(e) Alhen ding dan : Akilhenna dinga hi anatong hon athemsa le athem thei dia kinep pithei bo avet le uva alhen diu ahi. Alen’a hile aneova hile hitia chu alhen diu ahi. Asot sot teng le min ahin hol tho le chele ngailouva amumna lahden thei hiding ahitai.


Numei ho a.
Golseh Bollooi lah a hi numei ho a jong umding ahi. Numei ho lah ding dan hi pasal’a to kibang tam’inte. Asandan le agih dan vang achomjep ahi angainai. Pilhing ho a chu anem pen’a feet 5’,hiding agih lam 45 kg chunglam hiding ahi.

A. School khat man ding : Golseh Bolloi hin School khat atum a aneijou loule School khat lhen’a apang nom ho chu hiche schoolía chu kai diu ahi. Chapang ho chu school kailouva umthei lou diu ahijeh a chu school khat to kihou toh akitho ngai ding ahi. Golseh Bolloi lah a jaonom ho chu hiche school a jong chu kai diu ahi. Sum alhin thei ding le amaho fee chu golseh Bolloi chun apeh peh ding ahi.

B. Asumsan'u Sempeh ding : Golseh Bolloi hi sum alhin thim le alen lam ho hi asum mudiu tamsah dom ngaiyinte. Achuti loule ahung let jep tengule club dang hon kichoh doh tauvinte. Hijeh a chu amaho sumsan ding chu club dangho peh jat to kibang thim'a peh ngaiyinte.

C. Kitetna Tournament Bolji ding : Golseh Bolloi dinmun akihet jing nading le gamsung pumpia golseh lam’a thepna amachal nadia kum khat khat le kitetna tournament lentah tah gonpeh jiding ahi. Prize atam chanía mipi kichoh thou ding ahi. Hiche kitetna hohi Golseh Bolloi gon hijongle gamsung pumpi kitetna hiding ahi. hiche a chu amasapen’a eipao tho ho a ding hiding ahi.

Hiche tournament lentah hi Olympic tobanga golseh jouse umding ahi. Aloi loiya hihen mimal’a hijongle golseh namkim umding ahi.

8.6. Golseh Bol Hou to Kitohmolou.
Golseh apha bepía bol hi tahsa a le lhagaova, chule lungthimía kisuh halna ahi. Tahsa akisuh hal chan'in lungthim le lhagao jong akisuhal theiye. Golseh bol hi lhagao thua kon'a pampetna a mang louva lhagao thua hatbena dia kibol ding ahi.

Golseh chu aselam'a heidoh thei apha penía jong heidoh thei ahi. Golseh chu ju le sa neh le chonset dang to akitho le chekhelna ahitheiye. Ahinla hou to kikal louva bol thei ahi. Houthu ato kikal lou dia atheng a bol ding ahi.

8.7. Golseh Bol hi Khangthah Tamtah Semphatna a Manthei Hinte.
Khangthah tamtah din moh um, bol ding helouva um hi setna kipatna ahi theiye. Natoh onkah a kisahlelna a golseh lam hi manchah thei ahi. School kai loulai ham, toh olpet ham le golseh bolji hi khangthah tamtah semphatna a man thei hinte. Khangthah bolding, tohding helou ho chu golseh a alunglut a kona semphat thei tamtah umíinte. Khopi sunga um gollhang le nungah moh um, toh ding neilou, lekha sim la jom talou ho hi golseh lam'a lunglutna thei sempeh aphai. Amaho ding chun lou natoh ding la aumpon, lekha sim la anga tauvin, sorkar natoh ding la amu hih laiyun ahi. Hitobang ho dinga chu golseh lamía alunglutna theiyu aum jongle phachom ding ahi. Ajeh chu hitobang loikhat chu acheset nadiu lampi umthei atamjie. Hitobang dinmun'a umjeh a chese atam theiye. Hijeh chun amaho dia hi golseh chom chom koiya machalsah ding in aphai.

Loichom khat chu ahikit le khopi sunga school/college kaiya umhon jong phat ong anei tam jeh uva chese thei jong aum jiuve. Lekha hasimlou, school kikhen teng phat ong tam neijeh a aloi agol ahiloule thil dang in apuiset aum theiye. Hiche ho ding jong hin golseh a panna aume'e. Hiche ho chu golseh a thanopsah a lekha simlou kah kah le akichepna diu aum theina dia gon teiya pha ahi.

Lekha sim'a lunglut louhel ding mong mong loikhat dia jong golseh lam hi kivahna a aman theina diuva lampi sempeh thei ahijong le habolsah ngal thei ahi. Golseh a hat loikhat hin golseh a hat theina dingin, neh kitim, ti kitim ho jong ahabol theiyuve. Golseh hi mi tamtah semphatna thei ahiding ginchat umtah ahi. Hijeh chun golseh habol ding hi nam khangtou nom ho dia habolía bol ngaiya ahitai. Pannabei mi tamna nam chu nam noinung ahijinge.

banjom nalaiding...