Genthei insunga kon hijongleh, gunchu leh thohhat ho din jolel ding aum poi ti hi anoia UPSC exam
a lolhing hung kitahlangho akona mudoh ahi. Athusimu achom lamin velhau hite.


Manoj Kumar Roy
Akum : 32
Apa: Retired Peon
Rank: 870
Tohmun amu dia ginchat : Indian Revenue Service (IRS)


Ahtui leh anche joh khat ni khatleh officer len hung ding ti koi atahsan um dem? Ahin gunchuna leh kihambolna in Manoj Kumar Roy hi central civil services rank 870 in atungdoh tan ahi.

Bihar sung Supaul district aum, Manoj Kumar Roy hi government hospital a retired peon chate 8 lah
a khat ahi. Civil services exam a pachanna amu masangin, Roy in joh ding anche ana tol jiin chuleh
office lhongho suthengin ana pangin ahi.

Roy apa hi 1992 kuma retired ana hi’n, chuleh lhaseh in pension in dangka 1,000 asangin, insungmi
11 kivahna din hahsa tah ahi. ‘Matric exam 1995 kuma kachai chai a lekhasim simbe ding kana ti vangin hichu ka pa’n ana jou poi’ tin Roy in asei e.

Roy in lekha simbe ding kinepna in New Delhi ana jon in ahi. Aman, ‘New Delhi a ka inkoho kabel jeng got vangin, ei vah joulou ding jeh in ka um ding ana jada uvin. Jan atamjo gilkel thoh in munong lai (park) ah kana lum/ geh jiin, chuleh neh ding chohna din ka pung changei dangka 50 in kana joh e’, tin Roy in hahsatna
ana toho aseiin ahi.

Aloi khat kithopina in Roy in 1997 kum chun Aurobindo Evening College a admission ana mun, hiti
chun sun leh na atongin chuleh nilhah teng college akai jiin ahi. Sum mubena dingin tuition ho jong ana
la’n ahi.

Roy in UPSC hi li vei a attempt jouva amu ahi. Civil services exam ana pehna subject chu geography
leh public administration ahi.

‘Ka experience ho akona kahetdoh chu ahileh, ipi natoh hijongleh aphalou aum poi’, tin jong Roy in
asei e.

Narayan Konwar
Akum : 30
Apa: School teacher
Rank :119
Tohmun amu dia ginchat : IAS
Narayan Konwar hi Assam Morigaon district hopsunga um Chamkata kiti kho, bi-in a hung sei len
ahi. Konwar hin gunchuna leh thohhat tah pumin Tuchung civil services rank 119 ana mu jouvin ahi.
Ama hi ajat chanpi lah a hitobang civil services exam a lolhing masa pen ahi. Konwar hi scheduled tribe noia a kikhai Tiwa, Lalung tia jong kihe, nam a kon ahi.

Insung hahsa ahi chungchona apa athi phat chun inchen ana hahsa lheh in, class XII jong 1997 kum chun ana fail lo in ahi. Konwar chun, ‘lou jong kana lhou ji in chuleh joh thei thei jong kana joh ji e’, ati.

Konwar chenna kho hi electric umlouna kho ahi chungchona amaho umna Morigaon district hi Assam
district lah a galguh boina in atohkhah pen loi ahi. MA political Science Gauhati University a ana simin, chuleh exam a top in ana pang e. Nagaon College a lecturer apan nung 2008 kum chun civil services attempt
ana bolin, ahin ana lolhing jou poi. Lung lhadai louva pan nasa cheh a alah toh kilhonin tuchunga pachanna ahin mu ahi.

Showkat Ahmad Parray
Akum : 25
Apa : Lineman
Rank : 256
Tohmun amu dia ginchat : Indian Police Service (IPS)/IRS
Showkat Ahmad Parray hi tuchung Kashmiri civil services a lolhing 4 ho lah khat ahi. Ama hi akho uva
hitobang lolhinna sang tah hin mun masa pen jong ahi kit e.

March 7, 1985 nikhoa peng ,Parray hin higher secondary chu akho uva kona km 3 a gamla Alnoor Islamia Model School, Nowpora ah ana chaiin, chu toh kilhonin veterinary sciences entrance exam jong ana clear pai inchuleh course chu 2008 kum chun ana chai in ahi.

Veterinary sciences course ana chai vang chun, natoh mujou louvin aumin, hiti chun UPSC
exam tou ding lunggel ahin neia, achaina UPSC exam a lolhing ahi.

Sandeep Kaur
Akum : 29
Apa : Retired Peon
Rank : 138
Tohmun amu dia ginchat : IAS
Tuchung UPSC exam chu Sandeep Kaur dinga livei abolna leh achaina ahi. Tuchunga lolhing joulou ana hikha taleh ainsungmite, adeh a apa lung ana tohkhah lhehding ahi. Ajeh chu apa hin amanu (Sandeep Kaur ) lekha simna dingin loan phabep ana lain ahi.

Sandeep Kaur hin rank 138 amun, chuleh reserved category noia exam tou ahi jeh in tohmun jong asang jep (IAS) mu dinga kinem ahi. Sandeep Kaur hi Chandigarh apat km 35 gamla a um Morinda a in neocha a hung sei len ahi. Sandeep alekhasimna hi Morinda a um Hindi medium school khat a hung kipana chuleh class XII chu Chandigarh a um English medium school khata apa’n ana simsah ahi.

Class XII achai chai a “common entrance test (CET) for engineering” a clear toh kilhonin government
noia um Punjab Engineering College (PEC) ah engineering chu ana simin ahi.

Engineering achai jouvin apaín civil services dinga atilkhou toh kilhonin Sandeep in UPSC exam chu 2007
kum chun ana tou panin ahi.