Kum dangin Manipur Assembly ahung kipat ding tengleh Sadar Hills District Demand Committee hon jong Sadar Hills thu ahin podoh jiuvin, Bandh leh Strick jat chomchom inabol jiuvin, akimu jeng louvangin muding dan bangin ahung umjin ahileh lunggel jong anomdom in ahi. Hinlah tukum Assembly jong kichai paiding hita, Sadar Hills thu mongmong kiseidoh talou ipi iti ah
hitam? Apodoh ngam umlou hitam? Ahilou leh pohdoh a jong phachom mongmong taponte itiu ham? Ahi loungap leh koima jahson louchakhat in kiseileh, aseidinga lom hohi mompi kimomsah khat tou ahi diu vem? Amaho tailou koimacha aheding aki um tapoi.
Ahin lah phatecha ivet leh aseidinga lom Demand Committee ho ahin, Committee chairman pu MDC ahitah jeh in ama hiche langa ahung kisah lel ding chu boina tamtah umding mong ahin, hijeh chun aganía gangía Demand Committee hi thah sem angaitai tin kagelle. Ahi louleh tuni kaneh pou leh jinga ding chu aphat in hin kingaito intin, Meilhei ho vaihom na noija kadu du netange iti diu ham?
Japin itha lheng uva itundoh u MLA/Minister ho jong Naga MLA ho tobang khun gam le nam ngailut na tahbeh nei uleh tuni chan in Sadar Hills thu a boina imacha um tapontin, District pilhing khat hitan te. A tamjo maipha ve ding ngen ahiuvin lungdon umtah ahiuve. Adeh in tudinmun tah hin Hill Area hi eiho Chairman hina ahin, hinlah thunei na jong inei pouvin aphat chomna jong imacha umlou abange. Mihem khat in sum le pai hi ngaichat lenpen loi khat chu ahin, hinlah ngaichat thupi pen chu ahideh poi. Gam tum ahilou leh kivaihom na tum hi athupipen ahin, hiche sunga chu sum inei uleh phachom ding ahin, tua mi vaihom na noiya neile gou ijat inei uva khantou na ijat imu uva ipi aphat chom na um ding ham?
Sadar Hills mipi hon phate cha ngaito phat ahitai. Kum 40 lhingdeh chet District khat jong ideldoh joulou uleh ipi isei diu ham? Ahshijolneng te thusima gitcha te si kibo kilo sah tobang ihi jeh u ahi. Ama hon a si lodim diu sanga akam sunga momding akhohsah joh u tobang chet a Sadar Hills hi idel jeh uva tuni chanía Sadar Hills District pilhin malah amanthah na ding naicheh cheh jo a um ahi tai. Kukite statehood del uhitin gamtin sei jongleo hen, akipat na District khatbeh neilouva chu kilo lhing tah tah thei ding hinam? Vangphat pin State boundry hin khen ding hitaleu, Imphal West ten keiho district gamgi keh theiponte, Senapati ten keiho district gamgi kehthei ponte ti jong leu ichan ham'a i ngongkai kit diu, state govt. in keihon hin kisem tup taovinge tiuvin tin Central Govt. anungsol teng leh i State mu diu jong kivo chonchon in tin tua Sadar Hills kum 40 lhing deh idel u toh hung bangding ahi. Hiche jeh a chu amasa pen a District hi api lhin na ding igelkhoh u angaiye. Ipi iti hitam Sadar Hills athu athip chehcheh tan, amangthah pai ding ihi taove. I tounao gari hi min hijack abola asunga nomtah a itou u ahilam igeldoh lou u ahi.
