akihabol hidingin akilang e, tin jong UN report chun asei kit e.
Heroin-a kisolou opium (kani) adang sese chu leiset gam nga-a akine’n ahi. Chuche gamho chu Iran (per cent 42), Afghanistan (per cent 7), Pakistan (7 per cent), India (6 per cent) chuleh Russia (5 per cent) ahi.
India in 2008 kum chun heroin metric ton (mt) 17 anedoh in chuleh tu dinmuna opium anehdoh jat hi kum khata 65- 70 mt lang hi dinga estimate ahi. India gama opium kamnathei kibol hi Afghanistan gama kona hung kipolut hi dingin akilang kit poi.
Hetthei khat chu, Afghanistan hi opium semna lama largest producer ahi. 2008 kum chun, Afghanistan opium matric ton 2,700 (approximate) laha matric ton 380 ti vel chu global market-a supply theina dingin heroin akiso in ahi.
Myanmar hi anina, Afghanistan ban tah in apangin ahi. Lao People's Democratic Republic in 2008 kuma opium matric ton 40 ana semdohho chu Myanmar-a process kibol ahi tin akisei e.
UN report dungjuiin, Indian government in UN a thu apeh dungjuiin foreign-a kona India gama kipolut opium kimandoh leh kijoh aum thu akisei pon ahi. ‘Hichu ahi tahleh, India heroin consumption level hi
estimated global total-a kona per cent 6 ahin, chu jatpi kinedoh chun hectare 1,500 - 2,000 ti vela aguh-a
opium poppy lei bol ngai ding tina ahi’, tin UN report chun asei e.
India a opium source dang umthei chu, dan phatsah noia a opium lei kibol (licit cultivation) ho-a kon hi dinga tahsan ahi. Ahinla, chuche chunga UN in atahsanlelna aphongin ahi. Ajeh chu India government control-na noia opium lei kibol (licit cultivation) leh kisem chu aletdan hectare 6,000 (2009) ahi, tin UN report chun asei in ahi.
Opium neh hi Bangladesh leh Nepal gama jong akhang jingin, ahin Afghanistan leh Myanmar gam teni hi opium kondohna hi dingin akilangdoh kit lhon poi.
Tunai cha-a chun, field research in Nepal sung leh Bangladesh leh India border area-ho a opium lei kibolna munho aga photchen in ahi.Estimate dungjuiin, 2008 kuma Bangladesh-a heroin kinedoh jat chu matric ton 4 ahin, chuleh Nepal-a kg 800 a akhandan mudoh ahi kit e. Nepal leh Bangladesh a kona official reports chun, gam tenia kine heroin aboncha lhing dehchet hi India-a kona hunglut ahi, tin asei in ahi. Hiche chunga hi UN in India sunga heroin kine jat mong leh akijoh dan achen achai-a kholchil (study) ding tin adeisahna jong aphongin ahi.
Report tahlangbe dungjuiin, India mipi lah-a hitobang opium khamnathei nemiho chungchanga information adih chet leh tu dinmun information lhahsamna aum jeh in khamnathei nemi um jat mong het ahahsah thim dan asei in ahi.
2001 kuma national survey chun, Indian pasalho lah-a opium khamnathei neho tam dan (lhakhata pasal population lah-a apundan percent 0. 7; kum 12-60 kikah pasalho) ana atahlangin, ahin numei lah-a chutobang khamnathei bol chungchanga information alhahsam jeh in prevalence rate akipe thei pon ahi. Hiche report hin Asia gama cannabis khamnathei chepmi apundan jong atahlang kit in ahi. Ahin, Asia gamkai-a mitamna pen China leh India gam tenia cannabis chepmi um jat estimate aum kit poi.
2001 kuma India-a survey khat in atahlang dungjuiin, pasalho population (kum 12- 60 kikah) laha cannabis chepmi um jat hi lhakhata percent 3 ahi akiti e. Ahin, Information alhahsam jeh in Indian numeiho laha cannabis chepmiho um jat estimate kichen tah aum thei pon ahi.
