Thuso kimudung juijin CDSU volunteers hohin thilsoh aumme ti ajah phat un itidan ham tia amuna akholtoh dinga acheoleh agalhun phat un Phugakchaukhai kho mite lunghangsa anaum hochun CDSU lamkai holeh volunteers hochu anavoh u ahi.
Tahsan theitah thusoh kija dannin COPTAM volunteers hohin CDSU hotoh Kangvai bazar'a Welcome to Bishnupur ti a kijihna signboard chu aphetlhah uva Bishnupur district chu hikom ahibouve tia Phougahchaukhai kho a agatun uleh boina hung kipan ahi. Hichun, Phougakchaokhai
kho vella um bus tol holeh handyman hon volunteers hochu a umkol uva khosung mite akoudoh uva volunteers hochu avoh u ahi. Volunteers hochu thihlhon, thingkeh a ajepmu ahin hatah a kisukha vang aumhihnai. Atamjo chu CCpur district hospital ah first aid akipen ahi. President pa pumma CDSU lamkai thukholtoh dinga cheho chu ahinjepmun themkhat akisukhaovin ahi.
TC Cable Network leh Hornbill'a thuso chomkhom mini jong khosung mihon hunamtah in abollun ahi. Khosung mihon amani kom ahi lim lahih un atiuva a video camera jong alahpeh kigotnu ahi. Thilsoh ajah phatnun tumasang jepma kilhengdoh New Lamka West, Langva, Singat, Hiangtam Lamka a konna MDC hochu thu kholtoh dingin amun ah agacheovin ahi. CDPO/CCpur leh OC/CCpur jong agache lhon in thuboi chu agasuthip hone.
Hiche thuboi namun ahin Gosem News correspondent Mr. Lalboi Gangte jong vangset agatoh in ahi. Aman asei na ah, ëlim kalah le upa khatin nang koinahim ahintin ken jong Press man kahi katileh I-Card ahol in kavetsah jouchun kamai veiling eibeh piheí atin ahi. Chujouchun ahung kitho uvin kakhut a kachoi ka camera chu eilah pih gouvin kaki chupi chun "Haomi na pao louba jaroi' atiuvin chuban in hichilai munía nathilong umding nadei loule kichen tin einodoh thouve' atin ahi.
Bishenpur police commando holeh OC pa amun'a gache hochun thuboi suhthip sangin amohvet thim un chuleh CDSU volunteers hochu avouve tin amit tah a gamuho khatnin aseije. OC/Bishenpur hin CDSU ho kom ah "Suhkhel nei nahitaove, Kangvai hi Bishnupur district hi aham, hilouham nahin hetdiu ahi" tin asei khumme. CDSU ho gari 15 tobanghi ajepseove. Nilhah langchun CDSU hin thuso lakhomho akimu piuvin thilsoh chungchang aseipeh un ahi. Hichi kikhopna a hin CDSU consultants, COPTA steering committee leh MDC ho apangun aban na ipi boldingham akihouvun ahi. CDSU hin Phougakchaokhai kho a thilsoh hi nasatah in demna apeuvin, Bishenpur police hojong adem un chuleh Addl. CP Manimohan lamkaina noija CCpur police hon aphatcha thu ahung suhthipjeh un pachatna apeuve.
Kikhopna a houlim hochun CCpur boundary hi Kangvai chanbou ahipon Bishenpur district a Lalenbung changei joh ahi chuleh MLA kilhengdoh pahin thil neochakhat boundary chungthu mai maijong asuhlhap thei louleh haina lekha pehen atiuve. Houlimna bol adangho jongchun sorkar hin department neochakhat PWD vetupjou louva adeidan dan uva district boundary asemjeng jeh uhin adem un chuleh state sorkar jonghin thinglhang gam lahbe a phaitol gam kehlet beding lungput anei ngapham tinjong aginmonao asei uve.
COPTA bandh hi state pumpi a thinglhang munho a 2011 milah khomna a thinglhang gamhoa avel vella min kilahna aumjeh, thinglhang gam record chungchang chuleh district boundary thujeh a kikou ahi. Lamka town sungah school jouse akikhah in gari kiti alhaipoi. Bazar munchu khopigem kivahlut abangin, DC office tailou sorkar office dangah koima akaipoi.
Sadar Hills a COPTAM bandh lolhing lheh
Sadar Hills, Lhamul 29: Manipur thinglhang gamho phabep Census kilathah nachung ah Phaicham District ho a akoilut uve tijeh in Committee on Protection Tribal Area Manipur chun Nidan 12 bandh ana kou uchu Sadar Hills gamsunga jong ana lolhing lheh in ahi. Pasenger bus ho ana lhailou vangin, Truck chuleh Van Car ho alhai metmut u aki mujingin, Ahin ahunglhai gari ho chu Kangpokpia um bandh supporter hon ana lamtin un gari 30 val anatingden un nilhah lam nidan 4:00 velin ana lha taove.
Hiche kahlah a chun Kangpokpi W/No. 2 a um Thangboi Sitlhou chun Private gari hungkhat agah kham leh anunga sepai gari hungtoh akitoh chet in, hiche a hungtou sappa L.Oinam kiti pachun Thangboi chu suhbeh toubeh athojengin nasatah in asugimin ahi. Hinlah Pu Gideon Baite leh nungah phabeh leh Khosung nupi hon aboipiu vin, Kangpokpi CO khuta konin ana ladoh tauvin ahi.
HPC thingnoimi hidia ginmo mi 2 kiman
Imphal, Lhamul 29: Achesa Lhamul nisim 28 jingkah matah chun Army hon operation abol nauva thingnoimi 2 meithal leh achang pum in aman uvin ahi. Hiche thingnoimi teni chu Dima Hasao district
hopsungía um Bara Arkap khoa amat u ahi. Hiche akiman teni Thanga Theak, Halflong leh J Lalzara Bara Arkap chu Hmar People Conference thingnoimi a pang lhonna ahi tin thulhut akimui.
PIB (Defense Wing) dungjuiya hiche Army hohin AK-47 2, rifle 1, grenade 3 leh chang 300 lang khovel dunga amudoh ujong thuphon anei uvin ahi. Tutu injong khovel dunga akigoppi thingnoimi ho matna dinga operation achelhajing nalai e akiti.
Hmar Peoples Conference thingmoimi hohi tutua hi Manipur a cease-fire anei uva Churachandpur district a camp aneiyu ahi. Ginchat umtah khat chu ahile tumasanga Halflong, Mahur leh Harangajao munía lhamul 21 nikho a bomb pokeh sah ajong chun hiche group ho apang uvin, chujongle akiman teni jong hin hiche district hopsunga um thingnoimi ho kithopi keu hilouvin kai le don na-a jong apang lhon-e tin thulhut kimu chun aseiyin ahi.
Hunam a loujoh namun kihonsah
Imphal, Lhamul 29 : RIMS campus mun'a pharmacies 5 phaicham thingnoimi hoa kon na gihna aumjeh a kikhah chu Lamphel Police hon tunin hunam in kot ahonsah uvin ahi. Thulhut kimu dungjuiya ni 2 masang achu hiche lou kijohna munkhat a bomb anakikam ahin, hiche bomb kam PREPAK pachu mipin ahet doh avoh jou nung uva police hon amat u ahi ati. Hichelai lou kijohna dukan nei mikhat mobile phone ah gihna message khat mobile phon akon'a amu jouva patsa lou kijohna dukan ho kikhah pan ahi tin thulhut chun aseiben ahi.
