Ajehchu, damtheina kitihi vang channa lentah ahin, Sum in jong achoh joulou ahi.
Sum sangin damtheina neiding aphajoi kiti thuchih hi koima adihpoi tiding aumpoi.
Ahin, tamtah veihimihohin damtheina sanga sumjoh agelsang phat aumji e. Thil khatchu phat sohtah ineilou teng akingai chajin ahi: sumhi min ahaholpen ahijeh in alungel suhbulhitna dingin sum angaichajin ahi. Sum ineileh in akisa theijin, loule ai, von, nehle chah akicho theijin, nopsahna aneovapat alen ñ hotel a cha khonkhat a-pat gamdanga kholchena geijin eimusah theije. Thil tamtah pihi anei joulouho adin akikhah in ahi. Chapang school hoija kaisah, sum luttah a kichep na skating leh golf kitihohi sumhao louhon akijoupoi.
Sumhi aphat chomna aumpoi tina hilouvin chuleh summin nopsahna tampi eichohpeh thei houhi haimilding tina ahisampoi. Akisei nomchu ahileh, sumhi hahsatah a na itoh a ikipehdoh tenglebou muthei ahijeh hin sumhol gunsetna hinkho mandinghi aphanadem? Mihem hohin angaichat holeh phat chomkhat nopsahna hohi asuh pungbe louva phalou ham? Iduchat tahkhat sumlut tah a nehsanga chu kitimma nehda jengchu phalouham? Mihem hohi sum holnan akisalel behseh taovin, tha-olna dingleh nopsahna dinga sum manje jong asumilgam taove.
Sum holna iboi behsehjeh un insumgmi, loilegol toh phat akimang khom tapon, eima damtheina jengjong ikivetman tapoi. Hijehchun, sum haholval kitihin itahsa leh ilungel nasatah in atongkhai. Ikidoh diuva dei umchu sum neina dinga hi insung leh idamtheina geija pehdoh tah hinam?
Damtheina toh haosatna kilhen kahding hileh kinel baotam umlou hellin damtheina joh kilhengsoh keijinte. Adamthei pachun amakeo hilouvin midang jong avetheijin ahi. Society leh insunga dingin mantheitah ahi. Adamtheilou hochu midang nekang’a pang ahi. Sumhin doctor kivetsah man leh louman chuleh lou inna umman apetheijin, ahinlah damtheina toh kipana hi achotheipoi. Miveise hochun kipamel aputhei pouvin, adamthei ho vangchun hinkho avet dannu jong ajang theijin ahi. Pathenín leiset ahinsem chun sumhi hetphah ahipon, khonunga mihemten khantouna lang ahindel phat uvabou sum ngailutna hi hungpengdoh ahi. Damthei na kitihi Pathen’n manbeija eipeh u ahin kipah tah a kisanding lomtah ahi.
Mivaicha tah ahilouleh miveise tah chu kilhen kahsah lechun damtheina joh kilhen ninte. Damtheina neiho bouhin haosat ding lung agellun ahi. Chihin avetsah chu damtheina kitihi ahiding mong danna ilah udan ahi. Mikhat chu ahung dammo tenglebou damtheina athupi danchu ahingeldoh in ahi. Midammo hohi akipah theipoi. Mivaicha hochu kipah ponte tinading lampi aumpoi. Avaichatah jongchu kipahthei ahi, ahinlah adammotah chu akipah theipoi. Hijehchun, sum sanga damtheina joh hin eikipasah theiju ahijeh hin damtheina hi haosatna sangah athupi joi.
Mihemhi angaina a kilose ahin, nomsatah a hinkho mandingbou akisahlel piuve. Ahinkho lhung keijin insah-inlhang chuleh loile goltoh neile gouvin akitet gunsetne. Insahpan T.V. akichoh leh en alenjep kichohding, iloipan in asahleh en alenjepma sahtei teiding tia lungput nei akitamme. Thil idei hohi eima summa ichoh joulou jongleh athoi umdinga sumpa lah dijong khoh akisapoi. Phat akichai nungsang lehsumholna dinga idia hibanga kakisuh cholla kadam mo pileu hitam tin akingai seuve. Hijehchun, haosat na hin abang komleh kipana eipeh sangin lungboina joh eipen ahi. Haosat ding deibehseh hohi kitah lou naleh jonchih lungthim apunommun ahi. Sum muna ding ahipouleh thildihlou boljong akhohsah pouve. Ahin,lamdih louva thil kimuhi alhoupon hijeh chun amaho jonghi chomkah louvin lungkhamnan ahinlo dimji taovin, achainaleh insung leh society dinginjong boipi umtah asohdohji taove. Alang khatnah, damtheina vanghin kipana bou ahinlhutjin, itahsa adam tengleh thilpha akigel theibepme. Sana dangka adimmin kinei jongleh itahsa adamlou tengleh itiba kipana kimu dingham!
Tulai khang neile gouva kitetna ahitahjeh hin mihohin thilchohnan sum ijat seng jongleu achim toh pouve. Koimahi alung nachim aki umtapoi. Thil hachohleh sum hahol sangahi insung mite toh iha umkhomma loile goltoh ikihavop johleh kipana aumjoi. Sumlepai jong iholkhop mai theiju ahitan, neile goujong ihalam maitheiju ahitai, ahin hichiho chenghin ikipanao asuh sangbe louva ahileh ihinkho mandan athah a kikhol ngaijinte.
