Ama hi Ningkum 2010 Ollha a Phula leen Fest ahin bol'a anikho mama nilhah nidan 06 vel apat Houbung mite carol a ahin lamkai a ahung kisahboi leh atahsan ahin lel khah a jan'a emu thei talouva dammo nan ahin phah a ajingkah matah a Imphal Shija Hospital ani lhung ahi.
Christmas leh New Year prog jong houbung mite toh mangkhom thei talouva Chronic Pneumonia natna jeh in Shija Hospital, ICU mun'a kumlui ani lhadoh in, Pathen lungset in phatlam ahin mano toh lhon in Kumthah nisim 01 nikho in achenna Dist. Headquarter vangkho ahunglhung in, hinlah New Year prog. ho ana jaothei deh naipoi. Tolbol nisim 07 nikho in avel in Shija ani jonkit in janlhah chan chun Shija Hospital a aphat ahin mang in Hinlah Pathen in ateppeh na phat alhin toh lhon in damjou talouvin nidan 08:30 chun ana muolliem tai.
Pu Thenkhogin hin sopi pasal 2 leh numei 1 anei in, amaho ucha lah a athumna ahi in, tule tu ahi ama hin angailut a inneipi Lhingkhovei Haokip toh Chapa 2 leh Chanu 2 anei hon in, Tuibuong Dist. Headquarter, Churachandpur mun'a khosa ahiuve.
Society, khosung, Houbung sung, chuleh adeh a Khanglai te lah a panlah hi ama lunglutna ana hi in, chuti ma chun Youth Department KBC a ex-president ana hi in, ama phatsung in KBC Choir ho Indonesia, le gamchom chom a pathen vahchoila sadin ana puihuoi len ahi. Chujou in tua aumna Christian Fellowship Church, Dist. Headquarter mun'a jong Choir Director, Youth Chairman ana tuh in, tule tua hi CFC Executive Secretary ahina nuse a ei muolliemsan u ahi.
Tuni nidan 10 teng aluong damsa uopna kin um intin,nilhah nidan 01 teng DHQ Cemetry a aluong lhahdohna kin umngal ding ahi. Hiche kin chu Rev. Seiboi Kipgen, Pastor CFC in alamkai ding ahi.
Pu Thenkhogin hin adamlai sunga tohga chom chom tamtah ani sang in, ahin adamlai a tohga akisan manlou vangam a asan ding tamtah aum in, adamlai sunga Good Samaritan Foundation, kiti NGO ahin boipi in hiche achun ama hi Secretary ahi in, aman sumhol nopna mai mai hilouva Khosung semhoi naleh genthei hahsa kithopi na a na phatah ahin toh a, Adeh a 2009 apat Phula Len Fest kiti kin loupitah ahin guon a Kumlhun a Chapang vonlum ahding neilou genthei ho gift box ahin guonpeh a chapang 100 chunglam vonlum ahin hoppeh a lungmong a Phalbi ahin mansah ahi in, ningkum 2010 a jong chu anivei channa dia ahin guon'a prog. lolhingtah a ahin chai ahi in, tahsa damthei na sukha leuva chapang sille chen neijoulou ho ahin boipi a, ajan a houbung mipi Jesu pien liemna dia kigotna ho ahin lamkai ahi in, A insung, a khosung, houbung sung leh gamsung adia it-umtah mipi leh lamkai khat ana hi.
Thenkhogin Haokip Profile
Father's Name: (L) Pastor Tongkhomang
Mother's name: (L) Veikhotin
Bros & Sis : (L) Pt Jamthang, Veijalhing, Jamkhonem, Lamjaneng and Thangjalun
H/o : Lhingkhovei Haokip
DOB: 13th March, 1965
Chate: Manglenlal, Letgouhao, Tingchonghoi, Hoineivah
Employer: Good Samaritan Health Foundation
Present Add.: Tuibuong District Headquarter
Part III
Lekha sim na:
1972 kum in lekha ahin simpan in, aveiset jeh in 1974 in RMC ah kumkhat ana kijen in,
1976 in alekha sim abul ah akithah pat in;
Passed Cl-III to VIII: Brighter Horizon Academy
HSLC: Bengali English High School 1985, IInd Division
Passed Cl-XII: DM College, 1988
Grauduation: DM College of Arts & Commerce, B.Com in 1990
Bachelor of Education: 2004
Damlai panna mun:
1997-2000 Youth Department ah President, KBC
2001-2004 Youth Department Vice President, KBC
2004-2005 Education Board, KBC
1992 in KBC Choir Madras ah ani lamkai in;
1993 in KBC Choir Tura ah ani lamkai in;
1994 in KBC Choir Indonesia ah ani lamkai kit in ahi.
2007-08 CFC Children Sunday School Building commtt Chairman
2007-08 CFC Choir Director
2009-11(Current) CFC Executive Committee Secretary
