Lhatun, 2010 a sepai 76 atha jouvun Maoist hohin Chhattisgarh munah bomb apokehsah un mi 30 anathatkit uve. Maoist ho boinahi military ahiloujeh in military hin sudamthei ponte. Home minister Chidambaram'n huikonga bomb lhahkhum louding ahi, huikong hin Maoist ho akiselnao leh achaloh danbou avetlhih ding ahi atijonghi phat sottah chepithei ahipon, hung losam thou-thouding ahi. Akipat tilchun AP chief minister R. Reddy hin Maoist hohi kihoucham piding anagon ahinlah khat hohin akigontup nadiuva phat suhsaona dinga aman got'u ahi ahetphat in lungthim thah akhengin police hokeu nganse louvin sorkar thaneina jouse amang chatai. Masanga Punjab ten anabol bangun police akilahben, galkapje hoitah akichuhsah un, manchah hoi atuhsah un, atounadiu gari leh kihoumatto nalang asemhoi taove. Abannin, Maoist ho tamnalah a hin lamlen tampi hoitah in alhunsahtai. Ajehchu, Dantewada a imubang uhin lamlen tamlouna gammang behlentah khat venbitding kitihi thanga onading bailamtah ahi.
Lamlen hoitah a alhunlut hohi police station thah phudohna ding seh a manglouvin sorkar office tampi - irrigation, school, lou-in, welfare services (anchang manbaitah a kipe leh natoh pehna) jong akiphut dohtai.
Maoist ho thanei laichun sorkar natong hohi ajam mangun aonga adalhah uchu Naxalites hon kinop chepnan anei uve. A ongkom huhdinga hin Reddy hin sorkar natohna tampi akoilutne. Hitahchun, agamsunga milham hohin sorkar hin Maoist hohi hetheng mong mongding agot ahitai ti ahintah saníun, hijehchun police hon Maoist ho velhi dingin agam miho apansah theijun, agam miho kithopina amujallun Maoist hohi asuthip taove. 1990 kum velchun Maoist ho hanta ah MLA koima akithah ngampoi. Ahinlah, Reddy in adihlam tah a lungthim akhenjeh hin Maoist ho chalohna hi adailhatai. Vetsahnan, 2005 kumchun mi 211 leh police 25 athat un, 2009 kumchun mi 17 bou athatnun police khatcha athat phapouve. Inchen langin jong anikhan jengun ahi. Hijehchun, sorkar sangin Maoist ho noijah inchen khosah akitupjoi tia Maoist panpihon asei uhi adihloudan mudoh thei ahi.
Hibanga strategy hoihi Chhattisgarh a jong ibolla kipodoh lou hitam? Ajeh pipenhi centre leh state sorkar thaneina akipehtoh theilouhi ahi. Military leh paramilitary hi Centre sorkar noija um ahin police hi state sorkar noijin aumme. Chhattisgarh a police ho alolhing tapon, R. Reddy tobang lamkailah aumkit ngalpon, hijeh a chu Chidambaram hin centre sepoy hochu atollut ahi.
Ahinlah, hichihi adamlouho jendamna dinga lou dihlou kinehsah tobang ahibouve. A.P. state a Maoist hatnalah achun lamlen tampi akilhung lutnin gammang beh lentah aumtapoi. Ahinlah, Dantewada a hin lutna theilou khopmin gammang amang jejun, lamlen themchabou aumme. Hichu munna sepoy kisollut chu toset atodiu hetnasa ahi. Chhattisgarh hi alhangpia tribal tamna ahin, lamlen lhomcha aummin, gammang alennin, sorkar office atampoi. Maoist hohi sorkar dan'a um ahitaove. A.P. sorkar lolhinna hi Maoist hatna state dangho jong-hin kihilnan neiju henlang hileh Maoist hohi ol ollin kisuthip thei tante.
Mi phabep geldanin tribal gamho ahin panchayat kilheng henlang amandiuvin sumjong neng chet in
kipeleh tribal ho lhasetna leh akitumse naohi beitante atiuve. Hitheiding hileh dei aumlheh e. Ahin, Maoist hohin panchayat khutna sumleh thaneina ahung dinghi nomkit loudiu ahi. Maoist hohi sorkar hin namphu a ajophot ngaija ahi. Chujouteng chuleh sorkar natohna leh adang khantouna thei tohgon hochu lhalut thei ahitai.
