China gama naosen anu oisunga kona ki-atdoh (caesarian birth/C-section) hi tijat um leuvin atam apung jing e tin World Health Organisation (WHO) report in aphongdoh tai. China a naosen peng akim/akeh lang chu nuoisunga kon ki-atdoh ngen ahin, hiche hi Tulai chena lhompi khat in aumdoh tan, ahin thilpha behseh vang chu ahipoi, tin WHO report chun aseiin ahi. WHO survey dungjuiin, October 2007 leh May 2008 kikah a China gama naosen peng 46% chu Caesarean section(ki-atdoh) a peng ahin, hiche dinmun hi WHO in tijat um (alarm) level a aphon 15% sanga ale thum sang nalai ahina bana China gam hi leiset C-section a naosen kipensah tamna pen ahi tai.

Beijing Public Health Information Centre in official statistics atah lang dungjui in, 1950 apat 1970 changeia China C-section rate chu 5% tobang bou ana hin, ahina 1990s sung chun 40% apat in 60% geiin atam/ asang chom e, tin Global Times in aseiin ahi. China gama hibang tah a C-section tamna ajeh pi pen hi doctor ho sum deichatna jeh ahi tin WHO report chun doctor ho angoh in ahi.

China gama angai a naosen kipensah (natural delivery) a sum lut jat chu China suma yuan a dangka 500 ($ 73) ahin, alangkhata C-section a sum lut jat chu yuan 1,000 ($ 146) ahi tin Henan gamkai a um doctor khat in asei e. C-section a nao nei kichat ummo jo leh beijo ahi tia Doctor hon ajol ji jeh un, China gama numei hon C-section a nao nei ding alheng ji tauve tin WHO report chunasei e. Court a athu thut ding ngaplel jeh a jong China a C-section rate hi sang hinte tin jong WHO report chun hilchenna apen ahi. WHO hin hiche report boldohna dinga hi Asia gamkai hopsoh a kum 2007-2008 sunga chu naosen 110,000 kipensah dan ana kholchil ahin, chuleh report dungjuia mudoh chu naosen peng 27% chu sum deichatna jeh a hospital a ki-atdoh ahi.

Kum 2005 a WHO in Latin America gamkai sunga numei naovopho survey abol lah a 35% in C-section in nao anei uve ti mudoh ahi kit e. China gam 46% C-section rate ban chet um chu Vietnam (36%) leh Thailand (34%) gam teni ahi. Nu oisunga naosen ki-atdoh lhomna pen gam chu Cambodia (15%) leh India (18%) gam teni ahi kit e. Asia gamkai a survey in ahopse chu Cambodia, China, India, Japan, Nepal, Philippines, Sri Lanka, Thailand chuleh Vietnam ahin, chuleh kum khat sunga naosen 1,000 ho kipensah dan kive ahi.

Hiche study hin Csection rate asana ajehho kicheh tah in asei pon, ahin naosen 60% val chu sum deichat na jeh a surgery a kiladoh ahi tin asei kit e. Vietnam khopi Hanoi a um National Hospital of Gynecology and Obstetrics muna akum seh a naosen 20,000 vel pengho chu C-section a kipensah ahi tin hospital vice director Dr. Le Anh Tuan in asei in ahi. Dr. Le Anh Tuan hi survey a pang vang chu ahi poi. C-section a nao  kipensahna ajeh dang kisei chu anu “frame” neo a acha len kit tiho jeh ahi tin jong Dr. Le Anh Tuan chun asei bei.

Latin American gam 8 a WHO survey dungjuia C-section rate chu 30% ahin, US rate toh kibang ahi.
Paraguay gam naosen 42% chu C-section a peng ahin, alangkhat’a Ecuador a 40% ahi kit e. Africa gamkai a Csection a naosen peng jat chu 9% bou ahin, chuleh hiche gamkai a hospital hon manchah pha anei jou lou jeh in emergency surgery a thi jong atam dehset e, tin jong WHO survey chun aseiin ahi.

United States gama Csection rate chu 31% ahi. US gam survey dungjuia kimudoh chu, nu oisunga ki-atdoh naosenho hi “respiratory problems” anei theinau chance asang jep e ti ahi. Tulai a nao nei ding hon C-section alhen chomnau ajehho agam agamin akibang pon, ahin developing gamho a hitobanga nao nei atam jep jepna hi sum le pai leh medical facility lampanga machalna aum jeh ahi tin WHO survey chun atahlangin ahi.