Lamka, Lhajing. 13: Kuki nam mite Zalensah nading gelkhoh najal a KNO hinjon Kuki National Front (Samuel) le adangho chungah kakipana lentah achung uva kahin phongdoh e tin Pu PS Haokip President, Kuki National Organisation a konin thuphon akimun ahi. Hitobang toh-gon kineihi achesa kum 50 masanga pat ana umkhalou chule ana lolhing joulou khatchu athah beha Zalengam muna dinga KNO in kigong ahi atin ahi. Hiche kipa umtah thilpha sodoh nakon a hi Kuki nampi sepai UPF noiya umnalai honjong ahinbel dingin agaldotna thupha jong aphongin ahi.

Masangchun kitha kimat tijat naleh dei umlou tah inhinkho anchelha jongleh tua GOI toh kihouna a hi KNO noiya chelhah a kitup tah le kitoh tah a nampi makai ding injong temna aneiyin ahi. Adehsetna KNO noiya kikhai khoma eisuboi thei NSCN-IM ahin UNLF ahin amahoa kona eiki khentel sah gotnau va kichih thei dingin jong lhangsap khomdin temna aneiyin ahi.

Thil neocha hoa kibouna sosah louhel a vannoiyin eihet nau Kuki noiya thakhat tah a ilon khom uva Pathen in eipeh Pu le Pa tehon eidalhah peh nagam jouse muthei nadinga Aimol a kipatsa Zou chan (A to Z) in pan ilah
cheh diuvin pan lakhom ute tinjong aphong in ahi.

KLO/KLA in UPF dalha a KNO jonta
Saikul, Lhajing. 13: United Peoples' Front (UPF) kiloi khomna kana umsung chun maban panlah nading thua kihouna kineijing nama jongle phatchom natheitah kigelkhalou chule organisation hinah a jong kicheh tah a doi le tup ana umthei loujeh in Kuki Liberation Organisation in UPF kiloikhomna dalhan Kuki National Organisation joh kabel tauve tin Kuki Liberation Army a General Secretary Pu L. Timothy Kuki chun thuphon aneiyin ahi. KNO kiloi khomna hin lunggel pilhin natah aneiyin chuleh Kuki hinah a Kuki min'a kiloi khomding toh-gon jonghi aphatna khat ahi tin-jong aseiyin ahi. Alangkhat ah UPF sung ahin thakhat tah a dinkhomna aumkhapon kihouna akinei jouteng thulhuhna nahsah louvin aning anop cheh in aumdoh jitan ahi, chukeu hilouvin kipun khom'a thakhat a din malah in kitha tona joh a aki umhi mipi honjong aheuve tin Pu Timothy chun aseiben ahi.

Alangkhat ah KLO/KLA chuleh RGOK/KRA in India chamlhat nikho ahung naitoh kilhon a Manipur gamsunga cheng mipiho jouse chunga Independence Day nikho akinit jing bang'a gamsunga cham le lung monna aumjing thei nadingin lemna thupha ahin phongin ahi.

KCFI hon nikho 3 le akeh Seminar neiding
Imphal, Lhajing. 13: Life Word Seminar of South Korea in sponsored abolna noija Kuki Churches Fellowship International (KCFI) le Kuki Inpi Manipur (KIM) toh kitho khom'a nithum le akeh seminar Lhalam nisim 30 a pat Ellha nisim 3 geija Imphal Christian Church KCC, Church Road Imphal munna aneidiu ahi. Life Word Mission Team hi akipejoutah Christian ho kiloi khomna ahin leiset gam tinnah na atong uvin,chonse hon alung ahei uva sochatna akisan theina diuva Jesu Christa Gospel thupha hi alhang sapleu
ahi. Mipin bailam thetna ahet theina dinga Pathen thu asei hohi video tobanga mitna jong avetsahjiu ahi.

Akikou haosa jouse, khangthah lamkai holeh jingun jousen registration form hi amuniuva pat nisagi sunga ahin pehlut diuvin hetsah ahi. Tepna lekha hi Lhajing nisim 30, 2010 masanga kithotdoh ding ahitai.
Simlai lamkai ho, kiloi khomna leh lom lamkai hon seminar kibol sunga bandh koulouva akithopinao avetsah dingin lamkai hon ngehna anei uve.

Christian jouse adeh a Manipur gam sunga Christian ulenao jousen leiset chunga Pathen lengam kehletna aumtheina dinga Kuki Chiefs Seminar lolhin theina dinga khatveibeh taona aman dingin tem ahi. Sumle paija kithopina penomhon jong apehthei ahi.

Voluntary Blood Donation Camp 2010 um
Imphal, Lhajing 13: Manipur a Patriots Day nikho ahin min amanop natah a thisan atona thei Camp 2010 chu
NACS Imphal, Immuno Hematology Dept RIMS, Yanbi Peace Educational Trust, Kangabok, Popular Youth Club and Blood & Eye donors association (BEDA) makaina noijin Lhajing nisim 13 achun Khangabok Part II mun ah ana ummin ahi.

Commandant 15 Assam Rifles chu Chief Guest in aga pang-e. Civil mi Kh. Kumari Devi, ZP member, Khangabok, Kh Manitombi Devi, Kangabok Part II a Pradhan, Social natong hojong agajao uvin ahi. Commandant 15 AR hin eima nopna a kiphal thengtah a society dinga thisanpeh aphatchom dan asei jouvin Saplen mi 4, JCO mi 2, sepai 26 leh civil mi 35 hin thisan apeuve. Khangabok khomite chun AR hon thisan apeh uchu akipapi lheh un ahi. Thoubal district a security force hon mipi lungdei achan theina diuva anatoh holah a khat ahi.

MUTSU Exe Meeting um
Imphal, Lhajing 13: Achesa Lhajing nisim 12 nikhoa Manipur University Tribal Students' Union office munna kihouna a kiphatsah dungjuiya 2010-2011 session a dinga executive members thah akilhen masangsea Ex-President pan apoh jom dingin phatsahna aumin ahi. Hiche meeting achun Executive Committee toh Core Member Committee ho anapangin ahi. Information Secretary, MUTSU in thuso apehna achun, Lunminthang
Michael Haokip chu Chairman Election Committee in akilheng in chuleh Adakho Poji leh Katingpou Panmei jong EC member din akilhengdoh e ati. Chuban ah, Core Committee meeting jongchun MU authority ho komía ST ho dinga Special Recruitment Drive kibol chu gangtah a aphondoh diuva tepna pehding in phatsahna aneiy uvin ahi.