Amahon aseinao va Nagaland gamsung ahin Thuingaleng Muivah in pan lah na ding mun anei poi ati. NSCNK ho hi India Government toh Kum 2001 apat a chamna thu seina ding kihou jing ahi ati. Vanghomni a thuso apeh naova chun, NSCN-K in tua pat a kitha-kimat leh hem-le-thal pailha a 'Naga Freedom' lung tup tohgon aneiju hi adel jingdiu ahi ati. Dimapur kom a um Vihokhu khomun a thuso miho kom achun NSCN-K thupo apang Kughalu Mulatonuin, 'Toltha kiti hi manchah lhasam pen ahi' tin aseiyin ahi. Hiche hi Kughalu Mulatonu in Dimapur koma um Vihokhu khomun a NSCN-K toh Federal Government of Nagaland (FGN/NNC) non-accordist (Shillong Accord1975) faction hon kipum khatna leh thakhat a pan khom nading kinoptona aneina chung uva 'kipa thangvahna' kin aman laiyuva aning lang khat a thuso miho koma anasei ahi.
NSCN-K lamkai pu in aphondoh na a chun, hiche Naga nam mite kiloikhom na teni in lung-op kaina beihel a 'kipumkhat' na aneihi Naga mite jouse dihtah a kipumkhat na ding a panlah na masa pen ahi ati. Hiche thilsoh hi thupi tah ahi, ajeh chu Naga te kiloi khom nani apankhom'a tha khat aje thei hi Naga te political, economic chuleh military tha nasatahía asuh hat ding tahsan aumin ahi.
Mulatonu in aseina achun, agang thei penía hiche kiloikhomna teni hin gamsung kivaipohna ding min leh agong dingdan ho asem diu ahi ati. Aman aseibe na ah, hiche kivaihomna thah kisemding hin kiloikhomna chom chom umho- Forum for Naga Reconciliation, church groups leh adang dang hon Naga te kihoutoh nading a pan ahin lahjing hohi kijomtou pehding ahi ati.
Hiche thilsoh hin NSCN-IM toh jong kihoulhah na umdoh ding ham tia thudohna aum achun, Mulatonu in adonbutna a chun, 'Thuingaleng Muivah in Nagaland gamsung a panmum aneipoi' ati. Aman aseibena ah jong chun New Delhi in tuni chen geija imacha tohdoh neilou 'terror group' khat toh kihouna aneijing hi hetthei lou thil khat ahi ati. 'Kataona chu ahileh New Delhi in khutgo keova ahinsol louding' tihi ahi tin Mulatonu in aseiyin ahi.
Naga te kiloikhomna dang dang leh chamna dei hon Nagate lah a kipumkhat na aumthei na ding a pan ahin lahjing hohi Nagate kivaihomna leh kiloikhom na thah kisem doh hin ahin suhbulhit ding ahi ati. Kihoutohna ding toh-gon thu NNC/FGN lamkaipu Zhopra Vero in aseina achun "Naga nampi kiloikhom na len NSCN-IM, NSCN-K leh NNC/FGN lamkai hon Kipumkhat na dinga kinoptona soi Lhadou 2009 achun anakai uveí ati. Amahon hiche a chun, Naga mite lah a kipumkhatna le kingai damna chuleh kilungset nale chamna aumtheiya khangluiya pat a amaho kivaihom nading tha anei uhi suhhat a adei atup u suhbulhit nading ngaito na ahi ati.
Hiche kikhopna a lamkai dang dang ho houlimna neihon asei pipen uchu ahileh, Naga hon lungkhat
tah a pan alahkhom lou uleh amaho kivaipoh nadinga boina umhi itinama jongleh kisulham thei lou ding ahi atiuve.
