Pu Paotong Hangsing leh Nu Ngainem Hangsing chanu
Nungah Hattinneng Hangsing “MISS NAGALAND 2010”
leh VOTH thalheng Pu Richard Haulai, VOTH (Nagaland Correspondent) kihoulim na ahi.
TAHCHANU MISS NAGALAND, naphat manlutah dalha ‘a kihoulim thei a I um jeh un nachunga seijoulou kipana kahin peuve. Amasan Miss Nagaland pachanna nahin nei chunga Voice Of The Hills (VOTH) Editorial team le asim hon avellin kakipa nau kahin phong uve.
Voth: Na mintah neisei peh thei diu ham?
Hattinneng: Amasan kagin chat phah lou hella, tunia Eimite lah a dia magazine hoipen khatna kahet VOTH hinboipi jing editorial team’n sangtah a neiki papiuva achung chonna neiki houlim pi jallun nabon chau chunga kakipa na sangpen kahin phonge.
Kamin tah Hattinneng Hangsing ahi.
Voth: Na insung detail them khat neihil thei diu ham?
Hattinneng: Sopi Ucha Pasal 2 (ni) leh Numei 3(thum) kahiu vin, numei ho lah a aneupen kahi. Kapa School a Jilkung (teacher) ahin, kanu insung vetup (house wife) ahi.
Voth:Themzil nalam echan naphah hitam? Chule hinkho a epi tup (aim) nanei em?
Hattinneng: BA 1st year simlai kahi. Hinkho a kalungtup pen chu Fashion designer hi ding ahi.
Voth: Miss Nagaland experience neo khat nei seipeh tem uvin.
Hattinneng: Miss Nagaland kamu chu kalung akidang behseh jengin ahi. Ajeh chu kimunte tin neokhat jong kagel pha pon ahi. Lim le mel, chule chihna jong kaloi dangho (kaki tetpi ho) jouse sanga ema hilou penna kakigel ahi. Hitobang pachan na kamu jeh in Pathen kathang vah e.
Voth: Hitobang pachanna sangtah nanei hi epijeh pentah hinte tia nagel em?
Hattinneng: Kei gel dollin Pathen nin Nagaland’a Kuki te jong Naga dangho banga chanvou (Rights) lhingset nei ahiu ve ti hi eitah lang peh nom jeh u hinte tin kagel e.
Voth: Miss Nagaland pachanna nahin mu hi najat chankhompi te dia kithang at na lal lukhuh nahin pohpeh in, maban na epi lungtup nanei jem?
Hattinneng: Hiche to kilhon’a kalungtup hi, lekha simtoh, fashion designing bolding hi ahi.
Voth: Kilungset pi nanei tah em? Chule Themzil lai’a dongma neihin maban (Career) asuh boi thei em?
Hattinneng: Ka nei kha tai. Kilungset pi/dongma neihin lekha simlai sunga din hatah in mihem asuboi theije.
Voth: Modelling lam chepi jing ding nagel em? Khangthah chapang modelling lama thanom/lungtup neiho dia epi thumop nanei nom em?
Hattinneng: Hitobang lunggel vang chu kanei poi. Hinla ka khangthah chanpi ho koma kasei nom chu, leiset na hi epi hileh tupna kicheh enei pou le alampi chu a umsa ahijenge.
Voth: Gamdang a cheng najat chan khompi hon Nagaland a um Kuki chate dinmun aha het pon, hijeh chun nangin themkhat neihin seipeh thei diu ham?(Population, Themjil na lam….etc.)
Hattinneng: Nagaland’a cheng Kukite hi gamkai (Area) ni in kacheng uve- Molvom gamkai leh Ahthibung gamkai. Amijat hi 35,000 (Thirtyfive thousand) vel ahi. Themjil na lampang hi population to kitoh in ahoi nai, ahin khangthat te eki ha bol jep u angai je ajeh chu themjil na hi nampi tinggu ahi (Education is the backbone of the society).
Voth: VOTH magazine hi nana mu/sim khah tah em? Nasim khah tah leh ahoi cheh nadinga lunggel epi nasei nom em?
Hattinneng: VOTH hi kana sim khatai. Kei mu dollin hoi kasa lheh jenge. Koima danga sangin anoi nung poi. Editorial team jong tompan jingun. Eijute hi lekha/magazine ho choh a sim ding hi elhasam lheh jengun hijeh chun, VOTH hi amachalbe jing nadin nam miten subscribe bolcheh leu hen kati e.
Voth: Achainan, na nam chankhom pi ho koma epi navailhah nom em?
Hattinneng: Kanam mite koma kangeh nompen chu, Nam khatna Pathenin eisem uhi kipa piu hitin, kitthang at piu hite. Chuleh, e nam sungu va HIV/AIDS vei ho, nu lou palou ho leh elbai, genthei ho thet bol louvin lungset nu hite. Kaki pah e.
Voth: Maban jong leh insung leh namsung a dia kipana thupha hinpoh jing inlang, nangjong Pathen mapui changpum in hung vang pha tan. Kaki pah uve.
Hattinneng: Kaki pah e. VOTH hing jing hen.
* Hiche Interview kibol na hi Voice of The Hills Hard Copy muphalou (lhunlou na) ho'n asimthei ding deisah na jeh a hung kikoi ahi.
~ Editor
