US Pastor khat in 9/11 nikho leh Quran kahal ding ahi anati jeh chun India gam'a miphalou ho in janhi jan chun Punjab state Malerkotla mun'a hou-in khat leh Kashmir Valley a school ana hal lhauvin ahi. Hijeh chun All India Christian Council ho in thunei vaihom ho kom ah hitobang'a In hal lha ho amatdoh uva chuleh India gam'a Christian minorities ho venbitna anei diuvin ngehna anei uvin ahi.
AICC in mipi ho kom'a India hi secular country ahitoh kilhon in khat le khat in hou le beh ho kijato nadingin tilkhouna nei un asei keo hilouvin atoh ajong pohdoh ding'in temna aneiye. All India Christian Council North
West in jong Christian community member ho jouse kom ah chamna leh lungmong tah a chenkhom dingin atem in chuleh thilphalou bolho chung ah dan leh thupeh bolho in achungthu seiding aumnai ati.
All India Christian Council (www.christiancouncil.in), hi achesa 1998 kum'a ana kiphut doh ahin amaho bidoi pen chu Christian community ahilou leh ahahsa genthei, suhgentheiya umho vesui ding'a hung kisem doh ahi.
Amaho hi Indian akon'a denomination, organisation leh lay leaders tamtah kipunkhom'u ahi. Thuchen henom hon anoiya hohi kihoumatpi thei ahi.Mr. Lawrence Malik (09814853548), Mr. Youns Peter (09815466229), Rev. Vinoey Aravind (09896181647), Pastor Deepak Dhingra (09816677852) leh Rev. Anoop Gill (09815185573) ho hi contact thei ahi.
Kashmir boina thua Omar in Sonia kimupi
New Delhi, Lhalam 13 : Jammu and Kashmir Chief Minister Omar Abdullah in tuni chun Congress President Sonia Gandhi ana kimupi in aih. Hiche hi Cabinet Committee on Security kikhopna aum masanga minute 15 sung kihou limna ana nei lhon ahi.
Jammu and Kashmir a Armed Forces Special Powers Act (AFSPA) mun phabep a lah doh ding thu CCS in seikhomna anei kigot ahi. Omar in hiche AFSPA hi mun phabep a lahdoh dinga ngehna anei jing ahi. Chief Minister in aseina a state sunga chamna aum theina dingin centre toh kitahsan tona aum nadingin natoh kanei jinge ati. Hinla boina aum jinga ahileh iti lam'a chamna aumtheina dinga pan lah ding ham thudoh um jing thei ahi. Vetsahna in Ahcha le Ahtui hoi joh masa jo ham ti thudoh um tobang ahi.
Achesa Gansemni chun Congress Core Group a Prime Minister Manmohan Singh leh Congress President Sonia Gandhi in party lamkai ho toh kihouna ananei un ahi. Kashmir boina hi achesa lha 3 tobang ana um hitam mihem phabep jong athi tan ahi. Alangkhat a BJP in AFSPA kila doh thei lou ding ahi ajeh chu separatist ho thaneina apeh be ding ahi atiuve.
Masang CPI-M MP khat in Congress jopta
Thiruvananthapuram, Lhalam 13 : Masanga Lok Sabha member anahi chuleh CPI-M akon ningkum a anahai K S Manoj chun Congress party ajop tai. Janhi chun district congress committee president AA Shukkoor in Alappuzha mun'a lahlutna kin chu ana neipiuvin ahi. Amapa hin CPI-M ho dinmun ho adeisah lou jeh a Congress a hung lut ahi. Aman aseina a koi hileh mopohna nei jousen houthu toh kisaiya natoh anei lou din aseiye. Manoj hi medical doctor ahinCatholic Youth Movement a pan ahin lah pan ahi.
CPI (M) lamkai hon aseina a party in houthu a chamlhatna akipe in hinla Marxist doi le tup ho semphat ding akigel khoh e ati. Manoj in aseibe na a gam sunga houthu a chamlhatna dih tah chu Congress party bouva aumíe ati. Hiche lahlutna kin a chun Alappuzha a Lok Sabha member KC Venugopal jong apangin ahi. Manoj in 2004 Election a chu CPI-M ticket a Alappuzha akon Lok Sabha ana kaidoh ahi. Thilchom beh khatna masanga CPI-M anahi tua Congress MLA AP Abdulla Kutty in jing nikho teng leh "You made me a Congressman" kiti ama hinkho thusim lekhabu hondohna anei ding ahi. Abdulla Kutty CPI-M akon
ahai jouvin Kanneer by-election a congress ticket in akaidoh in ahi.
96th International Training Programme CAG in thenson’a nei
New Delhi, Lhalam 13 : Comptroller and Auditor General (CAG) of India Vinod Rai chun tunin 96th channa International Training programme on "Performance Audit" hondohna chu New Delhi a aneiyin ahi. CAG office in achesa 1979 apat chun auditing and accouting lam'a international training programmes ananei jingin ahi. Tuchan in international training programmes 95 vei aneitan chuleh middle and senior level officers mi 2,815 hon pan alauvin ahi. Africa, Central Asia, South East Asia, Far East Middle East, Pacific leh East European akon gam 121 hon hiche kin ahi apang un ahi. Training nei atamjo chu Indian Technical and Economic Co-operation (ITEC) chuleh special Commonwealth Assistance for Africa Programme (SCAAP) and Colombo plan kiti Ministry of External Affairs in kithopina hi anei ahi. Tulaiya vaihomna alet cheh cheh toh lhon in performance audit hi athupi cheh cheh in ahi. Kitup tah-a vaihomna aum theina dingin performance audit hi thil khoh tah khat chu ahi.
Chuban leh sorkar programmes, projects leh schemes ho phatecha ache hoi theina dinga audit hingaikhoh ahi. Tuchunga 96th International Training Programme ahi gam 36 akon palai 45 pang diu ahi. Tukum ahi Georgia hi athah beh a hung pang ding ahi.
