Amritsar, Lhadou 25: India gam a kum 2010 Commonwealth Games (CWG) NewDelhi muna Ellha a aumding toh lhon in, Queen's baton hicheevent ading in gansemni chun
India leh Pakistan kigam gina historic Wagah mun chu ahung lhung tai. Indian Olympic Association (IOA) president Suresh Kalmadi, adang lamkai ho chuleh kichep golseh lam a mince ho, host city New Delhi’s Chief Minister Sheila Dixit panna in kigam gina muna Pakistan’s Olympic Association officials ho Lt.Gen Arif Hassan lamkaina a hunghon baton ahinpeh dohnao achun agalha uvin ahi. ‘Hiche hi India adinga kichep golseh nalam nikho loupitah chu ahi. baton hi Commonwealth munlah kms 170,000 agaphah jou ahitai. Eiho in hiche hi angai bang in emutaovin ahi,’ tin Kalmadi in host lamkai ho, CGF CEO Mike Hooper leh Olympic Bronze medallist boxer Vijend- er Singh panna ho baton apih doh jou in aseiyin ahi.
World Cup 2010 Round of 16 : Vetnom umtah le thanop umtah hi ding
Lhadou 25 : South Africa mun a Group plahy ahung kichai toh kilhon in tua hi group 8 sunga top team ni cheh umhin single elimination competition anei dingu ahitan ahi.Group cheh a top team ni umhin next round leh group danga top team le second place team akichep pi dingu ahi. Hiche jeh hin next round a hi athem le them kitoh ding atam in ahi. First round group play to- bang hitalouvin tu avanghi hiche tournament sunga hi ajoulel chun a in jot diu ahi tan ahi. Chuleh, hiche chung chon a kichat umtah chu ahileh yellow card jeh a player ho mansah ding hi ahi. Tournament sunga hi player khat in referee pa akon a yellow card warning nivei amuleh next game a amahi kichem thei lou ahi. Hiche dan hi masang world Cup a chu group play akichei jouphal leh anache sah ji u ahin, Hinla tuchung World Cup a hin Yellow card hi next round chan in ahingin ahi.
Uruguay, South Korea, Argentina le Mexico:
Group A le B a hi, top rank Uruguay te hin Group B second place South Korea te akichep dingu ahin, alangkhat a Group A second place Mexico te hin Group B a top rank team Argentina te akichep dingu ahi. Uruguay te hin group play chun hoitah leh det tah in defense anabol un, amaho hi aban leh groud sunga kichat umtah leh bolthei tah South Korean te toh akitoh un ahi. Chuleh, alangkhat langa kichem ding team teni hi akisei minthang Argentine te leh Mexico ahin, khangthah Mexico in joujong leh mipi dingin lunglhah na ahithou thou vin ahi.
United States, Ghana, Germanu le England:
Group C le D a hi, United State, Group C a winner te hin Ghana, African nation a ding World Cup a kidoi boute hi akichep dingu, ahi. Chuleh, hiche match kichem na a hi mipin United State te adei lhen joh dingin akilom in ahi. Ahin USA te hin match kipat lang leh goal apedoh nom un ahi. Ghana te hi vetnom umtah le hoitah attacking akichem uvin ahin, a defence langu hi khuti tah in ahoi joupon ahi. Amaho hi tournament sunga apangjing thei nadingu va a defensive langu hi hatah a asem phat u angai in ahi. Game chom a hi kichat umtah Germany te leh En- gland te kichemdingu ahin, amani kichep hi 1966 World Cup final rematch bang ding ahi. German te hi vetdingin ahung kichem cheh cheh uvin chuleh, boljong abol thei chom lheh taovin ahi.
Netherland, Slovekia, Paraguay le Japan:
Group E le F a hi Nether- lands ten Slovekia te ak-ichep pi dingu chuleh, alangkhat a Paraguay ten Japan te akichep pi dingu ahi. Dutch te jong Germa- ny te bangin tournament sunga hin ginchat loubeh in hatah in ahin bol hoi uvin ahi. Hijong leh alangkhat a Slovekia te jong hi khuti tah a beithet a jothei team ahipouvin ahi. Amahojon hi kitet pi hahtah le kichat umtah team ahiu vin ahi. Chuleh, amahohin defend- ing champion Italy te chu 3-2 in anajou uvin jahcha taqh in ain lang uvah anasol uvin ahi. Paraguay te hi group play achun ana kichem hoi lheh uvin ahi. Ahin tukah lah a hatah a hin bol hoidoh Japan te toh akichep dingu hi amaho dingin jong khuti tah in kinep aumpon ahi. Japan te hi group play a hin tah sanlou hel in hatah in abol hoilheh un ginchatnakal val in kichep na anei uvin ahi. Hiche match hi mitam jon Paraguay te apanpi dingin umhen lang kilom jong leh, Japan te hin mipi te asuh lung lhah nathei din mun leh ginchat nalen tah a um in ahi.
Group G le H kichem nalai:
Group G le H tehin a group play u hi tuni Gansemni nisim 25 lhadou ahi achai bep dingu ahi. Hiche teni group a pat a hing doh le kaidoh dinga ginchat umpen hi group G a patin. Brazil le Portugal kai doh dingin tah san aum in chuleh, Group H a kon hin Chile le Spain kaidoh dingin hatah in ginchat aum in ahi. Akichai nailou jeh in akihe thei pon ahijong leh Spain le Brazil hi round 16 match a kitoh lhon maithei ahi. Chuleh, amani gam teni hi tuchung World Cup ladinga jong mipi dei khat jong ahi lhon in ahi. Koi team pen napanpi ham vang kahe pon chuleh, koipen in alah ding ahi nati jong kahepoi. Hijong leh thil khat vang kahe in ahi. South Africa mun a um World Cup tournament choh tah le nomtah hi kal ni lang um nalai ding ahin. Chuleh, leiset chunga soccer fan hojousen apanpi team hou final chan beh akai tei tei nadinga lunggel hatah a anei dingu ahi.
