New Delhi, Lhadou 9 : Leiset chunga train lei kido sangpen chu Jammu and Kashmir Chenab vadunga natoh akipan kit tai. Hiche hi IIT-Delhi team in lei kido chu adih nai tia aphondoh to lhonna asah jong kipan pai ngal ahi. Chenab vadunga a train lei kido hi 324 metre a sang Eiffel Tower sanga jong 35 me- tres a sangjo ding
ahin hiche lei hin 125 km a gamla Katra-Banihal ajop mat ding ahi.
IIT-Delhi team chu Prof. KS Rao makaina a 359 metre a sang lei kido chu kholchilna ahung nei u ahi. Senior Railway Ministry official in aseina a lei kisa chu aphatmona imacha aum poi ati. Hiche lei kisa chu Lhamul 2008 a chu adih lou aum e tijeh a aban kisa be lou anahi e. Hiche jeh a chu Railway Ministry in seven member expert committee khat anasem doh a amaho chun phatah a vetchilna ananei phat uva natoh hi aban chal ahitai.
Maoists mi 8 Orissa akon kiman
Rourkela, Lhadou 9 : CRPF sepai khat le adang mi khat that a pang Maoists galguh bol mi 8 police hon aman un ahi. Nini masanga chu Maoist hohi thudoh nei dia ana kiman ahiuve. Tuni chun court a akipui uvin kal 2 sung police khut a umdin thupeh anei tai.
Amaho chu Harinath Singh, Sankar Singh, Asanku Singh, Sabinder Singh, Krishna Chandra Saha, Debunath Singh, Dudha Oram, leh Rade singh ahiuve. Amaho hi abon uva Bonai Sub-division a um karda kho mi ahiuve. Maoists ho hin CRPF panna a mi 2 athat un, Assembly election a Kard polling booth a electronic voting machines achom un chuleh NH-23 A gari lhai ho asuboi uve tia kiman ahiuve tin police in aseiye.
Tamil ho thah chenna ding thu a Singh le Rajapaksa kihou
New Delhi, Lhadou 9 : Prime Minister Manmohan Singh leh SriLanka President Mahinda Rajapaksa in Tamil ho LTTE gal um jouva athah a achenau sah peh ding thu leh kum tampi SrLanka boina thu seitoh dingin kihou na anei lhon in ahi. SriLanka a Tamil nam mite hi India in jong nasatah a agel khoh khat ahi jingin ahi. Lamkai teni in economic, development, leh counter-terrorism thua pan lahkhom ding jong aseikhom lhon in ahi tin official thuphon chun aseiye.
Rajapaksa India ahung lhun in Rashtrapati Bhavan muna lemna ana nei un ahi. Chujouvin External Affairs Minister SM Krishna in ahung kholjin lamkai pa akouvin Tamil milham 300,000 ho thah chun ding thu asei khom lhon in ahi. Chuleh agama muslim jat lhom ho chung thu jong aseikhom lhonnin ahi. Rajapaksa hi avela president ahung kaidoh jouva India ahung vilna amasapen ahin ni 4 sung chamding ahi.
Rajya Sabha a TV Channel atumbeh a um tading
New Delhi, Lhadou 9 : House of Elders tia jong kihe Rajya Sabha in agang thei penna TV channel atumbeh a anei vah ding ahitai. Hiche hi Lok Sabha TV aum banga ki um sah kigo ahi. Lok Sabha ahi achesa kum 4 masanga chu Somnath Chatterjee speaker ahi laiya ana kibol doh ahitai. Tun Rajya Sabha TV nei ding tohgon aumten natoh jong amachal jinge. Tupet tah ahi project report kholchilna kichai lam ahitai tin Rajya Sabha Secretary General VK Agnihotri in thuso miho koma aseiyin ahi. Hiche tohgon noiya hi dangka 2.5 crore lut ding ahin Chuleh Chief Executive officer leh Advisory Committee akilhen doh teng natoh hi kipan pai ding ahitai.
