New Delhi, Lhadou 26 (PTI) : Jammu and Kashmir a Armed Forces Special Power Act (AFSPA) lah doh dinga seiho hin minphat ding adei jeh u ahi tin Army Chief General VK Singh in aseiye. AFSPA hi mi tamtah in ahilou vin agel un ahi. Hitobanga dan phalou ahi
tia seiho hin a political career u semphat nading mai maiya asei u ahi bouve tin “Land Forces” Defence Magazine a aseiyin ahi. Aman aseibe na a gam hahsatna muna sepai umho hi venbitna nei angaiye ati.

Jammu and Kashmir chief Minister Omar abdullah in central lamkai ho adeh in Prime Minister leh Home Minister P chidambaram koma AFSPA hi semphat dingin ngehna anei jinge. Hijeh a chu sorkar in hiche dan hi mipi dei bang tah a semphat ding agel in ahi. Armed Forces hon hiche dan hi asukeh jing uve tin North Eastern States akon in jong demna aum jingin ahi. Boina alhom lheh vangin galguh bol ho akon gihna aumjing nalaiye tin Army Chief in aseiye. Galguh bol phatah a kichuhna neiho chuleh manchah hoitah tah choi ho douna ahi sepai ho panpi ding ngai mong ahi. AFSPA hi Jammu and Kashmir leh northeastern states phabep a kikoi jing nalai ahi.

Bihar a bus le truck kitat to, mi 17 thi
Patna, Lhadou 26 (PTI) : Patna akon 30 km a gamla Chenaki More koma bus khat leh thilpo truck hat tah a lhai akitato jeh in alhom pen in mi 17 athi in chuleh adang mi 25 val akitongkha in ahi. Senior Superintendent of Police Amit Jain in aseina a bus chun lamkoi laiya alhai hat val jeh a lang khat akon hung truck chu ata khah ahiati. Aman aseibe na a athi ho chu akipodoh un chuleh bus sunga chu athi adang jong umbe maithei ahi ati. Bus chu anoi le achunga mi ou dimset ahin Gaya jou a patna a hung kipan ahi. Aki tongkha atamjo chu Patna Medical College Hospital muna akijen un, amaho lah a mi 7 chu nasatah in akitong kha uve. Adang ho chu Dha-narua leh Masaurhi sorkar hospital a akijen uve tin Jain in aseiye. Athi ho insung mite chu dangka 50,000 cheh peh din Chief Minister Nitish Kumar in aphongdoh in ahi. Kumar in Amit Jain leh Patna District Magisgtrate JK Sinha koma huhdoh natoh phate cha ache lhah a chuleh akitongkha ho man beiya akijen diuvin aneiyin ahi.

Thao man kal jeh a gamsung pumpia kiphinna um
New Delhi, Lhadou 26 : Centre in thaoman akalsah jeh in opposition party hon gamsung pumpi a kiphinna nei din aphongdoh un ahi. CPM makaina a trade Union CITU hon West Bengal state a pung kal 24 sung transport strike akou unahi. Alangkhatna BJP in gamsung pumpi a kiphinna ni 2 sung neidin aphong doh un ahi. Janhi chun BJP makaina in thaoman kal dinga phondoh ahi jouvin Rajasthan leh Punjab muna apet pet in kiphinna ananei un ahi. Kerala a CPI (M) leh LDF hon thao man kal jeh in Thiruvananthapuram a nikhat sung strike anabol un nitin kimanchah-atongkha lheh jengin ahi.

Andhra Pradesh a opposition Telegu Desam, CPI, CPI(M) chuleh Praja Rajyam hon kiphinna jat
chom chom anei un ahi. TDP president N Chandrababu Naidu in aseina a thaoman kal hi adihpoi ajeh chu milham ho nasatah a atoh khat ding ahi ati. CPI(M) politburo member chuleh state secretary BV Rahavulu in centre thulhuh hin mipi akon mipi chunga poh gih kipe be ahi ati.