Natoh hin mihem hindan avetsah theije. I society uvahin numeihon gimtah a na atoh houhi akigel sang poi. Ajehchu, atoh houhi mutheitah a summuna aumpon chuleh society in natoh thupia agellou ngen ahi. Hijeh hin numei natoh hi akive nemmin, anatoh naova angaichat houjong akidonse pehpoi. Numeiho tohdinga kikoidoh - insung suhtheng, chapang khoukhah, buhon, kongsop, changsep kiti hohi summuna khatcha aumpoi. Tohdang neijongleu insunga atoh diuhi atohtha thou-thou uve. Saple leng hijongleh "nunei chu
numei ahi" tin paochamtuh dannin inei uve. Numeijin natohna ahinnei tengleh insung natongding aumji tapon, dong manin acha numei chapang ahilouleh atehpin chatmo sasan atongin, hichi jonghi ahithei louleh chollheh jongleh aman akitoh jitai.

Numeijin natohna anei nungajong insung natoh abonna kinotkhum tei-tei vanghi dih jouding hinam, hoitah a gelphat ngaijinte. Atilouleh, insung kena jong hung umthei ahilouleh anatoh naova lhahsamna aneitheiju ahi. Hijehchun, numeijin na atoh tengleh pasal injong ajo channa insung natohna a akithopi dinghi deisah aumme. Numeiho insung natoh hi sumle nehlona ahilou vanga hetpehdin aphai. Numei hochu lungset aummin hijeh chun pasalhon insung natoh in kithopiu hen tina ahipoi. Amavang,
sumleh nehding loa numeijong apan tahleh, insung natoh chu abonna ibolla amaho mopohna hitei teiding ham? Aboina hi chapangho ihin khoukhah dannun apoloupan
ahitai. Nupi hochun acha pasalhon insungna atoh uleh voujangnat aumme tin avejou pouvin, ahinlah achanu ten atohteng uleh katha akheltai tin akipah jiuve. Pasal chun insung natohna a aji akithopileh thainelou akitin inuisat jiuvin, numei jongchun ajipa kithopina a na atoh a sum aloleh koiman apahcha poi. Hisang chun anatoh naleh insunga amopohna chu aleptoh jing angaije. Insunga atohding chu ahung lhahsam thimleh insung avetnomlou jeh a na atoh ahi tin mi seiset achangji tai. Hitobanga lungput ineijeh uhin numei-pasal kibang chetna iumna thei diuhi agamlalheh nalaije.

Mi atamjo hin numei hon sumloa na atoh diuhi idei naovin, ahinlah pamlanga na atohnung uva insung natohna a ngaijang angaije tivanghi isangthei pouve. Numei natong hochun insung natoh jong avettha ahijeh in office kaisunghi amaho dinghin kisuchom theileh deilheh unte. Alang khatnah, numei natonga goiho hin pasal tohjat atoh diuhi adeikit uvin, society injong a insunga boina aumtengleh ama natohjeh ahi tin them-
mo achansah kitne. Hichi hohi ajeh hoitah a ikholleh numei hon sumloa na atoh uhi akikhel gang behseh in alang khatna ajiteu, numei natonga goiho leh society lungput danhi akikhel ganglou jeh a boikha dannin akilange. Pasal lungel hi akikhel masangsen numei ho dinmun hi dihjou tah-tah ponte.

Kum sangthum masang chun Lemuel kiti pahin Proverb bung 31 a khun numei phatah khat thusim anasunne. Amanuhi kiseiboitah a natong, a insung vekol, kiveija sumhol chuleh louna jong atonge. Aphatna hohi suh millin aumpoi. Ajehchu, achaten achunga kipana thujeng aseikhumun, ajipan jong apahcha lheh jenge. Lemuel khanglai sangin tukhanga numeiho natoh hi atamcheh tai. Tuhin, miji, minu, nurse, jilkung, neh hol leh louna tongin apang taove. Achateu neh holna din- gin akipedoh uve. Amaho jonghi seiphat le pachat chang dinga lom hilou uham?

Numei tampihi insunga neh holna dingin na atong uve. Achateu lungset leh ngailut thu ahillun ahi. Achateu aneolaija patnin noi achepsah in, achate dinga jilkung masapen ninjong apange. Chapang paohil, cheje kithem chuhsah chuleh insung natohje kichuh sahchu nute bou ahi. Nutehin na atohteng ujongleh pasalho sangin alolhom jiuve. Insung vahna dinga natong ahijeh un hitia kidangdatna hi amaho din athoh hahlheh inte. Thinglhang gamma vaichatna asanjeh in nupi louna tonglou aumbehseh poi.

Hijeh chun, numei hohi jana pehdinga lommong ahi, anatoh ujonghi mutheijin kilanghih jongleh hetpehding angaije. Atoh naova achollheh vangun koiman pachat thujong aseikhum ji pouve. Society in numei avetnem nahi suhdih thei ahidem?