Boina jonghin Kashmir politics atong khalheh-e. 2009 kumía Omar Abdullah, Chief Minister ahungkai chun mipihon khangdong, lung ngam leh nehguh lahguhna langa kinunatlou atiuvin achungah mipihon kinepna aneilheh un ahi. Kashmir boinahi lampi chomjep'a kasuhlhap ding ahi tin ana kitep'e. Ahin, tu a hin aminche nahi akikhosuh tho jengtai. Election campaign abol laija neilou gentheiho thanopna dinga thungei tampi anasei hochu tohmolso ding agotapoi. Thu aboiseh a Delhi ache jonghi mipi hohin ahnou banga kichase Delhi in remote-control a adeina lang langa aheile ahi atiuve.
Kashmir boinahi security boina sanga leadership boina ahi tithei hinte. Lengte insunga hungkon ahivangin, Omar hin niseh a thilsoh hohi ahephapon, hetding jong agotlou ngap ahidem tia geloijong aum'e. Minister anei hohi akimudoh pouvin chuleh ama jengjong office a koníin apotpoi. Asuhkhel len penhi Kashmir boinajeh a kitong khaho chunga ahepi nabeh aseidohlou, chuleh galle tollah a hungseilen natohna neilou chuleh khonunga dinga kinepna neilou khangdonghon angaichatíu donlouva akoipeh hi ahi.
Omar hin akaidoh til'a mipilah a aminche nahi iloutheh in aman sahtai. Chief Minister akaidoh tilchun Kashmir gamía boina adailhel jengtan, 1989 kumía thuboi kipatna pat hitobanga chamna umkhalou ahi. Kashmir boinahi Omar seh-seh them mosah thei ahideh poi. Pakistan hin phat lemchang amupou pouleh boina semdinga phasa dem'a umjing ahin, Pakistan'a pansa galguhbol ho amanchah utoh Kashmir gam'ah akichat-pouvin, separatist lamkai Syed Ali Geelani in thu neochakhat jong lentah sosah dinghi athanopna leh abol theilang ahin, Mirwaiz Umar Farooq tobang moderate lamkai phabep hi galguh bolhon adei dei uva amanchah kit theiju ahikit leuve.
Opposition lamkai Mehbooba Mufti leh aloi hohin election kitlehin itileh Omar hi kakhel thei diuvem tia achan lhihkeo kit'u ahi. National Conference leh Congress lamkaiho jonghin Omar hi atosot pouve. Omar hin New Delhi a Prime Minister leh Home Minister akimupi a ahung kilechun 'political packageî thahkhat kapehding ahi atin, ahinlah tua boinahi asang behseh tan 'political package' mai maijin asuhlhap thei dingin tahsan aumpoi.
Kashmir boina suhlhapna dinga sepai sollutbe dinghi bol louva khoh chu ahinan, hijongleh aphapen vangchu ahisampoi. Sepai sollutbe sanga aphajo chu political lamkaiho kikah a kihet themto louna suh lhap'a thakhatna adin khomdiu akulle. Ajehchu, sorkar vaihom'a pangho akithutoh pouvin akithang thipto uve tihi mipileh galguh bolhon ahet teng uleh itiba sorkar chu jana apehthei diuham. Aban in, state leh centre sorkar hin Kashmir boina lenpenhi ipiham aholdoh a asuhlhap gotding ahi. Achuti louleh mipi kipa nading tia thil neocha cha kibolpeh mai maichu nungah hon phat chomkhat seh a dinga lipstick-powder akinu tobangbou hinte. Kilosetna a dimset politician hokhun abol loudiu thu tamtah in mipi akinepsah un ahinlah khangdong hokhun kitha
kimat tilou kinepna thei ima amuloujeh uva kamphat ochenghi kangaichim taovin boina suhlhap nading ësolutioní eipe taovin tia thiding jong ginglou khopía kiphin ahiuve.
