Hiche kiphinna hi Akhil Bharatiya Jat Aarakshana Samiti (ABJASS) Kiloikhomna noiya anei u
ahi. Akiphin hon sorkar demna kholhang asam un alungnop lou nau aphong doh un ahi. Ahung lhung ding Lhalam nisim 13 teng Delhi mun'a Jat Chetavani Diwas (Jat Warning Day) nit ding ahi tin aphongdoh un hiche nikho teng leh Kailhanga dukan jouse kikhah ding ahi tin asei uve. Sorkar toh kihouna alolhin louva ahileh Ellha nisim 2 apat national capital a lampi jouse kiting ding ahi tin National ABJASS president Yashpal Malik in aseiye.
Archbishop office chu RTI Act noiya kholchilna um ding
Panaji, Lhamul : Law department chun Goa, Daman Diu mun'a archbishop office chu Right to Information (RTI) Act noiya umsah ding tohgon aneiyin ahi. Committee on law chun house a report apeh lutna a law department in phatah a kholna aneiya ni 15 sunga thulhut anei nadin thupeh ananei in ahi. Hiche Committee chu BJP legislator Francis D' Souza in a lamkai ahi.
Committee henga alunggel dan state sorkar in aseina a Vatican hi chamlhat na neiya kivaipo chuleh pope vaihomna ahin hijeh a chu hiche office toh kisai ho a record jouse mipi hetding chu thilpha hiponte ati.
Hiche thu hi Antonia Michele Abel in archbishop office hi RTI Act noiya kholchilna um hen tia committee henga ngehna anei akon hung kiseidoh ahi. Abel in aseibe na a arcbishop Fr Felipe Neri Ferrao chun public information office khat ahon doh a hiche noiya chum ipi hon hetnom anei jouse ahet thei din ngehna ananeiyin ahi.
OBC Quota a muslim ho reservation peh ding sorkar in ngaito
New Delhi, Lhamul : Sorkar in Muslim hoi reservation hi tua other Backward Caster (OBC) quota a umsah ding angaito e tin minority affairs minister Salman Khurshid in aseiye. Thuso miho kom'a aseina a Khurshid in reservation thu hi akiogel jing khat ahi. Congress manifesto a kitepna aum jeh in congress lamkai hon hiche thu hi agel khoh jing ahi ati. Mandal commission report dung juiyin minorities ho chu 8.4 percent ahi. Hijeh a chu OBC quota 27 percent laha 6 percent hi Muslim ho peh ding tohgon aum'e ati.
Minority Affaris minister pan aseibe na a ama ministry in hiche thu hi ama seiding leh mopohna hi hih jong leh hiche thu ahin Ministry of Social Justice and Empowerment toh kihou matna kanei jinge ati. Hitobang muslim ho dinga reservation aum thei na dingin pan kala jinge ati.
Achesa Lhaphul chun Muslim lamkai hon congress president Sonia Gandhi ana kimupi un, muslim ho dia reservation hi lha 6 sunga kibol doh ding ahi tin Sonia Gandhi in anaseiyin ahi. Congress party hin minorities ho reservation thu hi tua Andhra Pradesh, Karnataka, Kerela leh Tamil Nadu hon achepi hi jui ding lunggel aneiyin ahi.
Congress in party MP ho parliament toukhomna a pang dia thupeh nei
New Delhi, Lhamul : Tuni chun Congress party in MP ho abon uva parliament toukhomna a pang din thupeh aneiyin ahi. Hiche hi opposition party hon gam sunga thilman kal jeh a boina asem kigot jeh uva thupeh hi um ahi. Hiche thupeh hi congress party MP ho parliament toukhomna a apan tei na diuva kibol ahi tin akiseiye.
Party spokesman Abhishek Manu Singhvi in aseina a Congress in thilman kal thu hi phatah a rule um dung juiya sei ding akimom in hinla vote lhah ding vang akinom poi ati. Hiche thu ahi UPA kiloipi
DMK leh TMC in sorkar apanpi ding hinam tia thudoh anei nauva aman 'Hiche thua opposition ho lunggim da hen ati' Aman aseibe na a parliament toukhomna phatecha in um hen ajeh chu bill tampi phat sahna umlou lai aum'e ati.
Maoist hon le thuhna nei dia kigo panta
Goaltore, Lhamul : Jangalmahal mun'a um Maoist galguh bol ho chun lethuh na din phatah in akigo pan tauve akiti e. Sempatni a Maoist lamkai len Sidhu Soren leh mi 5 akitha na chu People's Liberation Guerrilla Army (PLGA) area commander in thuso miho kom'a aseina a police leh CPM ho chu phatah a akigot jing diuvin gihna thu aseiyin ahi. Hiche lamkai pa chun SLR khat akichoi in hiche manchah hi Silda Camp a kichom doh ahi tin aseiye.
Aman aseibe na a AK rifles 2 kaman sah vangun Silda akon in manchah phatah tah 3 Kalam doh un, Phat chomkhat jou teng manchah phatah tah kachoh be diu ahi tin aseiye. Achesa ni phabep sungin kikaptona mun 2 a Maoist galguh bol mi 14 ahti in amaho thi lethuh na a Jangal mahal a um Maoist ho akigo jingun ahi. Sidhu chu gal mi ahi ban'a strategist khat ahin ama thi hi Maoist kiloikhomna dinga it umtah ahi. Hijong leh ama khel ding um vah tante tin Commander pa chun aseiyin ahi.
Sohrabuddin kitha na case a CBI in Geetha Johri kouna nei
Ahmedabad, Lhamul 29 : Tuni chun CBI in Sohrabuddin Sheikh leh ajinu kithana case a Geetha Johri chu kouna aneiyin ahi. Johri hin state CID a aum laiya chu hiche case hi kholna ananei ahi. Tupet in ama hi Rajkot a police commissioner ahitai. Supreme Court thupeh dung juiya CBI in Sohrabuddin fake encounter case Tolbol lha a ahin khol apat Geetha Johri hi nivei pansa ana kou ahitai. State police a Special Investigation Team in a case hi phatah a kholchilna anei lou jeh a Supreme Court in CBI khut a apeh doh ahi. Johri hi tupetna Britain a um ahin Lhajing nisim 6 teng hung kile bep ding ahin hijeh a chu Lhajing 10 masanga CBI kom'a hung dia thupeh anei u ahi. Janhi chun CBI in masang state DGP PC Pandey chu Lhajing 11 teng ahung din thupeh ananei un ahi. CID in case atuh pet a chu Pandey hi DGP anahi ahi.
