Vanghomni chun state Director General of Police Shankar Baruah makaina in police officer lentah tah, CRPF le civil official hon Lokpriya Gopinath Bordoloi International Airport muna huikong a hung kipo thilong ho jana kin anabol uvin ahi. CRPF personnel 26 thi ho lah achun Dhrubajyoti Das, Rajendra Nath Das, Anjan Phukan, Arjun Goyari, Sohail Rana leh K Sinha hohi Assam akon ahiuvin akitongkha holah a Safikul Islam kitipa jong hi Assam gam akon ahi. CRPF thilong 6 ho chu amaho sakho dung juiya vuithei nadin Vanghomni chun ainsung mite khut a akipeh doh tai.
CRPF a IG, Balbir Singh in thuso miho koma aseina a 'Gamsung ngailut najal in amahon a hinkho atoh doh
uvin chuleh hiche hin khangthah ho CRPF a jaonom louna lungthim neisah deh ponte ati.
Dhrubajyoti Das hin graduate ajo jo a 2004 kuma chu CRPF analut ahi.
'Kachapa chu defence forces a jao ding bou atha anom in hijeh chun graduation achai chai in natoh ding dang jong CRPF jawans thiho jana kipe agelpoi' tin Dhrubajyoti pa Gopal Das in aseiye.
Rajendra Nath Das kiti pa hi Sivasagar district akon ahin 1983 kum chun CRPF a analut in ahi. Kal masa Lhaphul lha chun a insung mite toh Rongali Bihu aman jouva lha kichai lama natoh abanjom kit ahi. Amapa hin angaitah aji le chapa 2 adalhah ahitai.
'Rongali Bihu sung chun kipahtah in kaum khom uvin tunvang ima jouse amang gamtai' tin Rajendra jinu Usah
Rani in aseiye.
Arjun Goyari hi ahileh thingnoi ho tam nalah Baksa district muna cheng ahin. Ama chen na district a aloi hon
thingnoi a jaoding atep laitah un aman CRPF joh ana kilhen in ahi. Arjun hi football kichem mi ahin chuleh inter-district tournament hoa jong ana jao jin ahi. 'Amahi musician mi jong ahin. Ipi instrument hijong leh akhoi thei soh kei e,' tin aloi hon thuso miho koma asei uve.
Sohail Rana hi ahikit leh Barpeta district akon ahin amaho insung a dia sorkar natong amabou ahi. Ama
chunga pasal ni aum in ani lhona loubol gel ahi.CRPF ho buluna chunga Assam Government in hatah in demna
anei uvin ahi.
Assam Chief Minister Tarun Gogoi in aseina a igamsunga kon sepai thi hohi 'hansan vetsah na ahi' ati. State
government in athiho insung mite din dangka lakh 2 cheh apeh diu ahi.
MNF returnees hon Mizoram dinga High Court ngehta
Aizawl, Lhamul 1: India sorkar leh MNF hon 1986 kumma Peace Accord kinop tona soi anakaikhum
dungjuijin Peace Accord Mizo National Front (MNF) Returnees Association (PAMRA) hin centre sorkar
komma atumbeh a Mizoram dinga High Court aganna thei channa akoi dingin ngehna aneije. New Delhi leh MNF kikah a Memorandum of Settlement (MoS) chun Mizoram hin atumbeh a High Court aneithei ahi tin aseije. PAMRA hin tamtah veihi eibolpeh taovin kati vangun aphachompoi tin aseije.
PAMRA hin amollemsa Pu. Laldenga lungtup molso theina dinga Mizoram sorkar komma hichi thua hi pan
alahna dingin tepna aneije. Amaho jonghin, MNF leh India sorkar'n MoU a akinopto dungjuija gamdang hotoh border trade ahonna dinga state sorkar hin pan alah dingin angeh un chuleh MNF a anapanga natoh neilou hohi natoh onglai hoa ahet diuvin Mizoram sorkar komma ngehna aneije.
National
Delhi University in cut-off list athum veina phongdoh
New Delhi, Lhamul 1 (PTI) : Delhi University noiya colleges tamjo a seat a ong aum tah lou vangin cut-off
list athum channa tuni chun akiphong doh in ahi. Ahin B Com (Hons) course sim na dingin cut-off marks chu 90 percent chunglam in aum nalaiye. Third cut-off list akiphondoh vangin college atam joa Economics (Hons)
cut-off marks chu 94.75 apat 96.75 percent ahin Hindu College a 93.5-96.5 percent ahi.
Hiche college ho ahin Economic (Hons) admission vang akikhah tai chuleh Miranda House leh Venkatesh war college a jong admission akikhah tai. Alangkhatna Lady Sri Ram College a B Com (Hons) simna dingin 94.5 percent anem pen ahin chuleh Deen Dayal Upadhyay college a 89 percent ahi. College atamjo a OBC Category a admission phat akichai hih laiye. B Sc Computer Science simna dingin college atamjo a admission phat akichai tai. Tu hin Hindi, History leh Political Science ho adingin ahung lhung ding Lhamul 2-5 sunga
bol thei hi ding ahi tin University thuphon chun aseiye. Admission phat akipat a pat chun simlai mi asang a
sim in Delhi ahin jon uve akiti Admission a cut-off list masa pen chu Lhadou 22 nia chu ana kiphongdoh ahin aban na Lhadou 26 in anivei channa ana kiphongdoh e.
Huikong touman tunia apat aman kal ta ding
New Delhi, Lhamul 1: Sorkar in service tax lah dinga aphondoh to lhoon in tunia pat huikong tou man gamsung leh pama dangka 103 leh 515 a kal ding ahitai. Sorkar in 2010-11 Budget a huikong tou na a service tax 10 percent lah a kumkhat leh dangka 600 leh 1000 crore muding tohgon anei jeh ahi. Domestic leh international huikong touna man kal hi class jouse a kal ding ahi. Hinla airline a natong holeh UN staff ho vang hiche service tax hi apeh lou diu ahi. Department of Revenue in aphondohna a domestic kholjin ho 10 percent kila ding chuleh international passengers ho 12 percent kila ding ahi ati. Hinla Northeastern states ho
Arunachal Pradesh, Assam, Manipur, Meghalaya, Mizoram, Nagaland, Tripura chuleh West Bengal state a Badogra mun ho akon kipan doh ahilou leh cheding ho vang hiche service tax hi kila lou dingin akiseiye.
Chuban lehJammu and Kashmir state a Srinagar, Leh leh Jammu airports hoa lhung ho leh akipat doh ding ho akon a jong hiche tax (kai) hi kipe lou ding ahi. Hitobang tax kilah kigot hi all India Carriers leh airlines body
chuleh International Air Transport Association in demna nasatah anei un ahi. Hiche jeh chun sorkar in domestic travel ho dangka 100 chuleh foreign travel ho dangka 500 in akal sah tai.
