Jajang Lhanghal
Kukite hi Pathen in nam khat dinga anasem chu, iti dana gam khat beh toh a inchon tha lou ahidem. Leiset chunga cheng mihem jouse nam khat beh abelthei ding uvin akijop
matsah sohkei in iti dana kukite hi kiki jop matpi thei uh umlou banga umthei ihi diu em? Leiset chunga kijopmat pithei bei hella nam khat lhingsel chu iti umthei ahidem, chuleh itidan a gambeh gamtum neithei lou a ium u ahidem? Ti hi iseiphat leh moso (accuse) ding tampi aum theie.

Khatna a Ipu ipateo chu British te chun ipi nadei um ati uleh ponsan toh mei thal kadei uve ana tikhah jeh uh ahi tia ipu, ipateo moso na penom tampi um inte, peh thei mong jong ana hi. Ajeh chu gam kadei uve anati taleh, hichie lai a ichen na uh Burma, Manipur, Nagaland, Assam, NC Hill-Tripura, Mizoram hichengse hi Map a ajih lhah uva Kuki land or Zalen Gam chu ina nei diu ahi tai. Ajeh chu British te toh anakidou thei hel khat nam chu namlentah a sema gam khat peh thei hi unte tia ana gel khah uva Ipu, Ipateu uchu Ipi nadei uvam tia adei uh ana doh u ahi.

Tuhin Khangthah tamtah in ipu, ipa teo bolkhel ahi ti in suhdih thah ding ngaito najal in, thal leh hem ahin pan un suhdih tei go in pule pate oimo a pan ilahna uvah hinkho tampi jong ichanlo tao in aban kit'a eiho sung ma ma a kidouna chan isemdoh be kit un, hinkhu tamtah Ichanlo taovin in le lou tampi ichanlo bep uve. Ahile ipu, ipa teo chun kamchang khat jeh a igam neidiu chu achan uh ahi ti ioimo uva, thal leh hem ipat uva ino nah uva eimaho tampi ikitha lo taovin, in leh lou leh gam ikitha lo tao in, in leh lou leh gam tampi ichaanlo kit taove.

Ahile kigel ute, ipi ham ajeh khat aume ti vang chu het doh thei in aume. 'Tohkhel masa sangin tohkhel nunung alenjoiî, ti thuchih a kisei chu hichie hi hilou ham? Ahile tu tua khangthah thal choi a Govt. toh S.O.O agreement hin ichan gei ikinep nao leh gamtum tichu kukite chenna se se hop in Zalenna um mong ding ahinai ti kinepna ahilou leh vision maban a nam pumpi hop a imu thei uh ipi um am?

Kei mudan in vang kakinem pha poi, kei mudan in tohkhel nina chan ilhung taovin toh khel thumna chan ding vang kangai ngampoi. Kuki gam ahung kiti jong leh chamna umpontin, Zougam hung kitijong leh chamna um deh ponte ti kaging chai. Ajeh chu chamna dih tah umtheidia tudin muna ium dan uhin imakho diu asei masai ti in kagele.

Ahi leh hichie hi ajeh umtei ding ahi tilou thei hiponte. Kei mudan in Pathein in pha asahlou ahi kati nome. Hoi a hungkon doh koite ihi uvam ti hi kikhol phat ahi tai. Mihem hi thingkohom or songkohom a apeng thei poi, igui uh phate cha a sutdoh tei ngai kasa masai. Hijeh chun ilah uva ikondoh nao suthon sut dan chom in isut uvin songko (cave) a sutdoh loi Mongolian a sutdoh loi tampi in ikibahna utoh thil le lo ineihou a kona asutdoh ujong um himaithei ahi. Kei sutdan in Monggolian gam ajong inacheng kha un Songko ajong anakisel kha ihi mai thei uh ahi. Ajeh chu Agam gama Istrael te kihot bolna thusim isimjing diu katahsane, Mite hotbol ding kichat jeh a Ichon dan uh a min ei hetdoh diu kichat jeh a tampi ikhel doh diujong kaging chai. Ahin ikhel thei lou uh tampi aum nalai in tukhangin vang ahaimil or ahepha talou mi tampi aum tan ahin, ipu, ipate in ana chepi uh chondan ho chu akhel theilou uh chondan hojaal chun Israel ihi uh akilang in Ipu, Ipate ho chondan jaal in Israel gamtheng ah mi asanga sim in Icheng taove. Koi phung pentah ten hiche Israel phunga Mannasseh phunga Ikisut lutna uva hi anelkal, adihpoi tia complaint hinbol aum naipoi, Chin, Kuki, Mizo, Zomi, sunga iki to napen uh ahilou leh neillou kei a ipom cheh uh ahitah jeh in inam hina uh ipom thei pen uchu Mannasseh ahi tai, tihi thudih pen chepi theipen, kitonapen, himai lou ding ham? Ahile Pathen in deilhen pente nam ihi un leiset chunga gam phapen nam jousen a deichat a ochaat pen gam ‘The Heart of the World’ kiti leiset pumpi lungchang “Holy Landí tia kiminvo hel gam ineisa uh Israel gam nompen, gamtheng thoupen, ipu luiho cheng kivui na muna cheng dia Pathen in ei deisah jeh uva mun dang, gam danga hi Pathen in nam khat a eisem ngal uva iti dana asemsa gam/leiset beh khat beh toh eipeh tha lou uh ham? Gam hoipen neisa ihi jeh uh ahidem, ti in ginchatna lentah kanei e.

Ahi khah leh Pathen koma ihathum laiseo a ‘Pathen in athutepsa lah akhelngai poi’ ti ihet sa uh ahin, Pathen in eipeh sao gam nompen, gam hoipen, gam thengthoupen jot thei na ding joh in taojo leo hen athu tepsa ahijeh a ei pui lut tei diu ahi ti katahsane. Ipu, Ipa teo mochan jolouin, eiho jong ki oimo tolou in nampi taokhomna ah Kukite hi gamtum sanga eideisah joh nao uh um ahijodem? Neideisah na uh aumjoh leh nampi hi nadeidan eihet sah taovin ti in anngol pum in kinemsah tah in TAOKHOMNA kineileh Pathen deidan joh in nampi kitoh tah a Ilung kim nao hungsohdoh jodin kagingchai. Chuleh I kito napen u I pom theipen uh min MANASSEH hin kiminvo cheh utin I gam uh lodim loin a ding joh in, Pathen mite ihiu hi leiset namdang jouse thangset nam ihi uhi ihet uleh Pathen deisah tohgon chu lolhin natei din thum leo hen, I chen khomnao uva kihot tona lungthim, hamle pao a kidehto na lungthim phung le chang a kideh tona lungthim jouse hungbei tan tin, Insungnom chu van gam nai pen ahi tia kisei bang chun, insung nom insung hitan tin, nam kitona chamna hungleng tan tin, Kuki gam ,Zalen-gam, Zougam chu lungkitoh tah a Manasseh gam tia I nei khomthei diu ahi tai.