Bucharest, Lhamul 27 : Romania gam'a Israel military helicopter khat training exercise anei pet in apohkeh in sepia mi 4 athie tin ministry of defence chun aseiye. Helicopter in toset ato pet tah chun asunga Israel sepia 6 leh Romania sepia 1 atou un ahi. Tu chan in thilong 4 akimudoh in ah. Toset ato na hi Carpathian mol lah Brasov khopi kom ahi.


Mol lah ahina chung chonna mei akai jeh in huhdoh natoh deibangin amachal theipoi. CH-53 helicopter chu 'Operation Blue Sky' a kimang ahin kichuna anei pet a mol ata khah jeh a pohkeh ahi tin akoma cheng Mayor Gheorghe Hermaneounu chun thuo miho koma aseiyin ahi. Achesa 2000 kumía pat Romania leh Israel hin military lam'a kinoptona leh kitho khomna ananei pat lhon ahi hichu athah beh a 2006 kum'a chu ananei kit lhon ahi. Hiche kinoptona jeh a chu training jong abol khom ji lhon ahi.

Serbia Parliament in Kosovo thua athah beh a kihouna som
Belgrade, Lhamul 27 : United Nations a Kosovo thu athah beh a sena aum nadin Serbia parliament in aphatsah in ahi. Kosovo hi tua atum beh a chamlhatna amu apat kivaipo ahin gam 70 tobangin hetpehna anei ahitai. Pung kal 12 sung kinelna aum jouvin vote lhahna aum in Pristina independence declaration thu athah beh a seiding nom chu 192 ahin anom lou 26 chuleh vote lhah lou 2 ahi. Kosovo in 2008 kumía Serbia akon chamlhat anamu chu vannoi kivaipohna dan atongkha poi tia International court of Justice in kal masa chun anaphong doh in ahi. Hinla Serbia in Kosovo hi southern province khat in um jing hen ati. Chuto lhon chun president Boris Tadic in jong itih chan hijong leh Kosovo hi chamlhat gam ahi tia kila lou ding ahi tin parliament a aseiyin ahi.

Kosovo chung change kinelna aumna a opposition ho nasatah in sorkar officials ho demna anei un chuban leh Tadic le Jeremic jong atohmun lhonna kon ahai lhon din ngehna anei un ahi. Albanian mi tamna Kosovo hi US leh EU akon gam 22 hon independent state ahitai tia hetpehna jong anei u ahitai.

African Union in Somalia a sepai sol be ding : Ethiopian minister
Kampala, Lhamul 27 : African Union a lamkai hon janhi chun Somalia gam'a Shebab galguh bol ho suhthip nadinga AU peacekeepin kisol be ding ahi tin kinoptona anei un ahi. African Union in kikhopna aneina a Intergovernmental Authority for Development (IGAD) kiti east African gam 6 kiloikhom hon sepai 2,000 athum be uchu phatsahna anei tai tin Ethiopian foreign minister Seyoum Mesfin in aseiye.

Tupet a Uganda leh Burundi akon sepai 600 Mogadishu khopi a aum banna African Union in sepai kisol be ding ahitai. Kikhopna achun AMISOM (AU mission inSomalia) adin budget leh manchah ho choh nading phatsah na jong aumíe tin Mesfin in aseiye. Islamist galguh bol Shebab ho hin tu petna hi central leh western Somalia a vai apoh u ahi. Amaho hin masang jep tichu Lhamul nisim 11 nia Uganda khopi Kampala bomb 2 a buluna um jong chu keiho kahiuve tin kiphonna anei un ahi. Hiche nia World Cup ve dinga mipi kikhom lah a bomb 2 apohkeh na a mi 76 anathi un ahi.

Iraq gam’a bomb 2 pokeh jeh a Shia mi 40 thi
Karbala, Lhamul 27 : Janhi a Shia ho khopi Karbala mun'a houthu a kikhopna a bomb 2 apohkeh in alhom pen in mi 40 athi in chuleh adang mi 68 akitongkha un ahi tin atahsa tah a mu holeh doctors hon asei uve. Bomb masa chu pathen lhai dinga hung ha lah a suicide bomber khat in bomb apoh chu apokeh sah in mi 18 athi in ahi. Minute phabep jouvin hiche mun ahon 300 metre tobang gamla mun'a car bomb apohkeh kit in alhom pen in mi 22 athi in ahi.. Bomb pokeh namun chu Baghdad khopi akon 118 kms a gamla ahi. Shia hougut ho mi asang aja a Karbala khopi a Iman al-Mahdi nikho a pathen houva ahung kikhop pet tah a bomb a kibuluna chu um ahi. Mipi ho vengbit dingin security forces mi 30,000 akikoi vangíin boina chu ana um thou thouvin ahi.