Washington, Lhadou 9 : Obama vaihomna a South Asia mopo khat in aseina a Pakistan koma military kithoina kinei hi India douna a amanchah lou ding ahi ati. Hiche thu hi kal masa a US leh India in Strategic Dialogue thua kihouna anei lhonna a kipo doh ahi. Hiche Strategic Dialogue chu External Affairs Minister SM Krishna leh
secretary of state Hillary Clinton makaina noiya ana um ahi.
Assistant Secretary of state for South and Central Asia, Robert Blake in thudoh donbutna aneina a Pakistan gama galguh bol ho douna dinga Pakistan military lama kithopina kinei hi India in ahet them ding kakinem e ati. Chuleh galmanchah kipe ho hi India douna a pakistan in amanchah thei lou ding ahi tin Blake in aseibe in ahi.
Belgian school a muslim jilkung khat alu pon akhu jeh a kihaisah
Brussels, Lhadou 9 : Belgian High School a Muslim numei Maths jilkung khat in class alah pet a alu pon akhu jeh in school jilkung ahina akon in ahaisah un ahi. Brussels lhanglam a um Charleroi muna school a thunei vaihom hon Turkey a peng muslim jilkung nu koma amai khu alah doh dinga thupeh anei vangun amanu anom poi ajeh chu hiti ahi achesa kum 2 leh akeh kahin chepi ahi tai ati. Class alah teng amai khu alah doh nom lou jeh in school authorities hon amanu chu atohmun akon in ahai sah tauve. Hinla amanu in amai khu alah doh nom lou jeh in court a case abol in ahi. Amasa chun Charleroi tribunal in school board ho apanpi in ahi ajeh chu Belgium a um franco phone community lah a hou thu a neutral hi ding chu apom u ahi.
Iran satellitte technology thu a mi 6 kiman
Washington, Lhadou 9: Iran in Camera um satellite 2005 kum a ana kapdoh jeh a hiche technology aguh a peson American mi 1 leh Iranian mi 5 ho mat doh in aum tauvin ahi tin justice official in tuni chun aphong doh in ahi. Hiche mi 6 hohin aguh a satellite hardware leh technology chu Iran ana
pehson ahi. Hiche jeh chun achesa Ellha 27, 2005 kum chun Iran in Russia gama kon in satellite camera kibuto chu vantham jola ana kapdoh ahibouve tin Justice Department thuphon chun aseijin ahi.
World War II laiya songkul tang lah a hingsot penpa thi ta
London, Lhadou 9 : World War II laiya German songkul a um Allied forces hon jamdoh nading leiko
mun 3 avu uva mi 200 tobang hon jam doh ding agot nauva anapang Jack Harrison chu kum 97 alhin in athi tai tin a insung miten asei uve. Songkul a pahcha vesui a um Harrison chun leiko kilaina a anen ho chu aman ana pai mang ji ahi. Ajam doh ding mi 200 lah a Harrison chu 98th channa pang ahi. Amaho umna mun chu Sagan kom Stalag Luft III prison akiti in, tua hi Poland gam ahitai.
Achesa lhakao 24, 1944 kum chun aban neichan khat khat in ana jam pan un hinla mi 76 bou ajam doh jouvin guard hon ahin hedoh tauvin ahi. Mi 76 jamdoh lah a 3 bou ajam mang pai pai un adangse chu anung mat kit un mi 50 chu Hitler in khailih din thupeh aneiyin adang mi 23 hochu songkul a aum sah kit un ahi. Harrison phat vang aphah man lou jeh in songkul a anung lhai lut loiyin ahi. Hiche thusim chu 1963 kum chun ‘The Great Escape’ tin film abol doh un ahi. Harrison in aseina a kaphat alhin lou chu keima dinga hamphatna ahi ajeh chu ajam a kinung mat kit hochu atamjo akikap lih uve ati.
Israel in Gaza blockade abol ladoh tading
London, Lhadou 9 : Masang jep a Gaza strip hin jon neh le chah po Turkish kong Israel in amat a asunga tou mi 9 atha chunga international inquiry aum dinga Israel in aphat sah to lhonna Gaza Strip a blockade abol jong alah doh ding anom in ahi. Israel in blockade alah doh ding thu hi Britain a um Daily Telegraph chun aseiye. Daily Telgegraph in aseibe na a Israel in ‘quid pro quo’ aum ding aphat e ati. Hinla hitobang thulhuh hi koipen in asei ham vang asei chenpoi. Kal masa a kong kimat thua kholchilna aum ding Israel anom in chuban leh Gaza a blockade jong lahdoh ding anom tai akiti e. Hiche kholchilna ahi Israel jurists leh masanga diplomat anahi chuleh foreign observers mi 2 toh amaho hin athu umdan ho phatah a kholchilna anei diuvin akiseiye.
Thailand in Chamna dia party jouse kikhopna nei ding
Bangkok, Lhadou 9: Ahung lhung ding Lhadou 12 teng leh Thailand sorkar in five-point nampi kihouchamna thu seikhom dingin party jouse akouve tin Prime Minister's office in thuphon ahin neiye. Hiche kihouna aum jou teng leh Prime Minister Abhisit Vejjajiva in mipi henga thuphon aneiding ahi tin PM office minister Sathit Wongnongtoey in aseiye.
Prime Minister in Thai mipi jouse akou khoma kihou chamna aum kit ding thu asei ding ahi chuleh
sorkar in jong Thai society sunga kilungtona aumna dinga pan alah jing ding ahi tin Sathit in thuso miho koma aseiyin ahi. Hiche kihouchamna dinga hi Committee tampi kisem doh ding mipi koiya kai in pan alah thei nadinga kibol ding ahi tin minister pan aseibe in ahi.
chu Iran ana pehson ahi. Hiche jeh chun achesa Ellha 27, 2005 kum chun Iran in Russia gama kon in satellite camera kibuto chu Vantham jol a ana kap doh ahibouve tin Justice Department thuphon chun aseiyin ahi.
