahi thinglhang mite khut a pehding kiti lungtup chu ahung hingdohtai.
Tumasang jep'a Sadar Hills jaona a District Council election chu Naga kiloi khomhon Manipur (Hill Areas) District Council (Third Amendment) Act, 2008 sempha masaovin atijeh un anadoudal got vangun lolhingtah in election akichaijin thaneina council election a kaidoh ho khutna pehdoh nading khosung miten anga lel jing uhi hung umvah tante ajeh chu state sorkar hin thinglhang gam'a thaneina thinglhang mite khut a pehdoh dinghi agelkhoh laitah ahi.
Hetding khatchu, Manipur a hin Autonomous District Council gup aummin ahi - Senapati District, Sadar Hills Kangpokpi, Churachandpur, Ukhrul, Tamenglong leh Chandel ahi. Alang khat ah District Council hohi chatthei louhellin ana kinambeh in chuleh Council gamsunga vaihop nahi district sunga Deputy Commissioner chuleh Sadar Hills Autonomous District Council dingin Additional DC khutnah ana umíin ahi.
Chandel District a supersession nikhochu Lhakao nisim 18, 1989, Churachandpur ADC a Phallha nisim 23, 1993, Tamenglong ADC a Ellha nisim 17, 1988, Sadar Hill ADC a Ellha nisim 17, 1998, Senapati ADC a Phallha nisim 23,1993 chuleh Ukhrul ADC a Ellha nisim 17, 1998 ahi. ADC ho kumlhun natoh report kibolna a chun 2009-10 kumía dia Manipur Hills Department chun District Council hohi chatthei louhella akinambeh jeh hin Chandel, Churachandpur, Tamenglong, Senapati, Ukhrul leh Addl. DC, Kangpokpi district hoa DC hohi District Council a Chairman (Ex-Officio Chairman) in apangun chuleh Chief Executive Officer in DC hi tunaicha ADC election akichai tokah chun District Council sunga vaihopna langah ana kithopin ahi. Kumlhun report jonghin District Council Delimitation chung changa Notification hi Lhalam, 2009 kumchun Extra Ordinary Gazette of Manipur a chun ana kison, Manipur (Hill Areas) Autonomous District Council (Election of members) Rules, 2009 chu Ellha, 2009 chun Extra Ordinary Gazette achun ana kison ahi. ADC election na dingho kilhen ding danhi Manipur (Hill Areas) District Councils Act, 1971 leh Manipur (Hill Areas) District Council (Third Amendment) Act, 2008 a section 11 noija chun aumme.
Kumlhun report jonghin 2010-11 kum'a dingin dangka 8,50,00,000 lakhs hi Plan noija akikoijin chuleh dangka 5296.90 hi Non Plan noijah akikoije. Alang khatnah, state sunga ADC hon hoitah a vai ahoptheina diuvin Six ADC noija Primary Jilkung 3176 lhendohna ding tohgonchu akichaitai. Tohmun 3453 lah a 8% tichu Die-inharness scheme noija 5% chuleh persons with Disability noija 3% agom'a 277 toh munhi hitobang category hoa dingin akikoidoh e tin sate Hill Department kumlhun report achun akimu e.
AR in software technology programme bol
Achesa Lhamul 19-24, 2010 nia Chaoyaima Higher Secondary School Youth Club, Thoubal mun'a HQ IGAR(South) bahkai nanoiya 15 Assam Rifles of 9 Sector in advance Software Technology Programming chung changía lecture cum coaching programme anabol uchu lolhin tah in akichan in ahi. Hiche hi amunna um simlai hon computer leh softwares angaikhoh jeh uva kibol ahi. Hiche kin achun Commandant, 15 Assam Rifles in hondohna aneiyin chuleh simlai ho komma computers leh advance technology khantou dung juiya simlai hoa ding'a apoimo danho jong aseiyin ahi. Students hochu computer iti kimanchah ham ti jong ahil uvin ahi.
