Imphal, Ellha 20 (NNN): Manipur Forward Youth Front (MAFYF) hohin United National Liberation Front (UNLF) lamkaipa R.K. Meghen alias R.K. Sana Yaima aman’a toh kisaija mipi ‘movement’ kapatdiu ahi atiuvin, chuleh Manipur Inpi a Opposition lamkai O. Joy hin India sorkar hin UNLF lamkai pahi aholdoh ding ahi, tin aseije. Newspaper hon R.K. Sana Yaima hi Dhaka munnah Lhalam nisim 29 nichun India leh Bangladesh intelligence hon aman taove tia ahinsouchun Manipur sungah lung-op kaina adimtai. UNLF hohin Ellha nisim 16 nichun alamkai paohi akiman ahinai tin photchetna ahinbol uve.

Sempatni chun, Union Home Secretary, G.K. Pillai Imphal a aumpet ahin, UNLF ho thuseichu anelkallin
New Delhi hin UNLF lamkaipa akimat thu imacha ahepoi, ati e.

Meilheiho lah a lung opkaina asanphat hin R.K. Sana Yaima chapa R.K. Chinglen leh lamkaipa jinu R.K. Ibemnungshi hin hichithu a hin United Nations High Commissionder for Human Rights kithopina athummun
ahi. India sorkar hin UNLF lamkaipa umnahi aseidohlou phatna R.K. Meghen leh anuhin United Nation kom
abel kigothon ahi. Lamkaipa insung mitehin R.K. Yaima hi nadei bangtah un athu tannun, jahda pouvinge “hijongleh a umna behvang eihetsah un”, atiuve. MAFYF jonghin UNLF lamkaipa kimatna chungthu a seiding
kanei pouve ahin UNLF chairman pa umna vanghi thunei vaihom hohin aseidoh uva pha ahi atiuve.

Vahchanni chun O. Joy hin R.K. SanaYaima hi dantoh kitohlou kiloi khomna a lamkai hinante ahinlah, amahi Manipur leh India a kon ahin hijeh a chu India sorkar hin UNLF chaiman pa kimat natoh kisaija adihtah
chu aholdoh angaije, atin ahi. Hapta masa Misemni a chu UNLF hohin a chaiman pao R.K. Meghen alias
R.K. Sana Yaima hi India leh Bangladesh intelligence hon aman uve tihi photchetna aneiju ahi. BBC in R.K. Sana Yaima akimantai tia aphondoh a chuleh Manipur newspaper honjong ahin sojou uvahin Manipur sungah
news a thulhut kibolhi adih ahinadem chuleh lamkai pahi hoikomma uma ahidem tithu ahin lungel jatchom chom aummin ahi.

Manipur hin chamlhatna amuna dinga galguh bolholah a UNLF hi atam penleh athuneipen ahi. Ama hohin sepai 6,000 val anei dannun akiseije. UNLF Vice-chairman Kh. Pambei hin email athotna a chun R.K. Sana Yaima hi Lhalam nisim 29 nikho a Bangladesh capital Dhaka munna Mohammadpur police station noija Lalmatia gamkolkah sunga India te Research and Analysis Wing (RAW) leh Bangladesh intelligence hon
amatnu ahi, tin aseije. Kh. Pambei seidung juijin akimat nikhohin R.K. Sana Yaima hi apansatna munna
a gari number Dhaka Metro G-17-0716 a ahung kile laichun sepai phabep civil a umloi uniform ki-ahloi hin
anakhammun, amanjong phat sumang louvin thil umchanchu aloiho phone’n aseipeh tai. Anoijaho ahunglhun
phatnun sepai hon a garitoh amattha taove tin aseipeh taove. Hichun, UNLF hohin Mohammadpur police station achun FIR abol uve tin Kh. Pambei hin aseijin ahi.

UNLF ho seidannin R.K. Sana Yaima hi ni 10 Bangladesh a akihen jouvin India huikong khathin New Delhi
langah ahinthahtai atiuve. Misemni chun UNLF hin India sorkar hin lamkaipa kimatna chunga adinmun
aseichena hoikoma akoi uham tihi aseidoh angaije ati e. India sorkar kisahna hi galguh bolleh gucha umchan ahin international dantoh kitohlou ahi. UNLF hin India in challenge abolnahi kasangun, mipitoh kitho a hichi challenge kibol nahi kakidinte pidiu ahi atiuve.