Lhagao lama kiloi khomna lamkai phabep pi, Political lamkai le kahlah a nampi khankho ponaho ahung lhaovin ahi.
Nampi khankho gelkhoh a Lamkai phabephon houlimna anei cheh un, tua iki vaipoh danholeh khonung teng ihin lhut khumthei tohgon umho thu ah lunggel hoitahtah akisei doh in ahi. Hitobang lunggel seikhomna kineihi Kuki lamkaiho kihouna dinga alul penloi khat ahi tinjong thujah akimun ahi. Nidan 11:00 vella patsa seikhomna kipan chu nilhah lam nidan 3:45 chan geiyin thanom tahin thu seikhomna aum in ahi. Kikhop lona pentah chu ahile masang sapkangte kisat jouva patsa Kuki chate chenna munho a achenkhompi vaihom dinga kikoi hon ima boina umlou hella ahin vetlhah peh u ahin, hinla India te chamlhat jouva patsa Kuki ho suhmang ding lungthim umchu hunam tah a kidalhah sah gotna natoh ahung kiso doh phatna lunggim tah le beidong tah a hinkho kiman laiya koimacha athu seiding umlou ahi phatna achesa Lhadou nikho 29 kum 1993 a Kuki lamkaihon Special Kuki Tribal Leaders’ Meet kiti thucheng noiya Kuki Inn, Imphal muna ana kilol lhah nau thugol chu ichan igei piu ham ahiloule athahbeh gelkhom kit a bidoi semtup kit dingham tichu ahi. Amavang mipi/lamkai ahung kikhom jousen photchenna anei jouvin hiche nikho a thulhuh chu chepi jing dingin phatsahna aumtan ahi.
Hiche dungjuiya Kuki Inpi hon Naga toh kikah a boina hohi aseitoh diuva kinganse ahi. Naga hon kachenna gamsung ahi tia aseidoh namun hokhu Meilheiho jaona a kihoupi dinga Kuki Inpi ho kimopoh sah ahi. Hiche chungchon na agam le go huhbit nadinga ahinkho dalha Kuki chate chule akhosungdalha ho khankho hi Government toh seikhom dinga Kuki Inpi kinganse ahi. Phungle chang thua kiboina seilhap ahia athah beh a masang kimanchah nabang a umsah ahikit nading chu Kuki Inpi ho mopoh nan aki nganse kit in chule Kuki nam mite thua thilgon aum khah ahijongle Kuki Inpi lamkai ho hetpih nanoiya chelhah sahding injong kilolna ana um ahi.
Hiche to kilhonna Gamlego iti huh dingham? Political movement iti tosot a chelhah sah dingham? Chule dan dungjuiya iti chelhah sah dingham tiho jong gelkhomna aumin ahi. Hiho seikhom jou ahichun kilolna aum tan ahi. Hiche dungjuiya chu ahinkho phal ngam a kipedoh nam gollhangho panpina le lunggel sekhomna aumthei nadinga mopodi lhendohna aumin ahi. Amahochu ahile Kuki Students Organisation (KSO) a patsa Pu. Mangcha Baite, Kuki Movement for Human Rights (KUMHR) a konna Pu. Dr. S. Chongloi, Kuki Church Fellowship International (KCFI) a konna Upa Thangmang, Kuki Research Forum (KRF) a konna Pu. Ngamkhohao Senior citizens a konna lamkai khat ahiuve. Amaho chengse hi Kuki Inpi Home Department a konna Pu. Jangngam Convenor hina noiya pan alah diuva ahung kikhom mipi thakhel jousen deisah nah anei u ahi. Chukitleh Law toh kitoh a Pu. T.C. Guite; Legal Advisor Kuki Inpi chairman hina noiya atoh khompi dingho akilhendoh dinga phatsah na akinei yin ahi.
