Imphal, Lhaphul 10 : Human Right Alert Manipur in thulhut anei dung juiya Manipur a angaiya hinkho man
aumthei tapoi, hahsatna leh boina ngen bou ahitai ati. Amahon aseina a sorkar in Mao Gate a akiphin ho chunga thal akap a chuleh human a asuthip hin nam le nam kikah a kihet them louna asosah ding civil war aum sah ding ahi tin themmo achan in ahi. Tupetna All Naga Students Association Manipur (ANSAM) leh adang dangin achesa Lhatun 11 nia pat economic blockade abol jeh in mipi te chunga hahsatna tampi alhungtai ati. National Highways 39 leh 53 a ANSAM in lampi atin jeh in neh leh chah, lou le ai chuleh ngaichat dang dang state sunga akimu jou tapoi tin Human Right Alert in aphongdoh e.

Manipur state na hin milham ho hinkho in boina jat chom chom in alhun khum in state forces leh thingnoi miho akon in kipuimang apat melse tah a kitha aum jingin ahi. Chuleh tua ANSAM in economic blockade abol jeh in mipi te genthei hahsatna akibe lap in ahi. Thinglhang district vetsahna in Tamenglong a sorkar neh le chah kholna muna imach aum tapoi. Imphal khopi sunga jong sorkar leh private hospitals hon emergency
services akhah gam tauve. Ni phabep jou teng lou le ai chuleh oxygen ho um lou jeh a hospital a dam ding ngaicha ho jong damdoh jou lou ding ahitai.

Neh le chah chuleh mitin a insunga ngaichat ho vetsahna anchang, kerosene, an honna gasho thilman aniseha akaljeh in milham ho choh jou ahi tapoi. State sung leh state pama gari lhai ho jong thao Khuha thao aumlou jehin alhai gam tapouve. Akiphin ho hin Manipur (Hill Areas) District Council (3rd Amendment ) Act, 2008 noiya ADC elections sorkar in abol kigot hi adeilou u ahi. Alangkhatna kiphinna aum jing vangin state sorkar in ADCelectionsphasemasachu bol din aphat aphong doh kit in ahi.

Naga kiloikhom naho hin Greater Nagaland ahilou leh Nagalim semdoh na ding ahi ADC elections hi thepna ahibouve tia agel u ahi. Hitia kibouna aum jing lai tah in NSCN-IM general secretary Th. Muivah chu Manipur
hung kholjin dingin centre sorkar in phalna ahin pen hichu state sorkar in nasatah a adoudal ahi. Ajeh chu Muivah hung hen lang hileh nam chom chom ho lah a kibouna umding ahi ti jeh a ajah nom lou ahi. Hiche jeh chun state sorkar in Mao leh akimvel a security akoibe in Muivah hung ding chu analam tin u ahi. Achaina in Muivah hung ding deisah jeh a kiphin mi 2 athi in chuleh adang me 80 tobang police ho chaval jeh in aki tongkha un ahi. Hiche jeh chun hill districts ho a kiphin na aum in sorkar office  phabep jong meiya aki allha’n ahi. Chuleh Naga Studentsí Federation (NSF) leh Nagaland a Naga kiloikhomna hon ahin panpi kit un ahi.