Tu hin MIG- 23 leh MIG-25 galsaat huikong ho chu akikhel gamtan, Sukhoi leh huikong dang athah aumteng leh MIG-21 jong kikhel ding ahitai tin thulhut kimu chun aseiye. IAF in 1960s laiya pat hin kimang MIG-21 ho jong alui val tan khel phat ahi ati. Aluival phat in MIG ho chun toset atoh jing un hijeh chun pilot phabep jong athi tai. Defence in athah beh-a huikong 126 achoh be ding ahin hiche na ding chun patepna anei pantai.
Goa gam'a Sena lamkai pa michom case a kingoh
Panaji, Lhajing 11 : Goa police hon tuni chun state Shiv Sena lamklai Upendra Gaonkar chuleh party vice president Umesh Salgancar chu michom case in angoh tauve. Amani hin Casino management akon in dangka 15 lakh akilah got lhon'e tin police in aseiye. Salgaoncar chu jan hi nilhah chun aman un hinla Gaokar hi mat dinga ahol jing laitahu ahi.
Goa akon 5km a gamla porvorim police station mun'a hi Hotel Majestic in complaint abol ahi. Hiche hotel hin land-based Casino abol ahi. Police in aseina a Gaonkar hin ama tahsa mong monga hotel management kom'a hi sum ana ngeh ahi. Amasa chu dangka 50 lakh ana ngeh ahin hinla phat chomkhat jouva 15 lakh chuleh achaina a 50,000 a ngeh ahi. Shiv Sena hin masang peh a pat a chu state sunga Casinos umding ana jah nom lou ahi. Hiche jeh-a chu mipi kiphinna jong ana um in ahi.
Amritsar police hon sumdihlou 9,00,000 man doh
Amritsar, Lhajing 11 : Pakistan akon thilpo train khat akon in Amritsar police hon Indian sum adihlou dangka 9,00,000 aman doh un ahi. Hiche terain chu Atari Railway station a 3:30 pm vel'a chu hung lhung ahin police hon pha tah-a akhol nauva hiche sum kisem thu chu 4:30 pm vel a chu amudoh u ahi. Hitobang thil aumding chu kalunga um ahi ajeh chu keiho Regional Assistant Commissioner Khosla in eina seipeh sa ahi. Eiman ama chu katahsan jing'e tin Additional Commissioner (customs) SM Akhtar in aseiye.
Akhtar in aseina a hitobang thil chu gam teni kikah-a poh le ding chu koiman atahsan lou chuleh gel jong
agel phah lou ahi. Chuban leh Railway department in jong kathil mu doh u chu atahsan pouve ati.
Tuchunga thil kiman doh hi keiho phat sunga dinga alen pen khat ahi tai tin aman aseibe in ahi. Akhtar in sum dihlou amat doh hou 9,00,000 lah-a 6,00,000 chu 1000 notes ahin, 3,00,000 chu 500 notes ahi tin phondohna aneiyin ahi.
Khonunga sepai pang dingho lunggel patepna um ta ding
Nagpur, Lhajing 10 : Khonunga India gam'a sepai pang ding ho chu natoh ajop masang uva lunggel patepna um ding ahitai. Hiche hi sepai pang tampi ama le ama kithat ahilou leh aloi-agol that tiho atam cheh cheh to lhon'a hiche ven na dinga chu lunggel itobang anei hinam ti hetna dinga patepna anei diu ahi. Ningkum chun ana kibol doh in hinla boina jeh in ana chelha thei poi. Hiche patepna hi khovei apat um dingin akiseiye.
Defence Institute ofPsychological of Psychological Research (DIPR) in aphat sah to lhonna kibol kigo ahi. DIPR hi Defence Research and Development Organisation (DRDO) noiya um ahi. Hiche patepna anei diu ahitai. Mun hahsa chuleh gal-le-tol umna mun'a sepai ho chunga lunggel hahsatna chom jeh in kithana hi atam in ahi. Amaho hin ichan geiya hahsatna athoh jou uham ti hetdoh na dinga kibol kigo ahi. Officers ho chu lamkai mopohna ichan anei ham ti jong patepna um ahi.
AASU in Assam state sunga kiphinna nei jing
Guwahati, Lhajing 10 (NNN) : Phat masa Assam Accord chung chang'a kiphinna ana umchu Assam leh Central government in nahsa louva akoi jeh un All Assam Students' Union (AASU) in gamsunga 'satyagraha' kiti kiphinna aneikit uvin ahi.
Assam students' body hohin achesa Lhajing 15, 1985 kum'a Assam Accord kinopto na dung juiya gampam mi (foreigner) holdoh a akimu hochu agam uva thotdoh ding kiti chu anahsa pouve tia kiphinna aneikit got u ahi. AASU advisor Samujjal Bhattacharyya in NNN kom'a aseina ah 'Keiho in satyagraha kabol uhi government in akitepna asubulhit lou u akihet nadiuva kabolíu ahin chuleh phalna neilouva hunglut ho kholdoh a chukit leh agam uva nungsol ding ahi tia keiho komía ana kitem u ahi' ati.
AASU hon asei nauva Lhajing 14 le 15 teng an-ngol kiphinna kanei ding'u ahi ati. Lhajing 15 nikho teng AASU member hon in ana mollemsa mi 855 geldohna a mei kide ding ahi atiuve. Guwahati kijot na achun
AASU advisor in asei chun 'Assam hi agam mi bou in kakisemphat ding'u ahi gampam mi kangaicha poi' ati.
Bhattacharyya in aseina ah 'Igam'u hi Bangladeshi ho ahung'un election atetjiuve hijeh chun Congress government in amaho chu atosot lou diuvin angeh in ahi'. Het ding khat chu kal masa chun All Assam Minorities Students' Union (AAMSU) kiphin jeh in Assam Government in National Register of Citizens (NRC) bol ding chu ana suhai tan ahi.
